EL BRANU TA A PUNTU DE FUXIR

Ah rapaces, sei que muitus de vos intrugasteis  abondu pul pelgar nesta tempurada pasada, peru nun fixe nada purque sigu tandu feitu’n cacharru. Este cadril dereitu téngu-lu entotsau, que apenas puedu muvé-lu, andu cunel arrastru sin pousá-lu cumu si tuviera tulliu. Agora apenas faigu nada na casa: doi-tses de cumer a las vacas, a lus gurinus, a las pitinas ya poucu más. Nun puedu cunu caldeiru la chavaza lus gochus. Toi más tiempu estramazau nu escanu que de pía.

Fai poucu, a primeirus del branu, pur San Xuan, cheganun lus subrinacus de Madrí ya unu detsus, el más piquenu que ía afichau miou, ía algu tsangurdiu ya curtexador, ya cun esu truxu cun él una rapazaca flacucha que paré un bilimbau, peru esta rabilera de mucher vaya arte que tien la cundenada; ía salerosa cumu etsa sola. Entre tous etsus echánun-me una manu pa pañar la yerba que foi cumu si viniera dios a ve-me. La nuviaca esta del subrinu faía-nus la cumida ya cucinaba muitu bien. Fíxu-nus un día unas fabas cun urecha de gochu que taban cumu pa tsamber la escudietsa. Miánicas si nun fora pur esta xente ya la Rulindes que tamién nus echou una manu, tendríamus que deixar nus praus toda la yerba sin gadañar.

Lo pior deste rapazacu subrinu miou, ía que él ya la nuviaca duermen xuntus nu mismu camastru ya pu las nueites nun paran de fuchigar ya reblincar, reniegu’l diablu si  nun paré que tuvieran la zogue; tal ía la xirigonza que amañan toda la nueite, que nun nus deixan pigar güechu a lus demás. You nun sei lu que faerán peru más paré que durmieran nun xergón de fuecha de maiz que nun culchón de tsana. Minudu ruxidoiru en toda la nueti. Hai nueites que tantu me cabrean que tsevantu-me  ya salgu pal estroucasa ya cunas madreñas calzadas encima lus carpinus  andu d’acó p’acutsó, de la sulana al curredor, hasta que me fartu. Astoncianas catsan un poucu lus diablecus estus, peru al ratau ya tamus outra ve lu mesmu. Nun paran de fuchigar, cumu si tuvieran anialaus entre la pacha. Mia mai diz que lus deixe en paz,  purque esu agora fain-lu tous lus rapazucus nuevus ya cunu pirmisu de lus pais. Asina que, a catsar la bouca. El outru  día cuandu tses dixe you que, qué caraxu faían pu las nueites que tantu estrueldu mitian ya cuntestou-me él que yera que la guaxuca esa, que ta marietsa cumu si la gumitara‘l gatu, tinía muitas cusquietsas nus pías ya na barriga ya cuandu él l’afalagaba dábatse la risa ya daba curcobus cumu sifora una xatina nu prau. Riniegu lus demonios lu que hai que uyir;  you atsouquezcu cun estus rapaces, ya cun esu alon. Tamus pirdius cuna xuventú.

Peru voi dicí-vus que anque nun pude apenas agüechar el blog nesta tempurada última,  sei que chegou una rapaza nueva que se chama Maribel. A esta mucher cunozcu-la you. Minuda rapazona repotsuda que taba feita de moza; ya agora supongu que tará lu mesmu. You anque agora toi tou derranau feitun peltrazu, de rapacín tengu beitsau alguna ve cun esta nena nus Nugales candu baxaba-mus al Carmen. Ya paecía una gran rapaza purque you yera un retacu piquenu que nun faía parexa cun etsa nin muitu menus, ya etsa ya l’amiga nun nus  dicían que non cuandu tses pidíamus que  beitsaran una pieza cun nos. El outru que diva cumigu taba más espurriu que you,  paecía un velaxu de lu tsargu que yera; espués tamién tuvo unus anus cunus flairones de Corias. Agora nun sei pur ou andará aquel magüetu.

Tamién sei que esta moza casou-se cunu rapaz de Camposín, Manolo,  que estudiaba muitu bien. Ricuerdu que tandu en  Corias cunus flairones a él ya outru rapacín dienun-tses un diploma ya cuartus en mitálicu pu lu buenus estudiantes que yeran. Taba na Barbería de Oscar un papel pigau na paré cuna riestra de nomes de lus mexores estudiantes de Asturias. El primeiru yera de Cangas de Onís ya lus dous siguientes de Corias. Unu destus yera este rapaz de Camposín, yal outru nun m’alcuerdu quien yera.

Cuandu andu a minudo de pelgar pur Cangas, suplandu algún vinín que outru pul Murenu,  u salgu del Ayuntamientu, quedu-me espaparutau amerandu pa la fachada de lus curredores de madera tan guapus que tien  la casa deste rapaz de Camposín.

Agora, anque nun tengu tiempu de tseer muitu, nutei questa rapaza, Maribel, garabatea muitu bien aiquí nu blog, ya cumu sei que tien bona mimoria de tou lu de Cangas, a ver si s’alcuerda de cuandu tien beitsau de nena alguna ve cumigu. Cumu pista direitse que you baxaba a la Vitsa lus sábados siempre cuna guichada, peru pa beitsar pousába-la  na paré.

Intrúgutse-lu a etsa purque estus outrus rapazones del Blog nun s’alcuerdan nada de quien yera “Jesusín”. Ya lu dixi outras veces, que cun Olguina la de Marcus tamién tengu beitsau de rapacín, antes de que etsa curtexara cun el sou home;  aquel mozu de Salas que yera un gran rapaz, bon depurtista ya bon estudiante;  ya vaya bien que beitsaba esta rapacina,   yera lixera cumu una pionza. Cun Mamen nun pude beitsar purque esta mucina yera muitu guapa ya nun faia casu de los aldeanus que andábamus de madreñas, cuna guichada pu  LaVeiga, rudeaus de xatus ya gurinus.

“Jesusín”, el pelgar