Esta mañena na más tsevantá-me, sintí-mi esfautau ya puxi-me cuntentu y’alietsu, solu cun tseer lu que me dixu Milio Ramón nu blog, ya agora pu la tardiquina tamién vi que José Manuel diz-me cousas guapas. Pu lu menus sei que tengu quien m’ayude nestu d’enfrentá-me al xabaril del tsombu pintarraxau, purque cada día que pasa tengu-tse más mieu. Minudu enredu me truxu a min esta muchere, la Gúmer. Miánicas
De lu que me ricumienda esti rapaz de la marina, pa tsibrá-me del xabaril esi, gustou-me muitu lu de punetse un cepu o una garduñera grandona p’apañar este anemal. Ya, téngu-lus you na budega de casa, de lus anus que hubu muitus tsobus. Pu lu menus, hai un par detsus que nus las fixera’l ferreiru, bien fortes ya muitu bonos cumu el del ritratu. Lu que pasa ía que tengu mieu nun vaya a caer algunu del puelu primeiru, ya luego me tomen a min pur un tsoucu desus que agora hay pu las capitales ya que lus entendius nesas cousas tses chaman psicópatas. Peru la idega nun ía mala non, ni pa espreciar tampoucu.
Si, Rulindes, la rapaza del bar quisiera culaburar cumigu, pasoutse-me pu la chola’l outru día, que tamién pudíamus echatse nu vasu la cerveza un poucu de esternina de la que tinemus pa lus tsobus. Anque, pa que le fixera efeuto a esti cachu xatu, habría que echatse un bon muntón pois según ía l’animal asina tien que ser la ración. Habría que punetse pu lu menus la lata de echar la farina a la tsabaza de lus gochus chena, peru non nel vasu la cerveza, mexor nuna duerna grande, u na bacita lus gochus.
Tamién pinsei en axustá-lu bien, metetse nu cuerpu tal canguelu que nun tse chegara la ruoupa al piyexu. Debía enterá-me que ía lu que tses da tserza a lus alemanes, y’atacá-lu pur ahí. Nun sei si son superticiosus u non, purque si lu foran esi sería un bon xeitu pa acubardá-lu y’arrincuná-lu. Despois tamién pinsei que, si vineira él solu, al baxase del coche, puníatse un maniegu pu la cabeza ya cun outru que m’ayudara fartaba-mus-lo a estacazus hasta partitse las custietsas. Nesi casu nun hay que dixá-lu ribuxir purque si nun lu rimatu a la primeira, astoncias toi pirdiu, mátame él de un puñetazo. Minudu xabardu ta feitu.
Pinsándu-lu bien creu que ya tengu la solución pa puder echai las zarpas. Necesitu engatusar a la chigrera pa que se ponga de parte mía ya que acete echatse un puñau de polvos de evacuol na cerveza. Asina candu tse entre la floxera mandámus-lu pa la corte a desucoupar ya una ve que te dientru, pichamus las portas ya luegu a uscuras fartámus-lu a guichadazus hasta deixá-lu más mansu que un curdeirín. Ya candu té domau, dicímustse que si vuelve pul puelu que tse faemus cumu a lus gurinus cando son piquenus. Chamamus al capador ya capámus-lu. Diciendu-tse estu ya verás cumu nun tse quedan ganas de vulvere.
A tou estu, la tunanta de la Gúmer nun vulviu a dicí-me nin parula más. Paré que fuxera pa casa’l demoniu. A nueite chamei´la you outra ve pur teléfano, peru tinía el móvil apagau. Esta muchere tien tanta tserza cumu you o más al mata la osa esi que tuvo pur maridu. Pae-me a min que nun se ve tsibre del, ni faciendu-tse la’stética, viendu cumu ía de bravu ya de cilosu ese humecón.
De todas las maneiras tengu que siguir pinsandu cúmu faeréi pa tsibrá-me deste xabaril. Pur si me falla algu de lu que tengu pinsau, tiner repuestu. Si se vus ucurren outras cousas pa espantar a este gurinón, faer el favor de decími-las ¡coño! Tenéis que puné-vus na mía situación. Di virdá, toi muitu apurau.
"Jesusín", el pelgar
No hay comentarios:
Publicar un comentario