PICAXU, U CANAU

El tiempu ta cumu xo rapaces, lu mesmu que lus milandrinus que nus gubiernan. Aiquí nu pueblu, miánicas nun parou de chover en tou l’hibiernu,  ende xineiru, cumu poucu. Cumu siga asina muitu tiempu más, va salí-nus hasta mofu entre las dedas de lus pias. Güei, asumou pul rebutsal algu el fucicu tsourienzu pu la mañena, pero un pouquinín solu. Baixan lus rigueirus que nun tses cueche l’augua. Faía muitus anus que nun chuvía tantu. Asina nun paran de caer fanas. Nun acabá-mus de tsimpiar una, cuandu pu la nueite escapau esguila outra. Este anu, lu que ía xeladas, vinie-nun poucas, peru la humedá va chegá-nus a las rudichas. Algunus tamus aviaus cuna riúma.

You toi aiquí anialau nu escanu, arrudeirau pu la tsariega de tal xeitu que nun baxu nada pu la Vitsa. Na más baxei el sábadu de Ramus cumu vus dixe loutra vez, que quiría comprar unus gurinus de cría ya na más. Pa colmu de males tampoucu ta aiquí la Rulindes.  Tamus tous asperandu a que tsegue de Madrí que  fai más dun mes que xebrou pa uperá-se de la napia. Etsa, nun paraba de farfutsar a cada poucu, que nun tse gustaba muitu cumu la  tinía. Dicía que  la tinía cumu la curuxa, cun forma de gabitu; cumu si fora un cambeiru pa tsevar culgadas  las truitas pul ríu. Peru nun yera virdá. Etsa, tiner tinía un bon picaxón,  esu sí, peru quedaba-tse muitu bien. A min gustaba-me asina cumu la tinía, anque paeciera la dun picatueru.

Esta rapazaca siendu nena, cayiu del picu l’ascalera l’horriu abaixu ya esfucinouse toda, a raíz d’aquetsu  quedou-tse un poucu turcida, peru nun yera cumu pa tiner que uperá-la. La cousa ía questas  rapazacas d’agora  tan tsoucas d’afeitu, nun saben ni lu que quieren. Loutru día entruguei-tse a Dulores, la sua tía, pur etsa, ya dixu-me que taba bien pero que tardaría tuvía unus cuantus días en vinir pa casa  purque  tinía’l caretsón hinchau cumu si se tse pousara encima un enxame de abechas, tou vindau  ya esfigurau cumu si fora un espanta páxarus. Riniegu lus demonios, que ganas tien la xente de puné-se a murrer sin nicesidá alguna. You tengu muitus prublemas nus cadriles que sigún lus médicus quitábanse-me tous cun ciruxía, peru you, anque fora estu el mexor rumediu,  quia, nun lu agüecharán etsus pur muitus anus que vivan. Nun deixu you que me escarnicen esus matachines pur nada del mundu;  nin que me rigalaran el Palaciu de Santulaya chenu de tsinguanizas,  xamones, choscus, andochas, tsacones, butiechus ya murcietsas. Tou xuntu. El casu ía que you, ya toi en vilu pur agüechá-tse el carechón duna ve a esta tsangurdia de Rulindes pa ver cumu se lu deixá-nun. Lulu, un vicín nuesu,  di que la sua mucher tien la napia ancha ya aplastada  cumu si fora un canau de miter la piedra d’afilar la gadaña, peru que etsa  ta conforme asina, cumu la parienun, ya fae muitu bien. Anda, que la Rulindes cumu nun tse quede al sou gustu, ta apañada. Va tiner que tsevar el  pañulón  atau abaixu toul día, cumu las viechas del tsugar.

Loutru día dixu un rapaz aíquí  nu  Blog que Jasusín nun apaecía pur aiquí purque taría  semandu las patacas, ya nun iba muitu escaminau non. Lu pior de tou ía que nun pudemus, pois  ta la currada toda nun tsamazu puru. Si mité-mus  atsí l’aladru quédanos entotsau de tal xeitu que nun lu sacá-mus hasta San Xuan. Loutru día tuve amerandu pa las patacas  de semar que tengu-las na budega mitidas nun caxón de madera pa que nun gritsen ya tan todas cunus gritsus d’acuarta. Cuandu chegue’l mumentu de curtá-las en cachelus pa mité-las na tierra nun sei si valdrán. Cumu tarde muitu en fae-lu, valdrá-me más echá-las a lus gurinus ya subir unas nuevas del  Maju de Cangas. Aiquí nu pueblu tamus tous cunas ganas de ver a la Rulindes cuna napia uperada. Nun sei que tal tse quedará purque paeme que debiu faese-lu un midicuchu desus mediu clandestinus. Etsa foi ricumendada pur aciu duna prima detsa, que tsieva muitu tiempu pu lus  Madriles. Ya vus cuntarei noutru mumentu cumu la deixa-nun. Agora deixu-vus, purque voi agüechar a la bodega si crecienun muitu lus gritsus de la patacas de semar. Ya cun esu alón, tsounón.

“Jesusín”, el pelgar