LUS “PRIMUS DE MADRÍ”

Cumu estus días datrás tuve estaxandu algu aiquí nu blog, paez-me cumu si l’entrara  a unu la gana de seguir garabateandu purque tuviera un pouquinín envizcau. Güei, voi cuntá-vus una xirigonza de fai ya unus anus que me pasou a mín,  peru non muitus.

Yera anantias de tar  you en  Tinirife ya cunecer a la pelandrona de la Gúmer. You taba aiquí nu caseriu trabachandu cumu siempre, cumu’n negru, ya nun faía más qui esu: trabachare ya trabachare, desde bien ceu, de la mañena a la nueite.

Un día apaecie-nun unus rapacinus de Madrí que son subrinus sigundus de mía madre, cumu la güela nuesa tuviera de ama de cría en Madrí dandu de mamar a mangantes señuritus cuandu yera moza, estus rapacinus tienen-tse muitu afetu, purque la güela aparte de amamantar a lus outrus fulgazanes, tamién yera pa estus nenacus de la familia  cumu una madre; más, purque  tsimpiábatses hast’al culu ya lus mucarrios, ya faíastses algunas tardes feixuelus, ya pul tiempu  la matanza fichuelas ya rapus, que tses gustaban pul vivire.

Un branu destus datrás chegá-nun estus rapaces al pueblu cun muitas ínfulas, ya creyenun-se que yeran más espabilaus que you;  miánicas paecian lus amus del mundu. Tamién sei que algunus de la mía familia debie-nun de enguizá-lus ya deci-tses: mirai rapaces, vusutros que sois de la capital ya tais bien trallaus de tou,  a ver si espabiláis un poucu a “Jesusín” que ta apavuriau ya  bardín del tou. Estus  tolus,  que más quisié-nun uyir. Dixé-nun. Dexai-lu de nuesa cuenta que este rapaz va a sabere lu qui ía bonu ya un poucu más, duna vez pur todas.

A min chamában-me primu, nun sei si yera cun segundas u non, peru era bona virdá. You en rialidá yera primu sigundu u terceru detsus, peru tinía muitus más anus que tous etsus xuntus. Lu que  pasaba yera que etsus taban mil veces más refistulaus ya currius de la vida que you. Anque esu yera lu qui etsus criían, peru nun yera del tou virdá.

Mientras tuvie-nun na nuesa casa, lus sábados baxaba-mus a Cangas al mercau ya pasábamos la mañena muitu bien pu la Vitsa. Cumíamus nu bar La Calzada, u nel Blancu, ya pu la tardiquina vulvíamus pal caseríu bien fartus. Peru un día  que taban etsus bien fartucus de vinín de Cangas, el  que yera más echau palante ya farfantón dixu-me,  primu: güei pu la nueti na más que espaches el ganau, vamus a salire a tumar algu pur Cangas, merendá-mus bien  ya espués vamus a ir a un bar de rapazas. You díxitses: aiquí nun hay desu oh.

Ya etsus, escapau cuntestá-nun: si oh, nun va habé-lu. Lu que pasa ía que tú nun lu sabes primu.  You catsei la bouca ya dixe: bonu, bonu, lu que vos digáis. Pu la nueite na más que espachei you las vacas, lus gochus ya las pitas, tsavei-me un poucu lus baxus, lus subacones ya lus pías, ya  púxe-me la faragacha tsímpia. Cuchí-mus el autulodre que traían etsus, ya tous  pa Cangas.

Na más chegar tumamus primeiru unus chanqueirus nu Chicote  ya nu Mureno ya espués fuimos a merendar al Mulinón. Cuandu terminamos yeran casi las doce de la nueite. Astoncias lus madrileñus estus de mierda dixé-nun: agora vamus a tsevar al primu a tumar una copa onde las rapazas ten cun pouca roupa. You cuntestei-tses: astoncias tindremus que dir a Málaga pu lu menus, que ía ou fairá calor nestas fechas. Etsus ríianse ya dixe-nun: monta rapaz que nun te’nteras de lu que tienes al lau de la tua casina.

You ya taba un poucu chispu de lus chupitus d´orujo que tumara, peru  di-me cuenta que pasamos por delantre del  cunventu de Corias, ya dixe you pa mí. Estus merdeirus ou me tsevarán. Cuandu quise da-me cuenta taba-mus cerca de Pilutuertu, ya pará-nun delantre dun chigre que tinía muitas tsuces de culores ya un rétulu culurau. Etsus dicían-me; Jasusín güei vas a glachare  cuandu veas a las rusas esas de casi dous metrus de tsargas ya blanquinas cumu’l tseite cunas tetonas al aire. You catsaba la bouca en aspera de ver lu que pasaba.

Unu detsus dicía que cunecía al encargau dese sitiu ya que íbamos a ser bien ricibius. Na más entrar taba aquetsu chenu de xente hasta lus topes ya había una fumareda dientru cumu si mesmamente, tuvieran cavandu burrones atsí mesmu.

Na más arrimá-nus a la barra acercouse-nus una rapazona negra  tan tsarga cumu una zreizal ya díxu-nus: ¿qué vais a echar guapus? You dixe-tse que un tintu. Ya etsa entrou-tse  la risa ya cuntestou-me que atsí nun se servía vinu, que esu yera pa lus chigres. Astoncias dixe que quiría un curtau. Etsa vulviu a riíse tuvía más ya dixu: ou sacasteis a este aldeanu oh. Paré de Atapuerca. You catsei la bouca.

 Astoncias lus madrileñus pregunta-nun pul que etsus dicían que cunecian ya dixérun-tses, que nun taba que fora de viaxe (taría na cárcel; siguru). Estas pelandras al ver que cunucían al pelgar del encargau dixérun-tses que asperaran un pouquinín que iban a vinire unas rapazas nuevas de lu mijurcitu que tinían nu lucal pa nos. Unu de lus madrileñus inflaba el peitu cumu lus gatsones anantias de cantare ya dixu-me: Jasusín , güei vas a sabere lu que ía bono. Riniegu lus demonios si nun ía virdá..

Pur fin, escuitá-nun lu que dicía aquetsa moza ya pa mi pidiénun-me un cubalibre de ron Negrita ya pa etsus vozka cun naranxa, ya Ginger ale cun whisky. Al mumentu apaeciu un cachu xamascu de paisana cumu un freisnu de tsarga, peru de blanca nada, yera negrona ya cun unas ubres cumu la mía Cachorra. Etsus, lus cabrones,   embriscánunme-la pa min, ya etsa al mumentu quitou-me la gorra ya nun paraba de subá-me la calva ya casi meté-me manu a la bragueta.     

Astoncias you musquie-me un poucu ya dixe-tse que tinía que dir al retrete  purque taba algu fartu ya paecía que quiría gumitar. Yera mintira, peru foi la única manera de tsibrá-me de aquel xamascón negro cumu lus subacus dun beitsouru.

Astoncias you fíxe-me que salía pal retrete, ya fuxí escapau pa la carretera. Tuve atsí durante un gran ratau tumandu’l frescu. Cuando vulví, vi a unu de lus madrileñus tou envilurtau cunu xamascón aquel. You al ve-me ya  tsibre amiraba pa etsa ya insiguida di-me cuenta que tinía na gorxa una nuez cumu una pataca de grande. Nesi mumentu pinsei: estu nun ía una muchere, siguru que ía un home, un travesti desus que hay pu las Canarias ya pur muitus sitius más, peru que tienen unas tetas de miedu. El tolo de lus madriles taba tou embelesau pur cumpletu cun aquel buxarrón ya decíame: Jasusín, a ver si aprendes, la vida hay que vivi-la. Ya you dicía pa mious adientrus: sí, sí; buena va si nun se tuerce. Cumu sigas asina van puné-te el oxal bonu rapaz. Mi alma cumu te cuecha bien esti cachu anemal nun te sientas en quince días. Ya asina foi. You tuve que asperar muitu ratu que estus listus salie-nan de lus reservaus de cun aquetsas pelandronas,  ya cuandu vulvie-nun you taba na carretera sintau nu petril , muitu bien al frescu asperandu. Na más que chega-nun, di-me cuenta que vinían cuepus ya muitu serius sin faer broma nenguna. You catsei la bouca toul ratu mientras fuimos pal pueblu, yal outru día al ir al chigre a xugar la brisca espués de xantar, unu detsus, el del xamascón,  nun se sentou. Cuandu tse mandá-nun lus paisanus mious sentá-se dixu que durmiera mal ya que nun tinía ganas de xugar.

 Parta-me un rayu que en quince días nun vulviu a pegar las pusaderas al banquetu. Cúmu tse deixarian el oxal, probe rapaz. You riía-me ya farfotsaba pa min: ya esu que you yera el tontu’l pueblu. ¡Muitu me rií destus listus de lus madriles!

Pasaus unus días, las mucheres  priguntaban-me con sorna: ¿que tal te foi Jasusín cu nus primus madrileñus? Cumu te xuntes muitu cun etsus, van a echá-te a pirder. Ya you contestaba-tses: muitu bien, muitu bien;  peru que vus lu cuenten etsus que lu saben mexor que you.  Tamién debu decí-vus, que you de primu, poucu…,  solu pariente; ya ía abondu. Lus primus, miánicas  fue-nun etsus.

“Jesusín”, el pelgar