PARULAS CUN XEITO: GÜEI EL ESCULANCIU

Nun sei you purque sal a retsucir estu güei, peru voi decí-vus que de piquenu alcuerdu-me que na más chegar el mes de xunio, pur San Xuan, cuandu escumincipiaban  a gadañá-se las poulas de sicanu,   nus campitinus agüechaban-se muitus  esculancius. Estus probes bichus que tienen xeitu de tsumbrices gordas de culore marrón, cumu mueven-se selequinamente pul suelu,  pur esu apaicián a minudu pul mediu’l marallu la yerba curtaus a la metá pu la gadaña u enredaus nus dientes del engazu al datse la vuelta a la yerba. Miánicas, daba-tse a unu pena el ve-lus riturcíenduse cumu vilortas na más curtá-lus en dous u tres cachus. Haber habia-lus a esgaya, peru you  tardei tiempu en da-me cuenta  que tinían na parte traseira cumu  dous patinas  piquenacas mediu atrufiadas, que las tsevan arrastru cumu si tses hubiera dau netsas un paralís. You anque siempre tses tuve muitu ripilu ya noxu a tous estus bichus: cumu son las culuebras ya lus chagartus, peru cun estus esculancius nun me daban tanta tserza ya alguna vez que outra chegaba a cutsé-lus cuna manu ya nutába-tses  que tinian el cuerpu duru cumu’n murrietsu.

Pur esu a veces cuandu nus puníamos a meixar un rabañau de esculinus  al fuxir de l’ascuela, asina amaturrius tous a la paré u a dalgún bardal, había unu que falaba-nus a glatsius: ¡nenus!, sacai tous el esculanciu pa fora  ya estirazai-lu bien a ver cuál ía el que lu tien más tsargu. Él, agüechaba toda la arridondada  ya escapau farfutsaba: el esculanciu  más medrau de tous ía el miou. Ya yera verdá. Minuda pielga que tsevaba culgandu aquel rapacín;  miánicas paecía una tsinguaniza ricién feita,  bien nidia, ya sin tar nada ribichida.

Nu pueblu nuesu tamién tse chamaba-mus esculanciu a lus rapazacus piquenus  que yeran tsargus  ya flacus; subre tou a las nenacas que sulian tar  esblanquiñadas cumu las petsas de la manteiga u del tseite firiu pa fae’l queixu. A la que tse tucaba este nome, nun tse gustaba nada que tse lu chamaran non,  purque faía de reir a tou dios al uyí-lu.

El nome verdadeiru desta tsagarta cun xeitu de culuebra  en castechanu ía Eslizón yal nome científicu ía ”Chalcides striatus”. Peru a mín gusta-me muitu más la parula de Esculanciu. Home, ou va parar. A las rapacinas estas piquenacas que tinían cara de fame purque yeran malas cumedoras, la sua  mai sulía dicí-tses: a munina, ta punienduse-te cara de esculanciu;  paré que nun te fartaran na tua casa ya que  durmieras meixada todas las nueites. Cumu nun comas caldu ya toucín marietsu  pa mexorar algu, mi alma veis  murrer de deblidá.

El mayestru  nuesu, que viniera de fora, tinía una subrina que tse chamába-mus la gatina purque yera ruxina, ruxina muitu guapa, ya falaba muitu espacín. Casi nun se la uyía. Más que falar paecía que miagaba cumu lus gatus esus  que cuenta’l Prior que vei pur León nus paseus esus que fai pur las mañenas cuandu sal  de casa al riscá'l día, casi de nueite. Pois a esta rapazuca chamábamus-tse tamién: bilaxa ya esculanciu pu lu esmirriada que yera. Peru a etsa nun tse paicía mal del tou, purque nu fondu daba-se cuenta que a nos, a lus nenus piquenus cumu etsa, gustábanus muitu pu lu melindrosa  que yera, ya pu lus güechus cardosus-azulaus tan guapus que tinía. Yeran lu mesmu que lus duna gatina siamesa.

 Pasaus lus anus esta nena fixu-se una xatona que manda madre,  ya tien muitu rixu ya xeitu pa tou lu que fae. Lu pior ía que casuo-se cunun quilicas de home que nun val pa nada; na más que pa folgar ya pa fae-tse nenus. Pur esta fema, a la que chamaba-mus “la gatina”, quedou-me a min bona pena pur etsa, cunu dibitsida que yera. Peru que tse vamus a faer,  nun pudu ser ya cun esu alon.

El outru día cuandu tseí esu que cuntou’l Prior de lus sous paseus ya lu del gatu, dixe you pa min: tien güevus la cousa. Tsevantá-se del cubil agora nu hiviernu sin nicesidá alguna; cunu calentín que ta unu nu nial, cumu pa puné-se a chapinar cun toda la xelada. Hai que tar bien tsoucu pa fae-lu. Miánicas que sí. Ya dixe you: si toda esa xente que ta tan de sobra  tuviera que mucir una ducena de vacas tous lus días pur ubligación, na más tsevantá-se, nun tses iban a quedar muitas ganas de andare fayendu’l espantapáxarus  espaparotaus  pula vera’l camín al amanecere. Este rapazón que tse chamáis el Prior, paé-me que tien xixa  ya que siendu de pueblu cumu ía, nun sei cumu tse daría  agora pur faer estas cousas. You a veces piensu-lu: tous estus homes ya mucheres de pueblu, na más que van pa las capetales vuelven-se mediu tolos;  da-tses pur andar a lu tontu  chapinandu pur entre lus autolodres que paecen pullinus aflanandu cuandu tsevan lus xerones  abondu cargaus. Esta xente pinsará que pur andar al trote van vulvé-se cumu cuandu yeran nenus. Tan apañaus etsus. Cumu nun tses dé un turzón un día, tuvía van tiniendu suerte. Peru anantias u espués, esu será lu que tses tucará. Taban bien trabachandu algu, tou ese rabañau de fulgazanes.

“Jesusín”, el pelgar