FRANCOS, PUXÍSTIMI- LU A GÜEVU

EL GATSÓN DE LAS PITAS

En mía casa sempre tuvimos un rabaño pitas nu curral ya había-las de tous lus culores: roxas, blancas, cardosas, marietsas,  batarasas ya negras. Cando yeran tuvía potsas que cumenzaban a escarbar  nun se sabía bien la clas que yeran peru, sigún crecían ya las xebrába-mus cada una pul culor de las plumas. Na primavera, allá pul mes de mayu,  cuandu dalguna pita viecha taba chueza puniamus-tse una ducena de guviquinus ya asperába-mus a que lus  gurara. Tardaban en salir lus pitinus del cascarón unus  ventiún días. La pita candu ta chueza, si nun se tse ponen güevus pa gurar, cunvien mete-la baxu na cesta pa que tse pase prontu la chucez u calentura. Algunus culócan-tse una pluma atravesada pu lus furacus de la nariz qui tien encima‘l picu. Peru estu ía una cafrada, nun debe faé-se.

Lus pitinus recién salius del cascarón son muitu guapus, da gustu velus. La mayuría detsos son de culor marietsu. Candu lus cueches na manu, miánicas paré que cuchiste una bolina d’algudón. Lus güevus de las pitas pa que valgan pa gurar tienen que tar  gatseaus  purque de lu contrariu, si tan güerus,  nun valen pa sacar  lus pitus.

Las pitas de curral sempre tienen cun etsas un gatsón ou dos pa que las gatsee. El gatsón ia un poucu cumu los mouros purque tien muitas mucheres, ya todas le parecen poucas. Lu chucante del casu ia que atiénde-las a todas, ya etsas nun se celan unas doutras. Al cuntrario, tsévan-tse muitu bien entre etsas. Algunos gatsones nun solo las atienden sino que tiénelas esqueicidas  de tar tou‘l día acabatso d’etsas. El gatso  cada ve que se baxa dencima la pita  pega un sutrumiu ya sacúdese el cabronazu cumu si tuviera perlesía, peru ia de lu cuntentu que queda espués de gatsea-la. Yal mumentu a pur outra pita asina hasta que nun queda una sin gatsear en tou el capuneiru. A veces las pitas tienen la testa  toda pelada  ya culurada, ya ía de tantus picutazos cumu les da el gatsón pa sujeta-las mientras ta acabatsu   detsas pa que nun se le fuxan.

You de piquenu gustábame muitu ver al gatso puné-se enriba de las pitas. Nal gunus tsugares  cháman-le a esu pisalas. Agora voy deci-vus cumu fae el gatso pa camelar  a las pitas. Cumienza a segui-las baxandu un ala hasta qui la punta toca’l suelu, ya corre detrás de la pita que tse gusta a carreirinas pequenas fayéndu-le cerca del uyíu: cococó, cococó, cocococó, hasta que la pita se queda pousada quieta cumu un queisietsu ya el outru curtexador apruveita  pa pune-se acabatso detsa. En cousa de segundus dexa-la espachada pa un ratucu solu, purque al mumento vuelve a pur etsa outra vez, ya outra , ya outra, ya asina hasta que se cansa. Algunas pitas corren todas esnalazadas na más que lu ven venir cunu ala gacha. Siguru que las pitas tan farfochando entre etsas mismas: aiquí ta outra vez este desgraciau que nun se ve fartu, ojalá se le seque el pizarrín pa sempre. Falando de seca-se, tengu que decir que espués de farta-me de amirar pa  lus gatsos candu gatsean a las pitas nunca pude ve-les la ferramienta a lus gatsones.  Deben de ser muitu vergoñosos purque guardan-la al instante. Sigún se baxan de encima la pita ya la tienen recutsida entre las plumas. Aquetso ía vistu ya nun vistu. You nunca se la ví a ninguno detsos, ya pare-me que voy queda-me cunas ganas de vetse-la.

Lus gatsones candu aparez  alguien novo pul curral adelántan-tse etsos a las pitas  ya inflan la gorxa cumu diciendu: estas pitas son mías; aiquí en todas éstas mandu you, nun tienes nada que faer, asi que vete fora daiquí.

 Las pitas cando acaban de pousar un güevo nu nial cantan ya creu que lu faen cun parulas reivindicativas ya feministas pa queixa-se. La tsetra diz asina: “tantu puner p’andar descalza, tantu puner p’andar descalza,…” Yal gatsón cuntesta-tses: “ya te cumpararei unas alpargatinas, ya te cumprarei unas alpargatinas…” hasta que la pita catsa. Lu curiosu del casu ia que esu mesmu díse-lu a todas las pitas del curral ya todas tan cunformes ya cuntentas. Ya pudían ser asina las mucheres qui nun hay dios quien tses dé gusto, faigas lu qui faigas. Ya esu siendu una sola. Tábamus aviaus lus homes si tuviéramos que acarrexar cunun muntón de mucheres cumu fai el gatsón cunas pitas.

Pur estus pagos nuesus dícin-tse  muitas supersticiones de lus gatsos. El gatso cumienza a cantare sobre las cincu de la mañena, ya esu ía lu bono qui lu faiga durante la manecere. Candu lu fae a deshora, pul día,  dice-se que esu  ía mala cousa . Tamién dicen que algunus gatsus durante la sua vida ponen un güevu piquenu ya esu tien muy mala sombra. Outra cousa mala, ía candu d’alguna pita intenta cantar cumu el gatso. Nalgunas casas na más que pasa estu, retuercen-tse el piscuezu al mumentu a la pita que lu fae. Serán tunterias de la xente, qui nun hay que fae-les casu ¡Ya cun esu alón! Pa güei ya ta bien ho.

"Jesusín", el pelgar