¡TOI AIQUÍ RAPACES!

You atsouquezcu del tou cun vusotrus muninus. Minuda gulisma que vus entrou dun tiempu p’acó pur sabere quien ía “Jesusín” el Pelgar. Pois el Pelgar seiquisí,  ía un malandrín cangués cun muitus anus encima que pasou pul cunventu de Corias naquetsus anus  cumu muitus de vos ya que lu cunecéis abondu, subre tou lus más viechus.  Ya las rapazonas esas que garabatean aiquí nu blog, tamién tan fartas de velu pur Cangas, subre tou lus sábadus.

 Fai poucu tuve que baixar  you una timpurada siguida  cunu zaratosu’l pullín ya lus bidones del tseite todas las mañenas pa repartir pulas casas,  ya  nuna ucasión atoupei-me a una destas rapazonas aveirada al Chicote falandu cun outra. Pae-me que salía de cumprar peixe d’enfrente.  La cundenada amirou pa mi fixamente, cumu si quisiera echá-me el mal del güechu encima, peru nun caíu del tou quien yera you ya iba amerandu pa tras a cada poucu, pu la calle Rastraculus pa baixu  cumu’l perru mal almurzau. Naquel mumentu tampoucu caí you quien yera etsa,  peru na más que di dous zancazus pa lantre vienu-me a la miente ya dixe: ía fulana. Ya, pur ciertu,  vaya bien tratada que la alcuntrei la cundenada; nótase-tse bien  quel home tien buenus cuartus, que ta feita una bona xamona. Buenu, lu mesmu que yera de xoven.

Nestus días de las Pascuas, anque vus paezca mintira,  baixu poucu a la Vitsa purque tamus cunu belén del samartinu y’andamus desurdiendu las tripas ya adubandu el mundungu pa faer las tsinguanizas ya las murcichas,  ya cun esu  las mucheres nun me deixan en toul día pa chevá-tses las bacitas a la fonte ya pa tar dandu-tse sin parar al rabil de la picadora la carne. Tiné-mus que aproveitar estus días de xelada,  anantias que se ponga el tiempu d’albadiu. Tamién tuve que puné-tse una tarrancha a una de las bacitas de la carne, que findiera toda dun tsau, yal maseiru tamién pinga un poucu pul fracu que tien. You mientras dura tou esti xareu de la matanza toi cumu dios, purque fartu-me bien tulus días. Loutru día sin ir mas lexus, cuandu partimos el gochu ya puximus lus toucinus ya lus xamones na sal, priparou la mai de la Rulindes unas patacas cun fégadu encebutsau  que taban cumu pa retsambé-se lus didus. Ya pa ditrás unus feletes de lomo desus blanquinus tiernus cumu l’aspuma, feitus na sartén cun  muitu perexil. Tsou, de tsambeu las fichuelas ya vinin caliente cun zuruque. You chenar chenei bien la bandouga, cúmu siría que pasei-me la tarde entera tumbau nu parreiru pa baixar  la fartura que tinía. Ya las mucheres cumu tsoucas agüechandu pa tous lus tsaus a ver pa ou afuxera you. Cuandu me vienun dixi-tses que fora a enriar l’augua nu prau, dipasu que baixaba’l pantalón purque taba un poucu esfueirau.

You tous estus días, cumu toi solu entre tantas mucheres, muitas veces  faigu-me’l tontu cumu que toi entreteniu ya nun oigu, peru toi escuitandu tou lu que falan entre etsas, ya miánicas partsan cousas de lus homes que casi me pongu you encarnau. Loutru día mientras amañaban el mundongu dicía una detsas que etsa siempre durmía  cunu camisón hasta lus pías, purqu’el home yera un zarzaleiru ya arrimaba-se muitu a etsa ya qu’el cundenau nun tinía paradeiru cunas manus en toda la nueite. Outra detsas cuntestou-tse  qu’el detsa faía lu mesmu, peru pa cuntentá-lu ya que la deixara en paz,  etsa tinía-tse feitu un ventanucu  nu mediu’l faragachu, a la altura de semexante parte,  pa qu’el home pudiera esqueirar tou lu que d'outramiente quisiera durante la nueite. You taba al tsau d’etsas inflandu las vixirigas de lus gochus ya catsaba la bouca cumu‘n afugau peru, fienda-me un rayu si nun iá virdá que tuve que deixar las vixirigas sin inflar ya afuxir pa la corte a tou miter de la risa que m’entrou al uyir lu del vintanu.

Etsas pensá-nun que you nun uyera nada. Más tses  valiu que fora asina, ya pa mi tamién. Ya cun esu alón rapaces.

“Jesusín”, el Pelgar