La cousa va’n Cangas

Toi muitu agradeciu a tous vusotrus pul intrés que tais tumandu  pa sacá-me de pelancus, ya sobre tou a esus rapaces que me acunsexan muitu bien pa que fuxe adelantre cuneste tsíu  tan cumplicau que tengu agora pur el viaxe de la mía novia.

Milio,  dime que chame al cura del miou puelu pa preguntá-tse qué faigu; ya Galán di-me tou lu cuntrario. La verdá ía que casi voi faetse casu a Galán purque de los de las sayonas you,  fíu-me pouco; tan poucu que diría nada. Ya pancima la Gúmer tamién  ía muitu descreida ya nun ta da cuerdu cun nada destas munxergas de lus curas que ni etsus mesmus las creen. Asina que, pa nun esnalaza-la, faerei  lu que me diga María la amiga mía que ía una muchere  lista ya sensata pa tou, ya pa estus  asuntus d’amoríus, que son un poucu delicaus, más.

Anantias, apenas fae media hora, vulviu a chamá-me la Gúmer pur teléfano pa dici-me que ya nun agüecha’l mumentu de fuxir de las Canarias pa chegar cantu antes  a Cangas. Díxu-me questa mañena cumprou un sumbreiru grandón desus que etsa chama pamela pur si fae muitu sol, cumu lus que cheva la Litizia ya la reina d’Inglaterra. Esta rapaza cumu ía muitu ruxina ya de piel blancucha  tientse muitu mieu al tsourienzu pur si la queima. Tener, tien razón, purque nu sou puelu tuvienun muita contaminación pu la chuvia ácida, esa tan mala que seca lus arbulinos ya queima tou lu que atoupa pur delantre. Peru tengu mieu de que lus vicinus se espatarren de risa  al ve-la cunu sumbreirón na cachola cumu si fora un espanta páxarus. Tengu que convencé-la pa que nun lu ponga.

 Ya tse dixe you, qui nun faia falta nenguna que cumprara nada, que tengu you sumbreirus de pacha abondu pa candu vamus a gadañar la yerba que son guapus ya más pequenus que lu que etsa cumprou. Lu que siguru, nun tse va sobrar, ía un bon paraguas por si chueve. Peru etsa trae roupas que arrebaten bien  l’augua, ya di que nun tse fai falta’l  paraguas pa nada.

 Atsá etsa, si se muecha que se mueche; l’augua na primavera ía muitu bona, nun fai mal algunu a naide, ya miedran cun etsa lus gadechus una barbaridá. Candu taba hablandu cun etsa pur teléfanu, uyénun-me lus merdeirus de lus subrinacus mious, ya candu me dixu lu del sumbreiru, estus cabrones partíanse de risa, semexantes inorantes, qué sabrán etsus. Voi tener que chamá-les l’atención purque son unus sinvergunzacus ya nun respeitan a naide. Además son unus aldrumeirus de miedu, ya tou lu que oyen na casa, luegu van  cuntandu-lu  pul puelu peru nun farfotsan más que truladas ya mintiras a la sua manera,  pa que luegu se rían bien lus vicinus detsus.

Esta mañena, bien tempranu,  mientras mucía la Cachorra,  ocurriúse-me que pa tsevar a la Gúmer a durmire pudía ir  tamién a lus cuartuchus esus rurales de Riela de Corias,  lus que tien ese rapaz que tuvu  nu cunventu, Raúl, que dixénun-me que taban muitu guapus, ya tan a tiru piedra de La Vitsa. Peru cumu diz el rapaz de Turón, Miguel Ángel, saldrá-me más arreglau en Xenestosu ya que voy de sua parte. Pa esu somus amigus ho. Pensarei-lu nestus días.

El casu ía que lus de Corias quédan-me más a manu, ya Raúl siguru que tamién nus trata bien, peru pur outru amiente, pa pasar desapercibiu paeme a min, que son muitu mechor lus de Xenestoso. Siguro que la tsevarei a unu destus dous. Ya veréi pur cuál detsus  me decidu.

PD. Las papolas blanquinas tan guapas del retrato darriba, son de la nisal de María la amiga mía. Candu las agüeche la Gúmer, que tse gustan muitu las flores, siguru que se dirrite de gustu, cumu la manteiga puesta al sol, al puné-xe  delantre’l  arbolín que ta cuachau: nun tse cuetse una florina más.

"Jesusín", el pelgar