XUEGUS DE NENUS, O INSTINTU BÁSICU

Güei voi cuntá-vus algu qui you prisenciei ya mantengu vivu dientru de la mía testa desde que yera bien piquenu, ya  anque sei  que muitus de vos diréis: ¡este home ta cumu’n maniegu furau!,  nun cuenta más que burricadas; ía cumu mexar fora del tiestu, ya bien fora. Peru a pesar de tou lu que vais a farfotsar,  voi cuntavus-lu.

You siendu un nenacu piquenu, casi un murriacu, ricuerdu  que nu miou puelu pu la nueite, sobre tou nu branu, xuntábamus-nus lus nenus ya las  nenas pa xugar cerquina de la ilesia nuna currada grandona ou había  sitiu a esgaya pa dar buenus curcobus, pa esfuciná-nus bien cuandu nus amarrába-mus, ya pa tsevar bonas tsumbeiradas faciendu-nus unus a outrus la trangadicha. Ya pa currer detrás de las guajas. A la escuela naquetsus anus íbamos xebraus, unus de lus outrus: lus nenus pa un tsugar ya las outras, las nenas,  pa outru. Naquetsus tiempos  xuntetas de nenus ya nenas na escuela había poucas, nun yera cumu pasa agora. Nus ricreus tinia-mus que enredar cumu dicía el caricato aragonés Fernando Esteso: lus nenus con lus nenus ya las nenas cunas nenas. Ni xuntus ni revueltus.

Nestoncias pa entretené-se nus ratus que andába-mus de subraus sueltus pul  puelu, sobre tou pu la tardiquina hasta que chegaba la nueite nu branu, lus únicus xuegus que tiníamus, lu mesmu pa lus nenus que pa las nenas, yeran lus que salían de la nuexa imaxinación más tres u  cuatro cousas ancestrales heredadas de los antepasaus nuesus, cumu yeran  la potsa ciega, el burru, la una anda la mula, faer que guiabas un autolodre pul camín …etc., ya poucu más. La guajas tinían pul estilu: el cascayu, la raya, la comba, las escundietsas, la potsa ciega…, más u menus  cumu nos lus guajes.

Peru de xugar a estas cousas fartábamus-nus escapau. Nestoncias yera cuando escumenzaba a furrular na nuesa chola la picardía o instinto básicu. Cumu taba-mus a diariu agüechandu cumu faian lus animales pa reproducí-se, nos de forma instintiva, quería-mus imitá-lus ya faer lu mesmo que etsus, peru pur simple xuegu. Nos, lus nenus, en cuantu pudia-mus,  prupuniamus-tses a las guajas xugar a vacas ya touros (nas capitales dicían-tse a lus médicus ya enfermeras, peru yera lu mesmitu que lu nuesu). Algunas d’etsas acetaban al mumentu ya daban saltiquinus de lu cuntentas que se punían ya farfuchaban entre risas: sí, sí, xugá-mus a esu cumu fixí-mus loutru día nu parreiru del tíu Antón.

 Peru tamién había outras que turcían el fucicu ya dicían que etsas a esas guchadas nun xugaban cun nos. Quiá, ni pa dios. Había-las necias cumu mulas, ya  tou lu que guliera a esas cousas del ganau nun quirian sabere nada de nada. Las que nun quirían taban bien alietsadas ya riprendidas  pu las suas mais pa que nun se dexaran engatusar pur nos lus rapacinus que yera-mus algu más gandulacus ya más  picardiosus. A pesar de que yéramus tous unus cativus tuvía, peru las rapacinas taban más amaliciadas pu las madres pa que foran priparánduse ya guardandu-se pa cuando chegaran a faese mucheres.

Estus xuegus picardiosos ya eróticus que nos entamába-mus en cuantu pudía-mus, nun yeran más que’l instintu básicu que espertaba en nos  pa intentar faer cunas nenas  lu mesmu que agüechábamus a minudu cuando el touru muntaba a la vaca u el burrón a la gocha.

Lus guajes na escuela siguru que nun puníamos la mesma atención pa lus llibrus, pero pa  estas outras cousas tábamus bien alietsus. Aprendiamus-lu  escapau. El instintu de perpetuá-se  cheva-se  nus xenes. Menus mal que lu nuesu yeran simples fantasías infantiles, que respondían a incipientes impulsos hormonales naturales, peru sin cunsecuencia alguna. Anque hubo casus  en que, pa ser unus merdeirus piquenus, casi pasanun  de intentus chegandu pur poucu a feitus.

Ricuerdu que una tardiquina de branu, yera casi de nueti, ya tábamus un rabañu de gatafueira piquena, de nenus ya nenas tous xuntus,  xugandu  nun parreiru a las escunderietsas ya reblincandu dipasu entre la yerba cunas  nenacas. Algunas de las rapacinas nun tses gustaba muitu tar nu parreiru purque dicían que luego  picábatses muito la quíscara al metese-tses la argana yal polvo de la yerba pur dientru, entre la roupa. Peru pa xugar nun había outru rumedio que catsar la boca ya rascá-se cuandu t’escucía.

Sigún tábamus enredandu tous muitu cuntentus ya amaturradinus xuntus cunas guajas cumu faen las uvechas cuandu moscan, ya nuna destas agüechá-mus cúmu unu de lus rapazucus mayores fuxía pa la currada xuntu a una guaja piquena sin gurgutar ni parula.

Pasau un ratucu tsargu,  nutamus que tardaban demasiau en turnar. Al echá-lus de menus, diximus: ¿ou irían estus dous merdeirus?, vamus a buscá-lus. Ya salí-mus hasta’l prau pa agüechar ou taban. Amiramus pul tou’l prau ya nada, hasta que al chegar a detrás duna facina de pacha  atoupámus-lus atsí tumbaus na yerba, yal rapazucu taba enriba de la guaja emburriandu cumu si fora el burrón, encima de la gocha. Miánicas que  cuandu chegá-mus nos, ya tinía arrancaus varius turrones ya un muntón de tierra ya piedras detrás de lus pías  de tantu afitar pa puder emburriar ya puxar. Etsa, la guaja,  cumu yera más piquena que él nun dicía ni faía nada, peru el puxador, anque yera piquenu,  se ve que pusu tantu empeñu nel asuntu que escarbou tou’l suelu cunus pias, cumu si tuvieran atsí un rabañu gochus fuzandu, de la  fuerza que fixera.

Al chegar nos xuntu a etsus el rapacín parou  de emburriar ya de espatarexar. A la guaja, que yera más piquena que’l, diutse muita vergüenza ya fuxiu de onde nos prau abaxu, toda esnalazada ya berrandu cunas bragas pu la rudichas, cumu si agüechara a lus tsobus. Lu pior de tou foi cuandu, al tsevantá-se el nenu diu-se cuenta de que tenía tou  esgazau un chanclo. El rapazacu, anque yera piquenacu, paré que fixera tou lu que pudiera pa intentar afuracar a la probe guaja, peru sin conseguí-lu.

Cuandu el burrón se susegou ya se apaciguou  un poucu,  viu cumu tinía el chanclu tou rotu, ya nestoncias escumenzou a renegar  de la guaja ya hasta de lus mesmus demonios, purque  entroutse muitu mieu pinsandu  qué sería del  cuandu la madre le agüechara‘l chanclu.

Lus chanclus yeran nuevus, casi de’strena recién cumpraus, ya cumu  la madre yera más gafa que’l  xabaril, el rapacín a pisar de ser un senvergunzacu desalertau pa lus poucus anus que tinía,  nun tse cabía la tserza nu cuerpu pinsandu que tse iba a partir la crisma la fiera de la madre. Al fenal tsibrou este diablecu de nenu, ya anque chevou unas bonas murradas, peru salvou que sua mai nunca supu cumu fixera pa esgazar d’aquetsa manera’l dichosu chanclu nuevu. Si lu chega a sabere, miánicas lu capa u tse arrinca la cuca.

Tamién direi que estus xuegus infantiles ya picardiosus,  nel fondu yeran inucentes, purque  faíamus-lus tous lus guajes a minudu nus puelus, peru cumu nun sabía-mus la verdá del intríngulis,  nun pasaba de ser tou una pantumina que cunsistía en xuntar un pouquinín las mixaderas  de lus unus cunas de las outras. Estu, ía tou pa güei, muninus. Ya cun esu alon.

"Jesusín", el pelgar