BRUXERÍAS DEL ANU NOVU

Na mía casa  nestus días de  Navidá miesmamente, cuandu tába-mus tous, siempre tiníamus muitas xirigonzas entre nos purque nuesa mai yera, ya ía tuvía, muitu criyente de bruxerías ya tuladas. La nuesa güela pur parte materna, la que foi ama de cría nus Madriles, de xoven tuviera un muntón de anus trabachandu n’Argentina yal Uruguay, subre tou de duméstica nas casas de la xente que taba podre de cuartus. Ya fui-tse  bien  pur aquetsus pagus, peru vulviu p’acó  cun un feixe de rimilgus  destus rarus mitius  na cachola que nun hubu forma nunca de sacátse-lus. Lu pior de tou ía que todas esas manías pasoutse-las a mía mai que  tamién tien el mesmu defeuto; ya cun esu alon.

Ya lu pior de tou ía que esta muchere cun estas cousas de las bruxas tseva-las a raxatabla ya nun pudé-mus faer xeitu cun etsa. Estu que voi cuntare ía una cousa que güei las mucheres chaman-tse  machismu purque fora entamada ya trabachada pu lus homes pa dat-ses mala fama a etsas, ya decire que las mucheres son tan malas cumu’l rinubeiru pu las nueites.

Sigún farfutsaba la nuesa güela, n’Argentina el día de anu novu, entre la xente pupular de lus suburbius paré que tinian la crencia que pa tiner bona suerte nu anu que escumenzaba,  tinían que cumpli-se algunus ritus cumu, que la primeira pirsona que agüeches esa mañena bien ceu, tien que ser un home. La xente de la casa nun val. Si en vez de un home agüechas a una muchere: mala cousa; tas pirdiu. Esu yera un cuentu más de lus que fixé-nun lus homes para faer creer que el home ta feitu de mexor xéneru que la muchere, pur esu etsas dan noxu ya tserza a tous lus que las agüechan esa mañena del día de San Manulu.

Dibiu a esta burricada sin sintiu, mía mai el día de anu novu andaba esqueicida na más tsevantá-se del cubil bien ceu, pinsandu  lu que agúecharía al salir pal camín. Nun quiría asumá-se a lus ventanus pur tserza a vere una muchere. Mientras taba na cucina prindiendu la tsariega, punía muitu uyíu a las pisadas de lus que chapinaban  pul camín ya cuandu uyía unas madreñonas ramplas sunare muitu más que las outras, camín abaxu, asumaba’l caretsón pul corredor supuniendu que yera un home. Algunas veces salia-tse bien la xugada, peru outras non. Si agüechaba un home que pasara nese mumentu  pul camín, astoncias esnalazába-se toda ya chamá-nus a glachius cumu si hubiera fou na casa, pa tsevantá-nus ya sacá-nus de lus camastrus a tous pa que viera-mus al home.

La mañena de Anu Novu, si nun nus tsevantaban bien ceu del camastru, escapau  nutaba-mus que mía mai taba cuepa ya amurniada, nun yera pur nada raru. Simplemente yera que se atoupara cun una muchere, nel tsugar de un home.

Lu pior de toda esta munxerga de bruxerías yera que en cuantu mía mai tinía algún trastazu u percance, pur casa u pu la corte del ganau, escumenzaba a decire picaus ya etsá-tse la culpa a la muchere que agüechara al risca’l día ya chamaba-tse piltrazu, xostra ya dimoniu.

Las mucheres de mía casa siempre fuenun muitu dibitsidas ya tuvie-nun chena la testa destas burricadas ya tuladas propias de las  bruxas. A min dába-me muita rabia uyilas, peru tinía que catsar la bouca. Peru miesmamiente, yuo de piquenu cuandu me faian lus mious cousas que nun me gustaban u nu me daban lu que tses pidía, cuchía lus paraguas ya abríatse-lus dientru de  casa. Na más da-se cuenta salian chapinandu a tou miter tras de mí, chamándu-me esgraciau diablecu u melandrín, ya cuandu me alcanzaban fartában-me a xustradas ya murradas. Peru you, al mumentu, vulvía a faetse-lu outra vez, asina hasta que mía  mai,  que yera la más gafa,   cuchía la currea de  miou pai de cuandu tuviera na mili, ya pigába-me cuna parte de la hibicha hasta que me salian  unus runchones pu la testa ya pul tsombu, comu si foran  tsinguanizas ricién feitas.

Outra cousa que a mia mai la esqueicía muitu yera que you canturrexara nu camastru pu las mañenas n’ayunas. Etsa falaba que esu solu lu faian lus tontus dafeitu u lus antroirus, ya na más que lu uyía cuchía la guichada ya fartaba-me a barganazus. Peru espués de mazar un bon ratu sobre’l camastru, daba-tse cuenta de que taba vareixandu l’almohada tapada cunus sabanietsus ya lus cubertores, purque you taba fora del cubil debaixu’l camastru riventandu de risa. Astoncias a etsa dába-tse tamién  la risa,  ya you nesi mumentu, apruveitaba pa fuxir a tou miter pal camín ya nun vulvía hasta pasau un bon ratau pa que mía mai tse pasara’l refistulau que cuchiera.

“Jesusín”, el pelgar