CALDU DE BERZAS CUN CALABAZÓN

Loutru día chegou-me’l subrinacu miou piquenu a casa feitu’n  mamarrachu. Mal rayu me fienda si  nun traía las urechas todas furadas cumu lus gurinus el fucicu cuandu tan alambraus pa que nun fucen ya tumben la puerta’l curriechu, todas chenas d’alambres ya las cexas ya las narices tamién. You nun pudia agüechar ni un mumentu pa él. Na más arimá-me a él dixitse: ¡Melandrín! tas feitu una bona calmidá, munín; ou vas asina cun esi caretu ya esas pintas. Paeces un antroiru. Peru él ríase ya nun sei que farfutsaba pu lu baixu de carcamal ya de trastu viechu, peru catsou la bouca ya nun me cuntestou nada. La nuviaca ía paecida a él; paeme a mí que xuntou-se Xuan cun Pedru. peru  al menus etsa nun anda asina cargada d’alambres ya de fierrus pul caretsón, cumu fai  este fatueiro de subrín miou.

Esti demoniu de rapazacu  ía el que ta pa Madrí  cuna sua tía Dulores;   sí, ya vus lu dixe fai poucu tuvía, que esti nenu, anque  ía un murriacu piquenu, ya tien  nuviaca pa encamá-se cun etsa ya tou, cumu sua mai nun lu regaña nin lu riprende nada, él fae lu que quier; asina ta desalertau del tou. Etsa ía muitu flacucha,  miánicas paez una vara de  culgar las murcietsas, peru minudu tipu tien, paré una artista. Acurdareis-vus de cuandu vus cuntei que este par de melandrinus nel  branu pasau tuvienun aiquí pul tiempu de la yerba, ya pasabanse las nuetis enteras faciendu la xirigonza, esfuchigandu ya  espatarexandu  nu cubil;  etsa, daba unus riblincus que dios nus tsibre. Algunus días bien pinsei que rumpian el trangalazu del sumier que fuera de miou buelu. Se ve quel merdeiru esti fuzaba netsa cumu si fora‘l  melandru nu maíz. Ya etsa encantada, home non;  minuda tsagartona  ta feita.

Peru outru amiente esta nenaca,  ía la cundenada escazana cumu etsa sola ya ta siempre  alietsa pa tou. Ya tsimpia, a cada poucu anda tsabucánduse. Esta mañena, na más tsevantá-me you del camastru,  sigún baxaba pa la corte a mucir la Cachorra, escapau saliu etsa del sou cuartu ya  intrugoú-me que si ya taban madurus lus calabazones que tengu semaus na currada. You miánicas quedei apaxarau, ya cuntestei-tse que non, que anque taban cuchiend’un poucu de culore marietsu anaranxau,  entuvía lus gochus nun los querían asina purque taban verdes en cisgua. Nese mumentu etsa díxu-me que nun yera pa que lus cumieran  lus gochus, non; etsa quiríalus pa faer una cousa extraña que chamou-tse  algu asina cumu pudin… de calabazón.  You, nesi mumentu,  dixe pa min: esta nenaca ta tsouca da feitu;  agora cun estu de la crisis vamus a tiner que cumer hasta la chavaza de lus gurinus purque  ya quier fartucá-nus a tous cunus calabazones, tamus aviaus;   siguru que espués escumenzará cunus nabus ya cunu maizón yal panizu de lus xatus. Peru explicoú-me que etsa pa tar flaca ya lixera de cadriles asina cumu ta, tien que cumer a minudu desi mexunxe, feitu cun calabazón xuntu a una pouca de  rimulacha cun alguna pataca. Peru patacas poucas. Tamién tse echa unas fuechas de ruda. You dixitse: ¡rapacina!  Tas tola del tou. Esu que me tas falandu son cousas de bruxas. Nun ves que la ruda ía una planta que cheira muitu mal ya ía vininosa, pur esu andan cun etsa solu las mucheres bruxonas  que sacan el mal del güechu del cuerpu a lus embruxaus. Etsa quedou-se quieta de pía, cumu si fora un espantapáxarus,  nu estroucasa ya nun me dixu más. Espués, pinsoulu mexor ya cuandu se puxo a fae’l caldu de berzas pa la xanta de mediu día, díxu-me que tse truxera un cachu de calabazón que lu quiría, verde ya tou,  pa echar nu pote. You tsevantaba las patas de risa pinsandu nu muntón de calabazas que tsevei de rapaz cuandu tses intrugaba a las blugueras d’aiquí, que yeran algu melindrosas, si quirian beitsar cumigu. Peru asina ya tou,  tseveitse-lu, ya pa atsí lu mitiu pal pote esta mucher.

Parta-me un rayo si cuando escumenzamus  a tsapa’l caldu  tous diximus que paecía que taba un poucu engrutsau purque nun cuciera del tou, peru que sabía  muitu bonu. Hasta la Rulindes, que vienu a casa a pur un poucu de tsieldu p’amasar la furnada’l pan, prubou una garcetsada  del caldu n’ascudietsa piquena,  ya dixu que tse  gustara muitu. Cúmu siria  que,  d’agora pa delantre,  etsa tamién iba a escumenzar a faer el putaxe cun un poucu de calabazón.

You atsouquezcu del tou cun estas rapazacas d’agora. Dientru de poucu tiempu, cumu sigamus asina, vamus a tiner que faer na casa pa xantar un caldeiru de chavaza solamente,   que va valé-nus pa lus gochus, pa las pitas  ya pa nos. Ya’l casu ía que las galdrofas que amaña esta rapazaca madrileña saben muitu bien; ía salerosa ya dispuesta cumu etsa sola. Tous lus mastrochos que fae, tan cumu  pa retsambé-se las dedas. Miánicas que sí.

Lus rapaces del cunventu de Corias que vayan a fartase’l  sábado a la Budega Narcea,  que agüechen bien pur si el caldu tsieva tamién  calabazón. Tsevara-lu de sobra. Tsevará de tou, hasta sebu de castrón.

A esta parexa de melandrinus de mia casa, intruguei-tses hasta cuando diván a tar aiquí cun nos, ya cuntestánun-me  que pocus días más,  purque taban asperandu-lus, outrus quinquilleirus  cumu etsus, que tampoucu tienen nada que perder,  pa ir a una casa rural desas que pur aiquí  chamamus-tses  Casas de Aldea, pa pasar atsí xuntus unus días relaxaus. Dixe you pa mí: sí, será de lu riventaus que tais de tantu trabachar, fulgazanes.  Ya  nun quise sabere nada  más purque siguru que estus pelgares faen cama ridonda ya tou entre tous etsus. Minudus alicates tan feitus.  Etsas son unas pelandrinas,  ya etsus unus pelgares, tal que xuntou-se la fame cunas ganas de cumer. Esu seilu you bien, ya de buena tinta. Peru atsá etsus. De lu sou gastan. Pur mín cumu si quieren puné-lu al sol todas las mañenas de xelada, oh. ¡Fartus se agüechen de tantu fuchigar, coooño!

“Jesusín”, el pelgar