LAS ANDULINAS

Anantias de escumenzar a garabatear un poucu aiquí nu blog, voi dicí-vus una cousa que nun tien muita empurtancia, peru cunvién deixá-la tsúcida. You firmu cumu Jesusín, purque cumu tuve unus anus cunus flairones de Courias debe nutase-me algu que, lo que me enseñanun aquetsus homes de lus faldones blancus, nun caiu tou en sacu rotu ya valiu-me pa algu;  peru na mía casa chaman-me tous Jasusín,  ya las mucheres vicinas que son del tiempu de mia mai tamién; hasta la demoniu de la Rulindes me chama asina: Jasusín. Ya you cumu toi acustumbrau, miánicas suename muitu mechor ya presta-me más.

Peru you lu que quiría cuntá-vus yera que de piquenu, cumu ya vus dixe noutrus mumentus, you yera riturciu ya malu cumu’n dulor, peru cunus anemales yera muitu facindiegu ya cun tous lus bichus lu mesmu. Subre tou cunus  de casa, cumu son las vacas, lus xatus, gochus, ouvechas, cabras, cunexus, pitas, gatus, perrus,…, tous. A mí gustan-me hasta lus tsumiagus, lus sapus, lus toupus,  lus beitsourus, lus ratus, lus tsagartus, “tsagartas”, las culuebras, las curuxas, lus murzacus...,  tous. Peru lus que más me chaman l’atención son lus paixarinus. You chegau el mes de mayu y'andaba tou alietsu asperandu cuandu chegaban las andulinas. Tinia muitas ganas de agüechá-las peru yera purque sabía que na más que apaecían, quedaba poucu tiempu de tar na escuela, ya tsou, ya pudía andar esqueirandu nus bardales ya nus árbules buscandu niales. You lus tsibrus entotsaban-me la chola, taba fartu detsus abondo;  taba más cuntentu cuandu taba tsabrandu las tierras, cunas vacas pul monte, u apañandu yerba pu lus praus ya gamuetus pa lus gochus nu monte. Pur esu na más que agüechaba las andulinas pur primeira ve nu anu, puníame gayasperu.

Tou lu cuntrariu yera agora pur sitiembre que na más que pasaba la fiesta del Acebo ya m’entraba la tserza ya taba you priucupau pinsandu que las andulinas escaparan, purque estus páxarus fuxen alredor del quince, ya esu quiría dicire que había que vulvere pa l’ascuela. Las andulinas nu miou puelu, na más que chegaba la segunda simana de sitiembre, pu las tardiquinas puníanse lus cables de la tsuz, entre poste ya poste,  chenus hasta lus topes de andulinas, todas xuntinas apituñadas unas al tsau de las outras. Asina taban un día u dous, ya cuandu menus lu esperabas, una mañena ceu, amerabas ya nun había nenguna: fuxeran todas pal África durante la nueti.

Estu de las andulinas tinía-me a mi apaxarau. Tous lus primeirus días de sitiembre na más tsevantá-me del camastru lu primeiru que faía, anantias de baxar a mexar a la corte, u de  chabucá-me la cara na palancana, yera asumá-me al curredor pa agüechar si tuvía taban lus páxarus pousaus nus filus de la tsuz. Si ya fuxeran, you puníame a  chapinar d’acó pa acutsó pu la sulana cunu caretsón tsargu ya enfurruñau ya mía mai, cumu cunucíame abondo, farfutsaba pu lu baxu entre caniles: “Jasusín, ya puedes ir chenandu la palancana de augua pa tsabucá-te bien cun xabón: el caretsón, el piscuezu, ya las urechas;  que l’ascuela ta puntu d’escumenzar”.

Astoncias, you sintia-me feitun desgraciau, murtificau del tou cumu dicía mia mai. Que you nun sabía bien purque dicía aquetsu de murtificau. Quirría dicire que taba amurniau, cumu si murriera un poucu. Ya que razón tinía ya que virdá yera aquetsu. Pa mín na más que faltaban las andulinas, acabábase l’alegría del branu ya escumenzaba’l infiernu. Pur si fora poucu cuna xirigonza de la escuela del puelu, espués en mia casa, diutses pur chevá-me pa cunus flairones.

Riniegu lus dimonius que pouca suerte la mía. Menus mal que cunus flairones de Courias tuve poucu tiempu. Aquetsus humecones de lus faldones blancus fartanunse de mí escapau. Etsus prifirian  nenus muitu más estudiosus ya ubedientes, cumu Manolo el home de Maribel, u el Prior que según me dixenun fai poucu, paré que  tamién yera espiertu ya bon nenu;  non fulgazanes ya pelgares cumu you.

“Jesusín”, el pelgar