LUS TUMATES DE BIBIANA

You cuandu yera piquenacu, vamus cuasi un nenín de teta, yera muitu rabiosu ya berrón. Mía madre seique pasou-las cumigo muitu gordas. Custou-tse más cria-me a mí solu, que a tuda l’harmanda xuntus. Según dicía mía  madre, pasába-me lus días anterus berrando ya espatarexandu de la mañena a la nueite. Prubablemente fora debiu a que me dulía la bandouga ya las tripas muitu ya  de seguiu; pur esu nun había dios quien m’aguantara. Cúmu sería, que mía madre taba cunvencida de que you taba embruxau. Más duna vez quixu tsevá-me a un cura muy famusu que dicían que sacaba lus demonios del cuerpu a lus puseidos, peru había que pidítsi-lu cumu muitu favor pus, nun siendu casus muy graves cumu el de la guaxa de la película “El Exorcista”, nun quiría faé-lu nurmalmente. Mía madre ya se habia enterau del cura que  lu faía ya donde vivía esti home  pus taba cunvencida del tou que you  taba puseídu por o demo, ya  que’l  único xeito de sacáme-lu del cuerpu, ya de  calma-me un poucu, yera tsevándu-me al exorcista. Pero este ritu solu lu faía un curón en tou el cuncexu. Mia madre taba tan segura de que you tenía dientru el demonio purque algunas veces, cuandu ya nun sabía que faer cumigu señalába-me un santu que tinía el calandariu que había culgau de la paré de la cucina y’astoncias, na más que amiraba pa él, you catsaba la bouca un poucu. Esto diule a etsa la seguridad de que tinía dientru algún espíritu malignu. Que taba embruxau, embruxau.

Lus outrus curones del cuncechu  nun taban autorizaus a exorcizar purque nun sabían u nun quirian; pus la Ilesia  nun admitía de bon xeito la pusibilidá de  que el diablu chegara a meté-se nel cuerpu d’un nenu pequenu ya inucente. Miou padre dicía que esu yeran tou tuntadas ya burricadas que  se le mitían na  testa  a mia madre. Pur él, pudía berrar ya churar tou lu qui quisiera ya más. Nun me faía casu ningunu. Sulía decire: déxalu que berre hasta que se esgace, cuandu se farte ya catsará. Cuántu más chore menus mexa. Peru you nun tinía discansu,   fartába-me de churar ya de espatarexar, ya escagazábame tou muitas veces al día;  había días qui pudía tar chorandu horas ya horas sin parar un mumentu. Mía madre taba tsouca, ya disesperada cun ganas de fuxir de la veira mía.

L’únicu que m’apaciguaba un poucu yera nel branu ir pa la güerta ya si había tumates entamaba a cumer netsus cumu si tuviera muertu fame, peru yera l’únicu xeito de que catsara. Cumu cumía tomates a esgaya cun el sulfatu encima ya tou,  taba casi sempre escagazau ya mía madre cumu nun daba abasto a tsabar la roupa, pa quien nun anduviera cuna butsa atrás muitu tiempu, quitába-me lus pantalones ya lus calzuncillus ya you andaba pur entre las tomateras valeiru de roupa  de mediu cuerpu pa embaxu.

 Asina, si taba muitu esfueirau ya tinía un turzón nun había prublema ninguno, faíalu na misma tierra  ya de pasu acuitába-la. A mía madre nun había cousa que le diera más repilu que vé-me andar desnudu con la pilila al aire. Nun tse gustaba non.  Anque na quetsos anus yera normal el andar asina entre lus guaxes piquenacus aitsí nu puelu. Sobre tou lus nenus;  las nenas yera más  raru velas enseñandu el culu ya la quilica. Cumu dixe anantias a mía madre nun tse gustaba nada  esu de veme andar desnudo, ya tinía razón. Peru viendu que yera la única manera de dar abasto cuna roupa, ya de paso que tuviera susegau ya tranquilu, tinía  que faer de tripas curazón p’acetalu y’aguanta-se. Si tendría razón mía madre que un día tandu na huerta sin lus pantalones, picou-me una briespa na pilila ya púsume-la que paicía una murciecha de gorda. Lus outrus rapacinus reventaban de risa al véme-la, ya you tamién me reía. Peru duróu-me  pouco’l tombu; al cabo de duas u tres horas ya taba outra vez toda ribichida ya piquinina cumu antes.

Una tardiquina de branu que faía una calmacía ya gafedá sufucantse  taba you insoportable ya mía madre ya nun sabía que faer cumigu. La probe mucher taba esqueicida. Menus mal que cerquina de nuesa casa vivia una mucher muitu viechina qui si chamaba Bibiana ya you faía-le muita gracia cumu nenu piquenu, ya etsa sempre partsaba cumigu ya preguntába-me cousas. Esta bona mucher agüechandu que mía madre taba a puntu de fende-me la cabeza cun un estadueñu, acercou-se  a nuesa casa ya chevóu-me cun etsa, mediu engatusau, pa la sua. Na más chegar  sentámu-nus nel picu de la  sua escalera ya pa cuntentá-me trúxu-me un tumate grandón maduru ya encarnau muitu guapu de la güerta. You al ver aquel tumate tan gordu ya tan nidiu pasou-me tou’l berrinche ya escapau escumencei  a murdisquia-lu ya esbitsar  nel  cumu si fixeran  dous u tres días qui nun probara bocau. Al mumento ya taba contentu ya riéndu-me. Etsa, la mucherina aquetsa,  disfrutaba cumigo ya reíasi muitu.

 Mia madre al endilga-me, echaba las manus a la testa ya farfotsaba entre caniles: este cabrón de guaxe cunu berrinche qui tinía fai un ratuco  ya míralu agora tan cuntentu. Sin asperar más voy tiner que tsevalu a que le saquen los demos de dientru, sino toi perdida cun este diablecu. La vicina diciatse  qui nun yera pa tantu, qui nun faía falta, que you era un nenu muitu guapu ya graciosu, peru cun muita mala tseite.

Pasaus lus anus candu chegou la hora d’entrar en Corias dixu mía madre: ¡home, mira que a puntu!, tantu que dicen que lus flaires de Corias son  tan certerus pa educar a estus potros mediu endemoniaus, a ver si tienen lu que  hay que tener pa saca-le a este cundenao el embruxamientu yal trasnu de dientru ya endereza-lu un poucu. Luegu, pasaus lus anus, you nun sei si lus echei  fora de mí u tuvía lus tengu dientro. Seguro nun toi tsibre detsus tuvía, purque hai días que miánimas, toi que me tsevan los diantres, nun m’aguantu ni you solu. Ya encima tiner que aguantar a las mucheres de casa qui nun catsan la bouca en tol día , ya si fora poucu cun etsas, tamién lus subrinacus qui nun paran un mumentu de faer diabluras  ya enredos. Miánicas que la nuesa casa paré-se  más a La Cadillada cuandu taba chena de tsoucus,  que  a una casa de xente nurmal.