La gata de Rulindes acaba-me cunu cebotsu

Ya outru amiente, ¿qué tal va tou? ¿va-vus bien rapaces? You ya sei que priguntais  abondu pur mí. Tuvía díxume-lu la axagüeirus  de la Rulindes loutru día que taba cuna rapadoira tsimpiandu la masera p’amasar pu la mañena al día siguiente ya acurdou-se que nun deixara  furmientu nenguno  de la furnada pasada,   y’astoncias  acercouse  a la nuesa casa a buscar un garfau. Na mia casa siempre lu hai purque deixamus-lu duna furnada pa outra. Dímus-tse toul que quixu ya etsa afuxiu a tou miter pa la sua casa, ya toda cuntenta. Peru cumu ía tuvía una rapazaca xoven, nun sabe muitu destas cousas. El caso foi que puxu-se a amasar pa faer la furnada  del pan ya cuandu mitiu la petsa de la masa na masera pa que tseldara, al cabu d’una hora, cuando foi a sacá-la quedou trespeitada del tou purque nun subiera nada;  taba la masa cumu la deixara, feita una  rapa.

La probe escumenzou a churar ya nun tinía paradeiru. Espois dun ratau de churamicar, glachar ya esnalaza-se toda, díxutse-lu a una vicina viecha ya etsa cuntestou-tse que: ¡Ay munina! ¿A quién se tse ucurre puné-se a amasar tiniendu la riela? La Rulindes esu enxamás l'uyera ya taba apavuriada del tou la probe. You nun sei bien cúmu terminou tou aquel belén, peru paré-me que la masa de pan  foi entera pa la bacita lus gochus. El casu ía questa rapacina ía salerosa abondu pa tou,  peru estu de amasar nun se tse da nada bien. Ya ía raru purque outru amiente, fae unus rusquillus d’anís  cun nata del tseite de las vacas de casa, que tan pa rechambé-se lus didus.

A esta rabileira de rapazaca lu que tse se da bien abondu  ía toda esa xirigonza de lus teléfanus  móviles, yal Interné ese de lus demonios. Loutru día fartou-se de riir a cuenta mía esta fanduscona. El casu foi que tábamus aiquí debaxu l’hórreu  nuesu, lus tres: un  rapaz de Naviego que ía el que nus trae la farina yal piensu pa lus xatus, la Rulindes ya you. Una ve queste rapazón  baxou lus sacus del camión you quiría tamién piensu pa las potsas nuevas, peru amerou ya amerou pur entre aquetsa muntunera de sacus que atsí  traía, ya nun tse quedaba nenguno. Astoncias el rapaz dixu-me: Jesusín, nun tengas remor nenguno, que na más que chegue al almacén, si tengo atsí alguna bolsa chamu-te cuna guasa escapau. You naquel mumentu nun comprendía nada de lu que me falaba aquel magüetu;  taba atunteciu del tou. Peru nutei que la Rulindes miraba pa outru tsau riendu-se. Al cabu dun ratucu dixe- tse you: oi rapaz, lu que you toi pidiendu-te nun tien guasa nenguna eh. Aiquí u somus homes u tartagueirus ¡Ou vamus a parar! Toi dandu-me cuenta que tienes pouca furmalidá. Pa la próxima, voi tiner que chamar al de Tebongo, cumu sigas asina fayendu’l tolo.

You agüechaba pa unu ya pal outru ya taban lus dous que reventaban de risa. A mí taba dandu-me un poucu de tserza ya puniendu-me tsarizudu purque a la Rulindes faltaba-tse poucu pa mixá-se toda pu las patas abaixu. Yal outru poucu menus. Nastoncias dime cuenta que taban mufansu-se de mi ya que la cousa  vinía pur algu que you nun intindiera por ou yera. Fixe-me que fuxía de atsí, de xuntu a etsus cumu si tuviera enfadau, y’astoncianas acercouse-me la  zalameira la Rulindes ya escumenzou a afalaga-me, ya díxu-me que  esu del guasap nun yera que fixeran guasa de lo que you tses falaba, sino que chamaba-se asina, ya que yera una cousa que tienen agora lus teléfanus móviles mudernus pa comunicá-se unus cun outrus. Nesi mumentu diu-me a mí tamién la risa, peru dixi-tses que taba fartandu-me de uyir a tsangurdius. Que  ya nun quiría piensu, ni farina, ni pulpa, ni nada; que lu recuchiera tou, purque pur  mi, pudía mitetse-lu  pur onde se escumencipian  lus goxus ya lus maniegus.

Ya la xustrona de la Rulindes dixe-tse que cuandu necesitara más furmientu que fora a buscá-lu al Acebo a onde amasa Manín las empanadas ya tous esus tsambeus que fae tan ricus.

El casu ía que cun estu de la “guasa” del demoniu nun rigañei a la Rulindes,   que tinía pinsau fae-lu, ya bien en seriu,   purque una gatina que tien, que agora ta parida ya tsieva cun etsa una cumia de gatachus piquininus que dios nus tsibre, disfíxu-me toul similleru del cebotsu que lu tinía tou naciu muitu guapu. La desgraciada de gata bien a esfueirá-se tous lus días a la nuesa currada ya presta-tse fae-lu na tierra que ta bien sachada ya suelta pa luegu tapá-lu. Pudía dir la condenada a las  touperas que tamién tan bien tsevantadas ya bien fouzadas. Peru pierde cuidadu, que  atsí nun va, no. Miánicas, si la cuechu  escarbandu nu  similleru, avientu-tse un madreñazu que la derranu .

¡Rapaces!, deixu-vus hasta outru ratau muninus, que neste mesmu mumentu, miánicas si nun toi agüechandu pul ventanu la tsariega a la desgraciada  la gatina que ta   outra ve esfueirandu  nu mediu’l cebotso. Ya cun eso alón rapaces.

“Jesusín”, el Pelgar