“JASUSÍN” YAL ESQUISTU

La nueite pasada miti-me nu cubil un poucu cuntentu ya las tantas, purque ayer pu la tardequina chegou un primu de la Rulindes que ía melitar ya ta en San Javier en Murcia,  ya truxu una culambre de vinu tintu de Jumilla que, fienda-me  un rayu si nun  queima  nun candil si  tse dan fou. Miánicas tendrá 15 gradus cumu poucu. Na  más tsapar lus primeirus papadinus del cachu  entra-tse a unu  una calore pu la gorxa p'abaixu que paré que fierves pur dientru. El casu ía que xuntámu-nus na cucina  la Rulindes una muntunera de xente que dios nus tsibre, ya pa rematá-la  sacou esta rapaza las fichuelas ya lus feisuelus, que  tinía-lus ricién feitus, ya aquetsu foi un filandón con bon xareu, muitu mechor que outras veces; cuandu quiximos axeitar un poucu l’asuntu p’aveirá-nus pal cubil ya deitá-nus duna vez,  yeran más de las duas de la mañena ya p’ancima tábamus bien chenus tous.

El casu ía que you a  altas horas de la nueite, cuandu  ya escumincipiaban  a cacarexar lus gatsus, espertei asina simanimás  tou esnalazau ya escaldeirau ya cuandu cavilei un poucu di-me cuenta que yera pul estrueldu tan grande que se uyía na nuesa corte. Nuna d'estas tsevantei-me dun blincu ya agarrei el primer faragachu que atoupei a manu ya baxei a tou miter pal curral. Baxaba pinsandu que siría  la nuvilla que sultara  el rechu que la ata al peselbe, purque esta vaca duerme atada pa que nun se amarre cunas outras. La cundenada ta toul día turriandu. Peru non, nun yera esu. Lus estrueldus vinían de la corte peru yera la Cachorra que taba pariendu ya cumu la cría yera culona,  la probe vaca  custaba-tse  muitu esfuerzo el parir ya punía-se de pía pa  chapinar  pu la corte d’acó p’acutsó sin parar, ya turriandu'l bacitu l'augua sin parar  que yera lu que estroldaba.

Nos na corte de las vacas estus días  nun tinemus tsuz elétrica que queimanun-se lus plomus  fai poucu;  tengu que nun ratau puné-me cun etsus;  nu currietsu lus gochus sí la hai,   ya pu las nueites cuando tine-mus que baxar a faer algu a la corte, tsevamus cun nos un candil de carburu u farol  que atsume bien. Traigu estu aiquí a cuentu purque cuandu you yera un murriacu,  agüechaba-se a muita xente pul camín nas nueites del utueno ya hivernu chapinandu cunu farol d’aceite na manu. L’aceite ía un dicir, purque el que chaba-mus al farol yera el que taba ya negru del tou requeimau, fartu de freir cousas, que nun valía pa nada, peru asina ya tou l’aceite afurraba-se muitu ya subraba pouca. Muita xente tuvía taba acostumbrada a pasar fame cumu nus tiempus del racionamientu que nus daban poucas cousas ya cuntadas. Nos en casa,  faiamus casi tou’l anu el pote ya lus fritus cunas untazas de la  manteiga del  gochu dirritida. Pa queimar nu farol había outra cousa que se chamaba  esquistu que yeran lus recuelus del pitróleu. Yera  malo abondu,  solu valía pa achumar, asina gulía a dimonius aquetxa puxarda, ya p'ancima mientras queimaba sultaba muitu fumu. Cumu gulieras aquetsu muitu ratu, espués  dulíate la testa que paecía que se te tsevantaba la capietsa’l celebru.

Agora, nestus tiempos mudernus, ya nun se agüecha a naide pulus carreirus de lus pueblus cunu farol u candil na manu. Tan solu cuando chega esa tuntiría pul mes de nuviembre del Halloween, onde lus rapacinus andan cunus calabazones cun velas dientru. Astoncias alcuerdu-me d’aquetsus anus  cuando andaban las viechas nu hivernu todas amaturridas ya tapadas cunus mantietsus negrus  de tsana pul camín cunu candil u farol na manu. Miánicas si te alcuntrabas cun alguna detsas pulus calechones estreitus,  entrábate tal tserza que escumenzabas a puné-te tsarizudu ya ritsare lus caniles que dios nus tsibre. Cumu si agüecharas al tsobo. Aquetsa viechas, miánicas paecian las mesmas  ánimas del purgatoriu en pena.

Nos agora el farol tinemus-lu tou esfarrapau ya abotsau del tou de  caenus al suelu muitas veces ya tamién de datses nus bréfites a las vacas cuandu nun tan quietas pa muñí-las u nun paran de escurnixar las peselberas. Cumu agora ya nun hai esquistu, al farol puximus-tse un vela, peru da lu mesmu,  nun atsumaba casi nada. Loutru sábadu cuandu baxei a Cangas cumprei una linternina piquena muitu guapa, que tsieva muitas bumbillucas desas blanquinas  que tses chaman leds. El casu ía que atsuma una txuz clara muitu bona ya cumu ocupa poucu, axeita-me cumu dios pa guarda-la nu bolsu. You nicisitu-la muitu, subre tou  pa volver del chigre  pu las nueites que, anque chegue un poucu atsumau, nun me sobra nada, ya tamién pa atsumá-tse a la Rulindes  si tien que ir pula nueite  al hórreu que chama-me  ya you voy detrás detsa cumun curdeiru purque cuandu ta arriba de las escaleras, nu curredor, tien que dublá-se pa miter la chave na pechadura, astoncias you atsumu-tse bien pa debaixu las sayas y'agüechu-tse lus cadriles hasta rriba. Etsa, debe  da-se cuenta de sobra, peru nun gurguta ni parula la muy xustrona; fai-se que aflana pulu cuesta que ta l'ascalera peru  catsa la bouca cumu una afugada.

Esta demoniu de rapaza tien muita custume de andar na nueite a uscuras pul camín cumu si fora la rapiega. Hai veces que nun la agüechas hasta que  te atoupas cun etsa de fucicus. Esu ía lu que etsa quier. Una de las mucheres viechas del pueblu, que tuvu muitus anus pa la Argentina, diz que ta feita una bona atorranta. Ya que anda asina, casi a tientas pula  nueite, pa alcuntrá-se cun algún rapazón  que la abarque bien ya la rebinque bien rebincada. Ya sirá verdá. El casu ía que cumigu nun quier sabere nada del asuntu la cundenada. Na más fae que partsar muitu ya de vez en cuandu da-me algunus garfaus d’ablanas u castañas. 

Pae-me a min que tendrei que axeitá-me un pocu más el tipu pa ser más paraxismeiru, ya baxar más a minudu  a la Vitsa pu las nueites, pa ver si alcuentru alguna peirona u xustrón del tiempo miou, desas que tan la nueti entera pu lus pubs esus, pa ver si puedu curtexar algu. Purque cumu siga asina la cousa muitu tiempu más, miánicas va ulvidase-me hasta cúmu se fae.

Ya cun esu alon, rapaces.

“Jesusín” el Pelgar