L'ASQUITANA

Loutra  nueite, mientras faia-mus la fugueira de San Xuan cunus  cadotsus de lus rebotsus que baixamus del monte fai poucu, tandu atsí de pía delantre la ilesia, amerandu pal fou ya cavilando un  poucu de cúmu ta la vida de refistulada, alcurdei-me de lus blugueirus ya espués al  baixar pul carreiru que ta chenu de murrillus pa la fonte’l Pimpanín, a cucher las papolas de sabugu al risca’l día bien ceu,  dixe you: cumu fai muitu tiempu que nun garabateu nada aiquí nu blog esti, nun  faigu nada de más si tses cuentu  a estus rapaces del cunventu de Corias (agora chaman-tse Courias), nu que nus afanaba-mus lus rapacinus  na nuesa parroquia la nueite de San Xuan.

Lu primeiru de tou ía decí-vus que aiquí nu puelu nuesu siempre festexamus muitu  San Xuan, agora pul 24 de  xuniu, purque anantias tamién faiamus fulixa en  xuliu pur  San Floxu lus días  24 ya 25, peru de fai poucu p’acó, pur San Floxu ya nun faemus apenas nada. Algunus anus, que nun son tous,  sube  Don Primitivo a dicí-nus la misa pu la mañena ya poucu  más. Esti cura yera amigu de Don Herminio el cura del Acebo. Cada anu que bien a dici-nus la misa, luegu xanta nuna casa difrente. El anu pasau cumiu cun nos. Reniegu lus demonios cumu come ese home. Las mucheres nun son quien a datse fartura. Hubu anus que espués de  bien fartu, tuvía cumiu el solu un brazu de gitanu. Asina ta que paez  una facina de pacha.

El casu ía que güei, a la xuventú nun tses gustan lus festexus de lus puelus,  ya en cuantu chega la nueite escumienzan a runfar cunus coches cumu dimonius ya afuxen a tou  miter pa las discutecas de la Vitsa. Ya lus viechus somus poucus,  ya p’ancima tiné-mus  pouca xixa ya poucas ganas de xareu. La Rulindes, ya outras rapazacas que hay cumu etsa aiquí nu puelu, que pudían axeitar muito la fulixa,  tampoucu quieren quedar  purque dicen que esu de beitsar en parexas nu prau de la currada,  ía cousa de aldeanus. A etsas gusta-tses más fartá-se de cerveza ya  beitsar solas nas discutecas hasta pu la mañena, fayendu axagüeirus cunus brazus ya cuna chola, asina sin parar  cumu  tsoucas,  u cumu si  tuvieran el  baile de San Vitu dientru ¡Tamus apañaus cun esta xuventú! ¡Aspera-nus bona!

Ya you tengu poucu rixu tamién purque tuvía andu tou escacharrau de la bouca. Esas peironas de dintistas, paeme a mi que tienen poucu xeitu;  tuvía nun me chamá-nun  ende hai más de dous meses pa prubá-me el cacharru ese de la dentame que me tan fayendu. Muitu tardan, nun sei cúmu me asentará ya si serei capaz de mazcar bien  cun él.  Ya que anantias falamus de las papolas del sabugu voi cuntá-vus lu que faiamus nos cunas canas ya xamascus gordus deste arbulín. Chegaus estus días en víspuras de San Xuan, escuchiamus las canas que yeran un poucu más gordas ya que tuvieran bien dereitas; cumu esta madera tien muita meotsa pur dientru al sacaste-la queda un tubo güecu, cumu si tuviera furau, muitu bono pa faer lu que chamábamus l'asquitana. De veras que faía falta ser espiertu cumun rayu ya apañau cuna navacha  pa puder faer todas aquetsas cousas tan guapinas que faiamus naquetsus tiempos lus nenus. La tal esquitana nun yera outra cousa que una simple bomba cuna que cuchíamus  augua del regueiru ya que furrula lu mesmu que las xiringas de lus praticantes cunas que ponen las indiciones.

Nos, una vez que afuracábamus bien el tueru del sabugu, d’arriba hasta abaxu  pa sacá-tse toda  la meotsa de dientru, siguiu tapábamos-tse  una base del tubo, mitiendu-tse un taruquín de madera dientru, ya solo tse deixábamus tsibre un furaquín nu centru. Aluegu pul outru tsau mitiamus-tse un palu tsargu más delgau que na punta tsevaba  enruscau  un trapu de camiseta viecha de felpa, a modu de turutsu, hasta que entrara nu tubo bien xusto, peru que nun chegara a entotsar.

Asina deste amiente,  faimus-tse baxar el palu de dientru hasta’l fondu del tubu de fora ya mitiamus-lu nel augua. Nesi mumentu escumenzábamus a tirar p’atrás  del palín de dientru espacín hasta que chegaba atrás sin sacá-lu del tou, ya mientras ibase chenandu de augua l'asquitana. Una vez chena de augua empuxábamus el palu de dientru p’alantre ya pul furaquín de abaixu salia el churrín del augua cun muita fuerza. Tous lus anus  tandu na fugueira de San Xuan pu la nueite,  andábamos lus rapacinus itrás de las nenacas pa cuandu se escarqueixaban un poucu al tsau del fou, puder enchufá-tses la esquitana pur debaixu de las sayas pa muchá-las, ya que escumenzaran a espatareixar. Algunas nun faian outra cousa que  afacá-se la roupa bien pa que nun tses entrara l’augua pa dientru, peru asina ya tou,  unas punianse tsarizudas u tsuriqueaban, ya outras chamában-nus de tou ya dician hasta picaus. El pai duna d’etsas, que yera un humecón muitu graciosu ya guasón, farfutsaba-nus a nos al uyiu, nenus: miánicas faeis muitu bien etsá-tses augua a estas  rapazacas pur debaixu de lus faragachus;  siguru que nun tses sobrará que las refresquéis un poucu.

Asina, las nenacas cada vez que nus agüechaban a lus rapazacus cunas esquitanas na manu, punianse todas refistuladas ya  afuxían de nos cumu si agüecharan al mesmu trasgu. Las que tinian más tserza, faían  pucheirus cunu caretsón u escumencipiaban  a berrar mientras chapinaban todas esnalazadas a tou miter delantre de nos, hasta que chegaban a onde la mai las pudiera escuitar ya astoncianas afuxía la mucher a tou miter  a pur nos cuna guichada tsevantada, a ver si pudía rumpé-nus la crisma. Tou estu tengutse-lu cuntau you a la Rulindes muitas veces peru etsa nun lu crei,  ya di que esas cousas son falcatraus de  homes burricones ya  aldrumeirones ¡Ya nun tse faltará razón!

Ya cun esu alon, rapaces.

“Jesusín”, el Pelgar