¡RINIEGU’L DIABLU! ¡NUN CUCHÍ OUTRA VE LAS PAPERAS, OH!

Abondo sei que andáis chamandu-me fulgazán ya floxu a cada poucu, ya tinéis razón de sobra, home. Purque ía virdá. Fai muitu tiempu que nun andu garabatiandu aiquí neste blog;  peru nun ía purque nun m’esfaute fae-lu, non;   ía debiu a que andu un poucu refistulau esta tempurada purque ripitiénun-me outra ve las  paperas, home. Toi que me tsievan lus diantres estus tiempos purque nun tsevantu la quilina.  Miánicas nun salgu duna metu-me noutra. Fai poucu cuchí la tos firina, ya agora cun esta,  ía  la segunda vez que cuechu las paperas en menus de un anu. Ya pur si fora poucu, esta vez dienun-me  de tan mal xeitu, que tuvienun-me amuzargau ya estramazau nu camastru más de duas simanas tsargas, ya cuandu cheguei a querer tsevantá-me ya puné-me dereitu un ratau, nun pudía ni dar un pasu. Nun cheguei ni a la sulana siquiera. Escapau tuve que turnar mediu arrastru pal cubil purque andaba tou escarrancau, debiu a la fardelada que tsevaba entre lus cadriles pula hinchazón. Agora baxou-me un poucu l’anflamación aquetsa de lus dimonius, peru estus días d’atrás tuvía tinía un par de vixirigas que dios nus tsibre;  miánicas paecía que tuviera herniau de lus dous tsaus.

La Rulindes la condenada, afugaba-se toda de la risa que tse entraba, ya faía unus axagüeirus que dios nus tsibre  na más que me agüechaba pal  fondu la bandouga. Ya pur si fora poucu cuna hinchazón del demoniu, tamién tuve muita calentura. Cúmu siría que pu las nueites sudaba nu camastru cumu si fora un gurín. Espertaba a las tantas  empapau de sudore que   miánicas paecía un pitu muchau ricién sacau del regueiru.Ya espueis de tou este belén de las paperas que, amás d’hinchá-me lu outru muitu, tamién me pusienun el gurgüelu cumu un truébanu,  debu datse las gracias a la gufanda que me fixu la Rulindes que la probe nun sabe teixer tuvía muitu, peru  empeñouse en faceme-la, ya fixume-la cumu pudu. Ya miánicas foi la que me sacou de pelancus. Lu pior de tou ía que saliu-tse abondu tsarga. Cúmu siría que tandu estirazada chégame hasta lus pias. Más que gufanda paré una tsuria de ata’l carru la ceba u la cincha p’aparexar el pullín. Etsa di que tsievan-se asina, ya que  debu puné-la bien enruscada al piscuezu ya lu que sobre que lu deixe de culgadixu;  peru pae-me que m’afuega muitu,  purque na más puné-la notu gafedá ya  nun paru d’aflanar.

Esta rapazaca quier que you faiga lu mesmu que fae  etsa cuandu ta mala, que ía a minudu purque etsa cueche la gripe a cada poucu; casi tous lus anus. Ya tientse manu abondo purque enruinez muitu;  ponse-tse la carucha toda tsarizuda ya pálida cumu el tseite cuatsau. Paré un esculanciu la probe, ya esu que anda bien amantetsada cunus faragachus esus que fae etsa mesma, ya diz que la calore ía la mexor melecina que hai para quitar  la fiebre escapau. Etsa, aparte de entotsá-se  de roupa hasta más nun puder, tamién toma muitus caldos de pita cun untu ranciu a esgaya, xuntu cun  muitus yerbaxus estrañus que cueche pul monte.

La Rulindes di que esus mexunxes que etsa pripara son manu santa pa la calentura ya pa tou. Espueis que lus tsapa, hai rataus que ponense-tse lus papietsus del caretsón arroixaus cumu si lus tuviera mitius  nu fornu del pan. Peru you anque nun creu en nada de tou esu, faigu muitas cousas de las que etsa mi recumienda, anque paezcan de xirigonza. Un día mandou-me miter las partes, que tinía entotsadas pu la fiebre, a remoxo en augua tibia fervida cun uriéganu ya cun tarrietsos, un buen ratau anantias de mité-me nu cubil. Ya pur si estu fora poucu, tamién fixu-me durmire pu las nueites cunu capuchu de tsana puestu na cabeza pa que nun cutsera friu. El casu ía que  cun tous estus rumedius caseirus, sudei tou lu que quise ya pusienunse-me lus vixirigus tous rivichius de mité-lus tantu tiempu n’augua caliente, peru  pu las mañenas, ya bien ceu, atoupába-me  muitu mexor.

El casu ía que tous estus días d’atrás la Rulindes, la probe, taba muitu priucupada pur min, casi  cumu si fora mia mai, ya tou yera purque you enruiniciera muitu, pur esu a cada poucu asumaba pur mia casa pa agüechar cúmu taba. Dixu que tinía pouca roupa nu camastru ya truxu-me etsa de sua casa un cubertor  de tsana buenísimu, lu pior yera que  pesaba cumul fierru, peru abrigar, abrigaba muitu. Ya you encantau de la vida purque, esta rapazaca ía mandona ya rabilera abondo, peru dame muita parpayuela ya cumu ta siempre alietsa, entretiene-me tou lu que quier, ya más. L’outru día truxu cun etsa a una  prima  que ta casada pal riu del Coutu, ya esta rapaza taba pa parir dun mumentu pa outru, purque  ya saliera de cuentas faía unus cuantus días, ya cumu el 25 foi tsuna tsena pinsaba que diva parir astoncias mesmu. Peru cumu nun pariu, taba un poucu trespeitada  purque dicía que tinía  muita barriga. De mumentu nun sabe si tien unu u dous. Tampoucu quier sabere si ía nenu u nena hasta que nazca. La Rulindes pa estas cousas de las parideiras tien unas cousas muitu extrañas. Etsa diz que cuandu la mucher que ta pa parir  tien la barriga tsevantada, asina esquitona ya picuda, astoncias ía nena; peru si la tien redundina,  baixa ya esculgazada,  astoncias ía nenu. Tamién  diz que estu nun chanfla nunca. Ya tsevará  razón abondu. Etsa sabrá bien lu que farfotsa.

Esta Rulindes ía un poucu bruxa ya tsuniega, cumu tamién lu foi sua buela. You sei cousas detsa que casi nun si crein güei día. Fixai-vus cumu sirá esta rapazaca de meiga  que cuandu tien el mes nun se tsava  la testa purque tien tserza  a que tse entre diblidá nu celebru ya vulvé-se tsouca,  u de cucher tuberculosis. Esu dicíatse-lu la sua güela, que  yera una bona peirona tamién. Aquetsa mucherona viecha, cuandu yera xoven nunca xamás, ningún home vicinu, ni de la sua mesma casa, tse pudu agüechar  ni las bragas ni lus pañus  hixiénicus, aquetsus de felpa que había anantias de apaecer las cumpresas estas d’agora.

Aquetsa mucher tindía toda la roupa de la xente de casa nus varales de la  currada, nus gamachus de la sebes, u  nus pegotsus ya nu corredor de l’horriu, peru las bragas inxamás tse las viu naide ¿Ou las tindiría la condenada? A lu mexor nun las gastaba. Sabría dios. Tampoucu amasaba la furnada si tinía el mes, purque dicía que tandu asina, la masa nun tseldaba del tou ya que nun crecían las fugazas. Pois la nieta, a pesar de lu xoven que tuvía ía,  fae casi lu mesmu que aquetsa candonga de mucherona misteriosa ya  bruxona.

Neste mumentu pae-me que ya  suena riburdiar y’astrueldar  la Rulindes cunas madreñas pul estroucasa,  ya si me agüecha asina tsevantau, mediu desnudu en purricas, cuna faragacha de durmire sola, regáñame. Val-me más mité-me nu camastru escapau pa puder tornar algu la calentura. Nun tengu outru rumediu purque  ya escumienza a dame muitas vueltas la testa. Nun lu paparéis  peru fai un muntón de tiempu que nun baixu a la Vitsa a nada, nin andu de folixa pu lus chigres; toi aiquí mitiu na patsera, día ya nueite, purque dame vergoña chapinar pur Cangas ya que las mucheres me agüechen pa la bandouga ya me noten lu abultadas que tengu las partes baixas. Tsevu sin echar un vasín pur Cangas más de dous simanas pu lu menus,  ya más de tres tamién. Pal sábadu de Ramus, sí baxarei sí. Home non, tsounón. Ya cun esu alón, rapaces.

“Jesusín”, el pelgar