Lus tirantes de Jesusín

Nun ía pur rivulve’l cutarru peru tengu que dicí-vus, que desde quel prior diu’l toque aiquí nu blog, amirai qué bien furrula. Hai muitas más culaburaciones que anantias, ya tamién vi que algunus que nunca garabateaban nada nus mious cuntapinus, agora sí lu faen. Esu ta muitu bien, oxalá siga asina la cousa. Hasta Mamen ya la tengu del miou tsau, que hasta’l mumentu taba un poucu arisca cumigu purque  diz que nun se crei que you soi de puelu ¡vatsa si lu soi, nun lu sabe etsa bien del tou! Peru toi muitu cuntentu cun estas cousinas que me puné-is aiquí nu blog.

You lu que dixu Olga de que sou pai faía madreñas nun taba muitu siguru, peru agora que lu dixu etsa, sí tengu algu na mimoria cumu de ve-las culgadas na paré delantre la sua tienda pur fora asina culucadas en riestra. Etsa dirá si ía virdá u mintira. You desu alcuerdu-me purque you taba muitas veces ou Mercedes  de la Macarena, que me tsevaba mia madre pa atsí, ya veía-lu. Candu taba atsí de subrau, durante las horas muertas, asperandu a que terminara mía madre de faer lus encargus pa puder fuxir pal puelu, amiraba pa tous lus tsaus ya pa todas las cousas; tamién veía pur delantre de  Casa Marcus ya de La Criolla hasta la cuestina de La Victoria, cúmu xugaba al cascayu  Olga cunas outras neninas vicinas. Esta nena ya yera muitu curiusina de pequenaca, peru tamién debu decire que yera un poucu rivultosa, nun paraba quieta ni un mumentu;  taba tou’l día dandu saltiquinus ya faía cumu que beitsaba sola. Pur esu de moza yera muitu bailona.

Adimás tuvo suerte cunu maridu que escutsiu que, aparte de ser muitu intelixente ya un gran rapaz, tamién beitsaba muitu bien ya  gustaba-tse fae-lu a minudu. Mi alma qui faian una bona parexa. Gran pérdida foi la de aquel home a edá tan temprana.

Agora que ricurdei a mia mai direi-vus quetsa a min chamába-me sempre Jasusín, en ve de Jesusín ya las vicinas rianse detsa candu la uyian dicí-lu: ¡Jasusín, Jasusín!, vienes pacó melandrin, u tengu qui dir you  a busca-te cunu bascachu de burtigas.  Tamién siría purque mia madre candu tse daban una nuticia que nun l’asperaba sulía decire: Juasús, Juasús. Estu ía lacabouse yan paz, you nun sei onde iremus a parar,  ya cun esu alón.

You de mía mai alcuerdu-me muitu, anque cando yera piquinucu ya tinía muitas rifriegas cun etsa. Subre tou purque mía mai tinía una manía cumigu que me esqueiciaba. Etsa  dicía que you tsevaba tu’l día lus pantalones esculgazaus pul fondu’l culu cumu Cantinflas ya que andaba cuna faragacha de la camisola sempre fora. Pur esu   nun me dexaba puner cintu nus pantalones. Etsa dicía que pa que lus pantalones tuvieran nel sou sitiu había que tsevá-lus cun  tirantis, cumu faía Don Camilu Jusé Cela, hasta lus subacus. Ya you cunus tirantes nun m’apañaba purque nun me gustaban,  ya daba-me muita rabia ver a lus outrus nenus cuna  currea de cueru muitu guapa, ya you sempre cunus dichosus tirantis cruzaus puestus, cumu lus nenus piquinacus que tuvía esfuiraban pu lus pantalones.

Lus tirantis nun lus pudía vere, teníatses virdaderu odiu. Candu yeran cun oxales ya butones  esgazába-tse-lus  tous lus uxales pa que espués tuviera que cusé-lus, que a etsa nun tse apiticía nada cutser la agucha; adimás, dábase-tse muitu mal. Candu nus azurutsaba algún rumiendu a cualquiera de nos  nas roupas, ya nun se pudía punere luegu la prenda de lu mal que la deixaba. 

Espués cando vinierun lus tirantis de pinza mitálica yeran más guapinus, peru tampoucu me faían gracia. Pur unus Reis truxénun-me unus peru rumpitses escapau las pinzas, mixor dichu aplastei-tse-las cunun murrillu. Astoncias mia madre  enfadoutse bastanti pur rumpé-tse-lus, ya  dexou de dame la munxerga pa sempre, cunus dichosus tirantis.

Sin embargu agora veu you a muita xente de casi lus anus mious, de la TV, cun etsus puestus. El Wyoming esi de la Sexta ía unu. Esi nun lus quita d'encima. Ya muitus más. El Pedru Jota esi del Mundo lu mesmu, peru a este home debe buscatsé-lus la muchere que anda toul día cun esi tinglau de la moda. You candu lus veu digo pa min: si quedá-tses tan fartus de los dichosus tirantis cumu quedei you, mi alma que  nun lus puníais nin pa ire al ritrete.

Outra cousa pu la que you riñía cun mía madre muitu foi candu cumencei a tiner que pasá-me la cuchilla d’afeitar pu la caretsona yal bigote pa quitá-me las pilusas que m’empezaban a salire. Etsa dicía que nun las curtara purque cantu más las rapara más vulvian a crecere. Ya you era lu que quiría, peru etsa non.

You creu que etsa quiría ve-me sempre cumu nenu, pur esu nun quiría que medrara pa que nun me fixera home. Cousas de las madres que nus quieren tiner sempre cumu neninus de teta. Peru la mía tamién yera pur ser algu mandona cumu son  todas, afortunadamente; etsas saben bien que mientras somos nenus faen de nos lu que quieren,  peru en cantu cumenzá-mus  a salire de debaxu’l mandil, y’andar guliendu  pur fora ditrás de las rapacinas, dantse conta que ya nun tienen nada que faer cun nos. Lus páxarus queren  vular.

Ya lu pior de tou  nun ía  fae-se mayores, non. Lu pior de tou  ía fae-se viechus, cumu ya vamus andandu nos, sin da-nus conta. Peru ía lei de vida, muninus. Qué tse vamus faer. Hasta outru ratucu.

“Jesusín” el pelgar.