A LA RAPIEGA GUSTAN-TSE LAS GRUEÑAS

Ribichones, ribiyones, miruéndanus... (Fresas silvestres)

Nesti mes que chevá-mus de branu, ta faiendu más calore aiquí que na Mancha. Este anu  pur Cangas suda-se abondo, ya nun ía solu pula gafedad que fae, tamién faen muitu lus amagus de turmenta que hai a cada poucu cun bona tona ya tou. You toi tou’l día fulgandu aiquí pur casa amuzargau sin apenas faer nada pulus praus, purque nun  ta nada axeitau pa siguir gadañandu. Agora mesmu tengu muita yerba gadañada ya arramada pu las poulas, peru cumu nun urea del tou nun pudé-mus apañá-la. Miánicas cumu siga muitus días mais asina, cuna dichosa nublina arrastru,  que muecha más que sulecha,  pundrase-me toda cardinienta ya mediu podre que nun valdrá pa más que pa mutsir las vacas ya pal cuitu.

Menus mal que loutru día chegá-nun aiquí  al nuesu tsugarín pa casa de la Rulindes, unas rapazacas roxas ya rizosas que son primas detsa pur parte de sua mai, ya dixe-nun que vienen desi puelu que faen nel branu la zapatiesta esa de lus tumates. Dixé-nun que se chama Buñol ya que ta en Valencia. Son duas nenacas roxinas muitu rabileiras ya sempáticas cumu etsas solas, asina cumu la Rulindes, peru más xuvenzacas. Chaman-se: una Amparitu ya loutra Vicenteta, pero inda son  guapinas ya axeitadas que manda madre. Estas duas pascaxinas a min cháman-me Xiscu, ya esu que Rulindes ditses que non, que you soi Jasusín, peru etsas nun faen casu ya tan tul día: Xiscu p’acó ya Xiscu p’acutsó. You nun sei onde demonius sacá-nun estas peltrazus  de nenas ese nome, peru you catsu la bouca purque  gustá-me muitu tiné-las al pía miou. Miánicas tsievan las duas unus camisetuchus escutaus que sin casi amerar pa etsas, veinses-tses las peronas, ya cunus pantalunzacus idem de tsienzu, son tan cortus que parta-me un rayu si tienen algu más de dous dedus de pernera. Ya you cumu ya toi feitu un buen galifate, miedru una cuarta ya espúrrese-me tou cada ve que tses agüetsu las pantorras tan guapas que tienen las cundenadas. Asina na más que escuitu dicire: ¡Xiscu, Xiscu…!  cuntestu-tses  escapau ¡cuandu la vi you más gorda, que más quieru you!

Ya estas rapacinas son muitu madrugadoras. Queréis creer que güei pu la mañena bien ceu ya  tuvienun sintadas un ratau aiquí nu escanu de la nuesa cucina,  ya you casi me pongu trespeitau de tantu amirá-tses pa lus cadriles tan richonchus que tienen ya pa las peronas que las tsievan poucu menus que al aire del tou. El casu ía que a estas nenacas gusta-tses muitu el tseite de las nuesas vacas; subre tou el de la Garbosa que tien muita nata, cuandu ta recién muciu etsas, tsapan-lu asina cunus espumaraxus ya tou. Nun ía de extrañar purque esta tenrala nuesa tien un tseite muitu bonu, corta-se la nata cuna navacha na canada. Cúmu sirá que veise dun día pa outru cumu miedra el xatín que tien agora  que ta ricién parida. El casu ía que na más escumincipiar a muñir ya tan estas duas cativas aiquí na nuesa corte tsapandu’l tseite  de la  canada  cumu si foran duas xatinas. Ya tses dixe you que nun tomen tantu tseite desti natural que ingorda muitu, subre tou, las peronas, peru etsas riinsi de lu que you tses falu, ya nun me faen caso nenguno. A min fain-me  muita gracia, ya gusta-me tar cun etsas, purque ía  muitu raru que rapazas destus tiempus mudernus faigan estas cousas. Nos, faia-mus lu mesmu, peru yeran outrus tiempus. La xente nova desta  xeneración d’agora, ía raru que tses gusten las mesmas cousas que a nos, cuandu yera-mus pequenus.

Güei cumu ya dixe, bien ceu ya taba la nublina en cuerda toda arrastru pula mañena ya nun taba pa dir a la yerba ya astoncianas dixenun-me estas duas tsangurdias  que quirían subir a la braña ya mité-se dientru duna cabana. Ya Rulindes dixu-tses que sí, que tinía you que dir cun etsas. Ya you tsoucu di cuntentu. Cuchí-mus lus sumbreirus ya la guichada, ya la capietsa duna fugaza de la masera  ya una riestra de tsinguaniza de l'hórreu, mitimus-lu tou dientru dun espurtietsu ya puxímu-nus a chapinar lus tres camín arriba, apruveitandu pula fresca. Etsas nun quirían tsevar el espurtietsu, falaban pu lu baixu que yera muitu mexor la talega esa grandona que tsieva esta xente xoven toul día al tsombo, peru you nun quixe. Augua nun faía falta tsevar nenguna, purque hai augua abonda na fonte de las Andulinas que mana toul anu bastante, anque agora nu branu, si nun chueve a cada poucu, nun sal muita;  sal asina  cumu la mixada dun carneiru, peru esu sí,  bien fresquina que ta. Na más que chegá-mus al tesu la tsóndriga que ta muitu cuestu, pará-mus pa cucher un pouquinín d’uxíginu purque diva-mus aflanandu del tou. Nesi mumentu una destas rapazacas punxu-se de piá d’un blincu ya escumenzou a esnalazá-se toda cuandu viu un ruscatseiru que tsevaba clavadas nus aguichones del tsombu dous manzanucus piquenus. Yal mumentu l’outra nenaca viu un cagachón de la rapiega nu altu dun murrillu duna tsinde, que taba  tsenu de grueñas de zreizas bravas que cumiera la raposa, ya dixu: ¿Xiscu, estu que ía oh? Ya you cuntestei-tse  al filu: ía lu que tas amerandu nena;  que va ser: ía  un cagachón de la raposa, ricién esfueirau , espués de que se fartou bien el anemal de zreizas bravas. Ya la rapacina intrugou-me de novu: ya lus güesus esus de que son ¿Qué güesus agüechas tú munina? ... Ah, esu nun son güesus oh, esu son  las grueñas de las zreizas que, la raposa cumu tien priesa pa cumé-las, pur si chega alguien a quitatse-las,  tsápalas escapau  cun grueña ya tou. Nesi mumentu dixe-tses you: you tamién  papu las zreizas asina interas  cun grueña ya tou  lu mesmu que fai la rapiega. Ya minudu tses gusta a las mias pitas pul tiempo las zreizas tar al tsau miou cuandu toi baixandu’l pantalón na corte, ponen-se  todas alredor pa puder picar las grueñas sigún las voi esquitandu. Estas rapazucas cumu nun cumprenden la metá de lo que you tses aldrumeiru,  rinsi asina cumu cousa tonta ya farfotsan entre etsas que you soi “muitu básicu”. Ya sirá virdá. You faigu-me cumu que nun las escuitara,  peru fartar, fartamus-nus bien de riir cun etsas, lu mesmu la Rulindes que you. Sicasí, esta mucheraca de Rulindes, anque ía xoven cumu las outras, peru ía d’aldea ya esu caltriza muitu. Pur esu  la cundenada espatarraba-se de la risa loutru día cuandu tse cuntei que las outras quedanun-se espaparutadas del tou na más que agüechanun  el cagachón de la rapiega tsenu de grueñas, atsí engaramichau na caramietsa'l  murrillu.

Espueis de amerar pal cagachón de la rapiega ya riínus abondu , tsou, etsas duas rapacinas  chanun a currer cumu si las tsevaran lus demonius, ya poucu a poucu fumus chegandu a la cabana. Delantre la mesma cabana, al pía de la cancietsa del curral, esveirá-mus  un poucu pula vera del rigueiru, ya cuchimus un muntón de ribichones bien madurus, que a estas nenas gustanun-tses muitu purque nun lus cunecian, ya la Rulindes ya min también, anque nos tamus fartus de cumé-lus a minudu  pul monte. Etsas, las valencianas,  chaman-tses fresas silvestres.

Ya falandu un poucu de tou, nesti mumentu alcuerdu-me que nun tengu patacas na cucina, ya las que quedan nu muntón que tuvía hai na budega, tan todas ribichidas ya mediu podres. Nun tindrei outru rumediu  que cucher el picaxu ya dir a esverdiar un riegu u dous  a la currada nas deste anu. Aiquí nu nuesu puelu nun ía custume andar cunu picaxu nus pías de la patacas novas,  anantias del 25,  Santiagu; peru este anu, las poucas que tengu viechas tan todas ribichidas ya feitas un fumión; nun valen ni pa lus gochus. Nun sei si atouparei alguna que mirezca la pena, purque  sulfatei-las loutru día pa lus cocus. La metá tan en flor tuvía.

Ah, dixenun-me estas rapazacas  valencianas que esti anu tiníamus que dir a la fiesta de la Tumatina la Rulindes ya you, que ía pur agostu. Tantu la xustrona de la Rulindes cumu you, pa curré-las diximus-tses que sí, peru nesas fechas you nun puedo muvé-me d’aiquí de casa purque tengo que recucher las fabas ya semar lus nabus.

“Jesusín”, el Pelgar