TOUS P’AL ACEBO

                                  ( Foto tomada de :http://www.minube.com)

Este anu cumu tsieva chuviendu  tantísimu tiempu a caldeiraus, asina cumu si fixera una muntunera de anus que nun caía una pinga d'augua, tan lus praus tous nun chamazal. Lus mious del ríu tuve las vacas atsí l’outra simana ya deixanunme-lu tou afracau cumu si fora un patacal ricién tsabrau. Pur esu agora cambiei-las pa las poulas que tiné-mus cerca del rebotsal, ou ta la cabanona, que atsí cumu ía un parandanal ya cuestu cumu’l tseironal, el tirrenu ta más ricudio ya tamién  t’al tapín bastante más entotsau,  ya cun esu  nun si espetan  tantu las patas del ganau na pación.

Cuandu tsievu  las vacas pa estas  poulas, faigu-lu  ceu  pu la mañena, ya pu la tardiquina en cuantu tsourienzo deixa de asuma’l fucicu pul tesu la xanzaina, baixan etsas  solas pa casa cunu perru  muitu bien sin tiner que dir you pa nada al prau. Peru loutru día apaicienun las vacas nu purtón del curral  solas, yal perru nun vinía cun etsas. Extrañou-me muitu purque el Canelu ía un perrón muito facindiegu que nun deixa las vacas solas pur nada. Asperei un ratau, ya cumu nun apaecía pur atsí, cumu si lu cumiera el sumiciu, acerquei-me a cai la Rulindes pa intrugá-tse si lu agüechara etsa pul pueblu, u pu la currada, peru esta mucheraca nun taba na casa la cundenada; ya díxu-me la sua mai que agora baixaba dous u tres veces pur simana a la Vitsa, xuntu con outras peironas tan buenas cumu etsa, a faer  una muxiganga de ginasia que creu que  espurren-se ya revuelcan-se pul suelu cumu fae el pullín miou cuandu gana la cebada, ya esas munxergas todas chaman-tses algu asina cumu pilatus, peru nun me faigáis muitu casu purque you pa estu de lus nomes  nun m’alcuerdu al ratau de uyí-lus.

Outra vez que tamién faltou el Canelu de casa, luegu alcuntramus-lu pasaus unus cuantus días cerca de La Nisal tou tsarizudu ya arrabuñau que fora engulismau itrás duna  perraca piquena que andaba caliente. Nel mumentu que  taba you cabilandu ou taría el can,  apaeciu el rapazón  de lus piensus runfandu cunu camionetu chenu hasta lus topes de sacus de farina, ya intruguei-tse si pur casualidá agüechara pula carretera al miou perru. De mumentu quedouse  cuepu el cundenau, peru al poucu ratu díxu-me que quiría ricurdar que  sí, que  agüechara faía poucu a un perrón marietsu que taba enganchau a una perra mastina delantre de Casa’l  Coxu de Bornazal, peru espuies tamién se trupezara cun outru perru subiendu p’al Acebo, peru que nun se fixara nu culor. You cunu que me dixu este fandoscu foi abondu. Nun fixe más que datse las gracias ya  fuxír a tou miter  pa casa pa cucher el trator ya acercá-me a pul perru pa trae-lu cuantu anantias pa casa.

Y'asina foi. Tandu a mediu camín  pinsei que pudía pasá-me primeiru pul Acebo pa intrugá-tses aquetsa xente si andaba pur atsí el miou can ya dipasu echaba un vasín u dous;  ya si nun taba,  espués runfaba pa Bornazal.  Primeiru priguntei nu chigre del Marruncín, el que ta dientru de lu qui ía el santuariu, y'apenas me fixé-nun casu. Espués acerquei-me al outru chigre, al de Ríos, ya atsí taba la nena sola;  Jusé taba pa Cangas, peru esta rapazaca díxu-me lu mesmo que el de lus piensus, que pur Bornazal tsevaba  ya unus días un perrón grande  cun carrancas al piscuezu  que andaba toul día cheirandu itrás duna perra mastina que yera  de lus pueblus d’abaixu. Puxe-me cuntentu, al sabere pur ou chapinaba el miou Canelu ya mandei-tse a esta rapaza que me echara un vasín de vinu. Etsa foi a la barrica a la bodega ya truxu  la xarra chena cunu  cachu al tsau ya un taruquín de queixu d’afuega’l pitu pa faer boca. Na más que prubei lus primeirus papaus de vinín, esta rapaza  priguntou-me si you nun yera unu de lus  que querían faer  fulixa atsí pa últimus de abril u primeirus de mayu. You cuntestei-tse que nun sabía nada. Astoncias  dixu-me etsa que’l outru día tuvieran atsí unus homes intrugandu al sou pai que querían faer una  comilona pa una muntunera de xente  que tuvienan tous cunus flairones de Corias, purque nesta ucasión tamién iba tar cun etsus un flaire muitu empurtante, que agora ya nun yera cura.  You quedei apavuriau del tou ya cuntestei-tse: mira munina, you nun sei nada de nada de lu que me falas. Purque outras veces garabatean algu  nu  Blog ese de Corias pa picá-me, peru agora toi pez del tou. Tamién ía culpa mía purque siguru que fartarian-se de chamá-me, ya  abondu lu fixe-nun las outras veces, peru estus rapaces tienen que cumprender que you nun puedu faer lu mesmu que faen etsus. Etsus tan tous ritiraus ya cun bonas pinsiones;  nun ía cumu you que si quieru cumer un cantrochu pan cun toucín  tengu que tar toul día itrás del rabu las vacas. Outru amiente, nesta ocasión   prestaria-me tar al pia d’etsus un ratau. A tou estu, si faes el favor di-tse  a tou pai cuandu venga que’l día que faigan la fulixa toda esta rapazada aiquí, que me chame, que si tengu you el ganau pur aiquí cirquina,  pula poula la cabanona, acercu-me cunu trator nun ratau a tumar café cun etsus. Anque, miánicas, cumu toi tan esgurrumbao ya feitu un podricu,  nun sei si me cunecerá alguno detsus. Tous non, peru lus de lus anus primeirus del cunventu , sí me cunecen sí. Deixu-vus hasta outru ratau que marchu a pul Canelu a Bornazal, anantias que se faiga de nueite, que si ta muitu tiempu sueltu pur atsí  nun deixa una perra sin enganchar en toul vatse. Ya cun esu alón, rapaces

“Jesusín”, el pelgar