LUS MELAXUS DEL PESCADEIRU

Na mía casina, cumu de piquenus yéramus aquetsa  perrada d’harmanus, ya miou pai yera un bon fulgazán que  arrimaba poucu'l  tsombu, na más quiría tar tou’l día nu chigre tsapandu vinu, a nos nun nus subraban muitas  cousas non;  subre tou, de las de tsamber. Cumer, cumia-mus hasta fartá-nus tous lus días, esu sí. Peru tous lus días yera  lu mesmu: pote de berzas que mia mai faia-lu nuna otsa grande que paecía una duerna, ya chenaba-la bien cun patacas abondu, echaba-tse un brazau  berzas, una muzada fabas, una riestra chinguaniza, murciecha, algún tarucu que outru de tsacón ya buenus cachus de zarráu u de toucín marietsu que gulía a caldu ende’l cabeiru’l pueblu; nos lus rapazacus tábamus abondu fartus de xantar tous lus días lu mesmu ya cuandu chegaban parientes u xente d’outrus tsugares que xantaban na nuesa casa, astoncias mía mai faía algu difrente. Si yera pula tarde amañaba feixuelus cun zúquiri pur riba ya una escudietsa de tseite cun achicoria pa etsus, ya pa nos tseite solu.

Cuandu chegaba algún furasteiru a la nuesa casa, nuesa mai la probe víase negra p’axeitar las cousas que taba fayendu ya pa que chegaran enteras ya cun algu de xeitu a la mesa; si entamaba feixuelos tinía que escundé-lus purque nos na más gulé-lus na sartén ya escumenzaba-mus a estroldar, dar mazaculas ya curcobus pul estroucasa, lu mesmu que fain  lus xatinus de piquenus cuando fuxen de la corte pal prau. Si atoupaba-mus lus feixuelus onde lus mitiera la nuesa mai,  escumenzaba-mus a esbichar netsus  cumu‘l tsobo,  hasta que nun quedaban más que cuatru penderexus tous espeltrazaus cumu culgadixus. Mia mai cun nos pasou-las negras. Lus feixuelus tien-lus escundiu hasta baxu’l muntón del cuitu mitius dientru duna otsa pa que nun diera-mus cun etsus. Un día punxu-lus na ripisa’l ventanu la cucina pa que enfriaran un poucu ya lus gatus tsevanun-tse unus poucus ya etsa pinsou que fora you. Chamou-me escapau: Jasusín ven acó,  ya intrugou-me pu lus feixuelus, que ou taban. You cuntestei-tse que nun sabía, ya nesi mumentu mitiu-me una bona xustradas en tou’l caretsón ya unus tirones d’ourechas que pur pouco me las arrinca. Alcuerdu-me bien que tinía la xente asperandu na sulana muertus de fame, tous cuna gulisma de lus feixuelus calentinus, yal platu taba casi tsimpiu. Aquetsa xente tuvienun que asperar un ratau bonu hasta que la probe mucher pudo faer más. Mía mai, lus feixuelos failus muitu bien. Cumu pa tsambé-se lus didus. Lu pior ía que agora ta poucu na casa. La metá‘l anu pasa-la nus madriles cuna sua afichada.

Outra cousa que nus faía medrar una cuarta a lus nenus  yera cuandu apaecía pul pueblu  un humecón que subía espacín pul emplunu carreiru de las furmigas, poucu a poucu , cunu pullín viechu albardau, tou chenu de cazaratas ya mataduras,  cargau cun duas caxas de sardinas encima. Ese día lus rapazacus  ya tinia-mus xareu. El home si chuvía, averiaba-se  debaxu’l nuesu hórreu pa abetsuga-tse, ya  nos chapinába-mus a tou miter pa tar al sou tsau na más que lu agüechába-mus. Anque aquel home puniase tou tsarizudu ya refistulau na más agüechá-nus purque nun tse gustaba muitu que  anduviera-mus pur alredor del pullín purque sabía que tse faia-mus picias pa que el burru escumenzara a coucear ya tsevantar las ferraduras pa mientras nos espatarrá-nus de risa cumu la ve qu’el pullín espantouse  y’alventou las caxas las sardinas pul aire. El home yera cachazudu  ya tinía muita paciencia cun nos. Él  cuchía la rumana ya según pidian las mucheres iba pesandu-tses puñaducus d’aquechus melaxus de pexe mientras farfutsaba pu lu baixu: estas peltrazus de mucheres nun gastan un rial;  las cundenadas nun faen más que rimungar ya dicire  que la sardinas tseiran cumu  pudricus. Etsas sí que cheiran.  D'algunas valia-tses más tsavucá-se  más a minudu  lu que etsas saben.

Las mucheres tinían razón abondu. Lus melaxus de pexe aquetsus, que traía aquel home cheiraban cumu si foran una murrina. Peru a nos, outru amiente,  lu que más nus prestaba yera aquetsa gatafueira de gatus que traía el paisanu itrás d’él pul tou’l pueblu alantre, engulismaus pul gulor del pexe. Lus mixinus aquetsus taban tous alredor miagandu cumu si foran ánimas del purgatoriu en pena,  pa que el pescadeiru tses tirara algún tripaxu  u d’alguna sardina que tuviera estrapatsada. Esti home cuando ameraba pa lus gatus que taban tous cunu rabu alietsu ya tiesu p’arriba cumu si fora una vela, ríasi ya farfutsaba-nus al uyíu a nos que lus gatus tinían lus mesmus diblidades que lus homes ya que  nun taban atsí pur el gulor de sardinas solu, que tamién acudian p’andar pur entre lus pías de las mucheres ya depasu puder mité-tses el rabu pur debaixu las sayas  que yera lu que más tses gustaba. A nos faia-nus muita gracia aquetsas burricadas  que falaba el pescadeiru ya faiamus-tse ripitinus-lu a cada poucu. A las mucheres mal rayu me parta la gracia que tses faía, peru  nun catsaban la bouca, non; dician-tse al pescadeiru de tou: que yera un  tulondru ya un viechu puteirón dexenerau d'afeitu, que nus echaba a perder a lus rapacinus. Ya nos de tantu riínus, asumaban-nus hasta lus mucarrius pu la napia. Ya cun esu alon, rapaces.

“Jesusín”, el pelgar