DEL CARNEIRU, A LUS CANAPÉS

Anantias, fai apenas un ratacu, escumenzou a nublase’l sol ya estroldar  de tal xeitu que mitía pánicu, bien paecía que chegaba’l fin del mundu; peru non, al poucu ya taba la tona encima xarreandu augua a caldeiraus que dios nus tsibre. You cuchí algu de tserza  ya sintei-me aiquí nu pizón del carru baxu’l hórreu,  mientras rumiaba  la capietsa duna fugaza pan  que tuvía taba calentina, asina ricién sacada del fornu, cunun cachucu tsinguaniza encima, ya nesi mesmu mumentu chegou la Rulindes toda esnalazada, mediu atsoucada, cunus gadechus tous esnizaus sin pasá-tses siquiera’l  escarpizu, y’aflanandu que s’afogaba de tantu naspiar desde’l estaxu de la fonte’l Malvís que ta tsonxe hasta aiquí, pur tiner muitu noxu a la turmenta ya  tamién pa farfutsá-me al uyíu  que sigún escuitara etsa esta mañena, tandu asperandu na Caxa d’Aforros, paré qu’este anu lus rapaces del cunvento lus flairones,  quieren faer la folixa de setiembre nel  Parador de Corias.

 You cumu taba aiquí mediu escarqueixau entre las talangueiras  ya lus estadueñus del carru, al uyir estu que me suplou na urecha la Rulindes, tsevantei-me, puxe-me dereitu y'alietsu ya  parei de mazcar el cantrochu'l pan. Espués de pinsar un poucu sobre lu que esta cundenada me dixu, cuntestei-tse  que  taba bien cavilau esu, oh. Nun sei lus cuartus que tses custará tou esi xareu, peru si poden pagá-lu  faen muitu bien. Tsou, pinsei que tamién siría purque inda quedá-nun bien fartus del grasún de carneiru viechu, tsenu de sebu ya de tsana, que tses indilgá-nun el anu pasau na budega esa de las Barzaniellas.

Ya tses dixe you noutra ucasión a estus rapazones  de Corias, que lus carneirus que etsus ya etsas cumienun el anu pasau, vilus you baxar ataus nu remolque del tractor d’un rapaz  de La Nisal, que fixu la mili onde you, unus días anantias de la fulixa. Aquetsus carneirones yeran tan viechus que apenas pudían ya muntar a las ouvechas. Bastaba  agüecha-tses un poucu pa las curnales que tinían, ya pa la fardela que  tsevaban culgandu mediu arrastru entre las patas  d’tras, cun esu ya se tse quitaban  a unu d’afeitu la gulisma  de querer cumer curdeiru. Minudu gulor que darían esus carneirus, ya pur si fora poucu taban tous chenus de cazaratas ya de pegotsus engaramichaus na tsana.

Aquetsus anemalones, según yeran de grandones,  tendrían que puné-lus al sirenu una semana anantias pa quitá-tses el tseirún ya puné-lus a  cucer na otsa al tsume cumu poucu ende la víspora,  pa tsou puder hincá-tses un poucu lus caniles,  pu lu duras y’antutsadas que tarían  las frebas. Ya p’ancima cheirarían a sebu ya cabrún que tumbarían p’atrás. Pur esu este anu  querrán prubar outras cousas novas más mudernas. Aiquí nu parador este, siguru que tses gustan más lus firuletes que tses pongan cun muitu adornu ya muitas muxigangas, peru siguru que salen d’atsí con bona fame. 

You, ya fai muitus anus, tuve nuna boda nus madriles nun hutel de muitu pustín ya salí d’atsí cun muita más fame que cuandu entrei. Miánicas, a  estus rapaces pode pasá-tses lu mesmu. Si foran outrus tiempus, cuandu taba la Casa La Chata u Casa Galdina, astoncias pudían chenar bien la bandouga cun bucadillus si la xanta del parador yera floxa, peru agora tendrán que cunfurmá-se cunu que tses pongan ya catsar la bouca.

Falandu de tou un poucu, nestus mesmus mumentus acabu d’uyir cantar nel estaxu nuesu, onde ta la pacha del centenu nu cortinal, a un falpayar. Outrus anus pur xuliu y’agostu nun catsaban a cada poucu cantandu: fal-pa-yar, fal-pa-yar,... Ya agora ya apenas nin se oyen ni se agüechan  paixarus destus migratorius, que noutrus tsaus  chaman-tses cudurnices. Estus paixarus  son cumu putsinas piquenas pardas, ya  cuandu salen del nial cumu lus pitinus piquinacus,  ya chapinan  pur entre lus riegus del trigu ya del centenu cumu cintellas;  nun hai manera de cutsé-lus. Anu tras anu, tou va a menus; chamus tou a pirder, peru hai que acetá-lu asina cumu bien. Home non, tsounón.

Ya cun esu alón, rapaces.

“Jesusín”, el pelgar