“Jesusín”, echa de menos a la Gúmer

Nestus días de la Simana Santa cumu you taba un poucu atulundrau pu las rifriegas que tuve cuna Gúmer nun mi cintraba bien nu que tinía que faer. El vienres díxu-me’l rapazacu piquenu que tien una blackberry desas que tse la rigalau el padrín  pu lus Reis, ya ta tsoucu cun etsa, díxu-me que esi cacharru fae lu mesmu cun urdenador peru que ía muitu más piquenu. Será virdá peru, pa mín a pisar del nome tan raru que tse dan, you creu que nun deixa de sere simplemente un teléfanu móvil cun Internet, peru  más cumpletu ya también muitu más cumplicau. Lu que me gustou ía la traducción deste nome  que sigún me dixu quier decir mora u zarzamora, ya mín las moras de lus artus sempre me gustá-nun. Este subrinu miou dáse-tse  muitu bien el escarbar ya manuxear en tous estus cachivaches electrónicus.

Amirai si ía tsistu esti diablecu de nenu  que también me dixu que tuviera agüechandu’l blog de lus rapaces de Corias ya  que viera lus mious cuntapinus. Peru díxu-me que tse paecía mintira que you fora capaz de entamar algu asina. Que lu que’l viera casi apustaba a que nun lu garabatiei you solu, que alguien me lu debiu de faer. Dixe-tse  you: si serás desagradeciu, merdeiru de lus cuxones. Ulvidaste-te ya de quien vus enseñou a tseer ya’scribire, a ti yal pullín de tou hirmanu, so carneiru atulundrau.

You hasta agora  apenas veu publicaus lus cuntapinus que vus cuentu aiquí,  purque you doitse-lus a Rulindes, la rapacina  que me lus pasa al urdenador ya etsa mándatse-lus al blugueiru prior pul curreu lectrónicu esi, ya espois él culoca-lus cumu tse paez nu blog.

Dixu-me esta rapacina, quel blugueiru prior hasta’l mumentu sempre lu fixu cumu a etsa tse  gusta, ya lus ritratus que tses pon algunas veces, di que tan muitu bien, cumu la del nial del paxarín. Dígu-vus la virdá, toi cuntentu cuna cousa esta del blog. Ya también direi que el blogueiru paré-me un rapaz formal ya espiertu. Ya esu que naciu nun puelu piquenu del  ríu Rengus,  nus anus de la posguerra que nun había nu país más que fame ya miseria. El ía más novu que you, peru cunózculu de vista, de ve-lu pu la Veiga  en Cangas candu lus días de feria baxaba  cuna sua familia a vinder buenas camadas de gurinus que lus traian mitius nun caxón de madera. Veía-lu casi tous lus sábados, peru candu nun faltaba yera: pal sábadu de Ramus, la Cruz de mayo, la Feriona, San Mateo, ya pur San Andrés. Tamién  ricuerdu ve-lu cumiendu na Criolla cuna sua familia.

Nestus días tsegou a lus mious uyius que fai poucu  este home saliu en defensa mía purque nun faiais casu a lus mious cuentinus. Ya yera virdá lu que vus dixu;  you taba discuntentu cunus tsectores del blog purque nun dicían nada: ni bonu ni malu, a lu qui you vus cuentu de la mia vida. Ya sei que a vos estu nun vus emporta nada, peru you tengu que cuntátse-lu a alguien. Tenei pur conta que you nun falu apenas cun ningún de lus rapaces de la mía quinta. Solu cun mucheres, ya muitas detsas viechas, u cunu ganau. El blugueiru tampoucu sabe cun certeza quien soi you. Anque diga que lu supón. Pae-me a min que va tsevar una gran surpresa el día que lu sepa cun seguridá. You toi cunvenciu que él uyiu campanas, peru na más; tuvía  nun sabe  ou tan culgadas.

Agora, estu de la Gúmer tien-me trasturnau del tou, mi alma que sí. Ya nun sei si fixe bien en enfadá-me cun etsa u non. Si vus digu la virdá a min gusta-me muitu esta  rapazona, ya pa un castrón cumu soi you, qui más quieru,  candu la ví más gorda. Peru pul outru tsau sentou-me muitu mal que dixera que you yera maricón, you tsamu-tse asina, esu de gay, ía un eufemismu. A las cousas hai que chama-las pul sou nome. Ya sei que hoy día hai muita xente que, nun solu nu lu tien a menus, sino que hasta prisume de ser dese tsau, peru a lus de nuesa épuca, esu nun nus gusta que nus lu chamen, purque ta mui mal vistu. Peru you tampoucu toi d’acuerdu cunesa xente que upina que esu nun ía una forma de ser, sino que ía un viciu u  enfermedá que se pode tratar ya curar a base de mano dura. You nesu nun entru nin salgu; pur min poden faer lu qui quieran, ya tumar pur ou tses paezca, mientras nun se metan cumigu, cumu si quieren ir a  tuma`l aire frescu.

Cumu vi que estus días nu blog tamién hubu rifirrafes, ya mitiduras gordas de pata, dixe you pa min: apruveita  Jesusín ya cuéntatses a estus rapaces lu que tas pinsandu ya si vas a volver cuna Gúmer u non, peru tuvía nun sei lu que faerei.

Lu qui tamién me gustou muitu foi lu que dixu este rapaz de Sierra que pripara esus versus tan bien feitus. Chámase  Jusé Manuel, si nun toi mal infurmau ya creu que ía naciu en  Rañeces de Sierra. Esi puelu ta pa la cabeceira del ríu de Onón, pae-me a min. You de piquenu foi cunu miou pai una ve a cumprar unus castrones a San Pedru de Culiema ya dienun-nus de xantar, caldu de berzas ya butietsu cun patacas blancas, na mesma casa que nus lus vindienun. Desu alcuerdu-me cumu si fora agora mesmu. Hasta Onón baxámus-lus chapinandu ya espués tsevounus-lus un camiunetu hasta‘l nuesu puelu.

Agora tengu que ir a mucir las vacas. Hasta outru mumento ho.

"Jesusín", el pelgar