“Jesusín”, el pelgar, vuelve a la carga.

Fai abondu  tiempu que nun andu esqueirandu aiquí nu blog de lus rapaces estus de Corias, peru ía igual fae-lu que non, purque etsus nun  preguntan pur mín, ni pa insultá-me siquiera  ho. Tan poucu val lu que you garabateu aiquí que nun merez un afamiau recunucimientu, anque sea de dos ringlones siquiera. Miánicas toi apaxarau viendu lu pouco agradecius ya ingratus que sois. Peru a min da-me lu mesmu, anque nun vus axeite la cousa,  you seguiréi dándu-vus la munxerga cu nus mious cuntapinus, hasta fartá-vus.

Esta tempuradina d’atrás nun pude cunta-vus cousas de lus nuesus puelus  pois anduve-tse muitu atareau cuna sema de las patacas. Ya pur si fora poucu tamién me tocou nestus días la vecera’l agua nus praus de la Vatsina  ya del Curbeiru. Avisánun-me lus socius las víspora pu la nueite, ya tuve que puné-me a la manecere tou escaldeirau a  faer las presas a tou meter, anantias que dieran l’agua, pa que nun se arramara ya pirdiera, ya que taban las presas ya lus fuerus tous tapaus ya  desfeitus  pu las vacas, qui lu desbarran tou cunas patas  candu pacienun lus praus pul otono, debiu a que son praus muitu cuestus ya, nalgunus sitius,  fórman-tse muitu  tsamazal cunas pisadas del ganau.

Menus mal que al ve-me tan pirdiu ocurríuse-me dixitse-lu a un vicín si pudía echá-me una manu ya él díxu-me que nun pudía purque tenía que ir a Madrí a ver a una hirmana que la uperaran dun cadril, peru mandou-me la ficha que tien vente anus ya ía trabachadora ya salerosa cumu naide.

 Esta rapazona, aparte d’ayuda-me nus praus cumu si fora un home, tamién  fixu-me un pote de caldu de berzas que tuve pa xantar  casi toda la simana. A mín el pote recalentau gusta-me muitu. Lu que nun me gusta tantu ía faé-lu ya que las patacas pónen-se vidrionas ya engrutsadas. Peru el cumpangu ta muito bono anque pasen muitus días, subre tou el toucín calentín, peru que nun te marietsu eh. Si ya ta marietsu, más que toucín, paré untu cumu’l quechan  lus gallegus nu caldu. You nun lu puedu cumer purque da-me  espués tantu ardor d’estómagu que abru la bouca cumu faen las potsas nu branu. Partsandu del toucín, cando yera you pequenu acuerdu-me que si yera’l toucín muito gordo sin freba, chamábamus-tse  toucín del barcu ¿sabíais-lu?. Nun sei, pae-me que non, nun toi muy seguru.

Lu que vus taba cuntandu ho, mientras  trabachába-mus nus praus esta rapaza ya you, etsa púxu-me al día de las cousas que farfotsan nu pueblu de mín. Díxu-me que ya saben tous que tengu  la peirona  alemana, ya que se chama Gúmer. Sei que andan tous escaldeiraus ya cuna gulisma dientru pur cunucé-la purque el camareru de Tebongo qui la cunoz bien, díxutses que yera una xata culona de concursu; paré que esti rapaz tuvo fai poucu nu pueblu ya cuntoulu por atsí a lus rapacinus ya las mucheres. Pur esu lu sabe tou’l puelu. Las mucheres viechas dixé-nun que: quien lu diría, cunu parau ya pasmau que paecía  you pal asuntu de las sayas, peru que nun yera tan tontu ya bartolu cumu criían. El caraxu esti del camareru díxutses que you andaba toul día avangau sobre etsa beisándu-la pu lus chigres ya pu lus caminus. Astoncias las mucheres dixenun que esu yera más propiu de  sinvergonzones ya  de dexeneraus;  cousa que  you, al menus de pequenu, nun lu paecía purque yera bon nenu ya iducau.

Tal que agora nu puelu, tengu fama de faldeiru ya de curtexador cumu si fora you’l conde Lequiu esi. Nun me procupa que lu piensen, bastante tiempu creyé-nun que you yera fatueiru ya que nun rascaba bola. Lus tiempos cambian pa tous ho. Menus mal.

Nun pensé-is que, cunesta fama de curtexador que mechanun encima,  esta rapacina que mayudou loutru día nus praus,  ficha del vicinu, taba un poucu esqueicida  ya muntisca cumigu, anque ía bastante más xoven que you ya cunoz-me de sempre; nun s’acercaba a mín pur nada. Nutaba-la you que tinía-me descunfianza. Ni que fora you un volador desus de las capitales que cuechen a las mucheres a la fuerza ya abusan detsas  nus ascensores ya nus purtales. Valga-me Dios, you nun faigu más que lu que etsas me dexan. Ya cuntentu. Mientras se dexen afalagá-las algu you encantau. Agora lu buenu va ser el día que venga la Gúmer. Candu la agüechen  las viechas del puelu, cunu frescachona que ta, mi alma tses da algu. Ya si pon la menifalda de florinas marietsas cuna blusa escutada que tien a xuego,  que’nseña tou’l canalillo, nun vus digu nada. Ya esu que esta moza nun ía de pata negra cumu dicen agora, no; ésta  ía blanquina ya ruxina muitu guapa. Va ser muy gorda, dígubus-lu you.

P. D. La plantina del retratu ía el Axenxu que ía muy arumáticu. De pequenus cando tenía-mus catarru de bronquios, punían-nus una cataplasma feita cun güevu y'axenxu, a modo d'una turtilla francesa,  pegada al peito bien calentina cun una venda durante toda la nueite. Al día siguiente espertabas cumu nuevu.

“Jesusín”, el pelgar