LA GÚMER TIEN TSERZA, YA YOU MÁS

Hola rapaces. Estus días d’itrás siguru que tábais un poucu anoxaus cumigu purque cuntei-vus muitas cousas que seguru nun vus gustá-nun. Estus cuntapinus mious nun tan entamaus pa  pirsonas rifinadas ya dilicadas cumu dais a’ntender  que sois la mayuría de vusutrus, anque esu había que preguntá-tse-lu a las mucheres vuesas, ya igual tse vus puxu el peyechu arizudu ya tsevantau. Si amirásteis algu pa etsas, daríais-vus cuenta que la mía intención nun yera mulestá-vus  nin cousa paecida;  peru anque vus dé ripilu tseelus, debéis acetar que hai que tucar tous lus palichus ho. U ía que, neste chisme ta vedau el falar de las cousas  de mediu  cuerpu  pa baixu. Nun creu que el rapaz esi de Rengus el prior, qui paré-me que ía furmalón ya sinsatu, qui lu cunsienta. Pur s’acasu tendrei que priguntátse-lu un día destus, cumu agora nun podes fia-te de naide,  nun vaya tar you quivucau ya te mitiendu  la pata sin da-me cuenta.

Tamién sei que hai parruquianus ya parruquianas desti blog que  tses gusta  muitu leer estas trangalladas mías ya m’intienden perfeutamente, peru el únicu que tien saleru pa deci-lu aiquí,  ía Miliu Ramón, el culaborador de la costa ucidental, el que m’envitou pa ir cuna Gúmer candu venga, a remochá-nus na mar cantábrica. A esti mozu nótase-tse bien que tamién ía de campu, ya un poucu bardín, asina cumu soi you. Pour esu nun tse fai ascus a estas hestorietas tan de pueblu ya tan riales cumu la vida mesma que se espublizan aiquí nesti blog de lus antiguos rapaces del cunventu de Corias. Él, di que tse faen reir  a lu tontu ya esu ía lu que you pritendu ya mi presta ouyilu. Da-me gustu cunel, pois demuestra ser un rapazón campichanu, cumu mi gustan amin. De tiquismiquis que se la cuetsen cun papel de fumar ta’l mundo chenu. Desu hai abondu pur tous lus tsaus, si ho; hailus a esgaya. Si hubiera menus melindris desus, cantu mexor nus iría a tous. Díguvus-lu cumu lu sientu. De todas las maneras, güei nun voi a cuntá-vus nada escabrosu ni escatulóxicu que podáis decire que ía  cousa de gochus ya vulgares cumu pinsais vusutrus que ía el pelgar.

Güei voi plantea-vus un prublema que se m’arrimou al tsombu estus últimus días, pur si foran poucus  lus que vusotrus ya sabéis que tsevu encima. Pae-me ricurdar que ya vus dixe que la Gúmer yera muchere separada. Creu que sí. Pois, queréis creer que el exmaridu desta rapazona presentou-tse loutru día nel hutel en Tinirife tou acelerau, despeinau ya fora de sí, cun unus celus que Dios nus  tsibre.

 Dixénun-me que se tsevantaba mui ceu ya que andaba buscándu-me a pía cumu un tsoucu pur toda la isla cuna guichada na manu. A min avisou-me’l rapacín de Tebongu que ta atsí de camareiru. Díxu-me: Jesusín, nun se t’ocurra apaecer pur aiquí nuna timpurada lonxe purque te come esti humecón. Mi alma ta tan cabreau, que ía capaz de arancá-te la chola u matá-te. Encima, ía un cachu animal grandón que paez una fiera, fae bien agustu pur dous u tres cumu tú. Tien unus brazus más gordus quel troncu dun rebotsu. Pur esu la Gúmer estus días ta catsada la grandísima zurrona, ya nun gurguta ni parula. Siguru que tien mieu que’l cafre dé cumigu ya que me rompa la crisma u que me esfarrape tou. Pur esu nun m’avisou la gandulona detsa. Tamién me dixé-nun que la Gúmer nun viniera a ve-me purque ya chegara a Tinirife este animal, candu ella iba a venire, ya que etsa  tientse muita tserza pulu brutu que ía.

Dixenun unas mucheres alemanas, vicinas detsa, que anantias de separá-tse desi anemal, ya tse  calentaba bien la badana ya  las custietsas a minudu. Probe Gúmer, etsa dixu-me que taba malina, peru yera tou una trola pa curré-me, yera tou mintira. Cumu pa vinire a veme taba la cousa. Cun arrebater na isla a ese cachu cafre de la vera del Rin tinía bastante. Miánicas que sí.

Esta fiera de home chámase Barend que quier decire oso, u mata la osa, algu asina, na’lemán; creu que ía roxu casi albinu cuna cabeza de grandi cumu la de un xatu culón, ya que mide dous metrus de tsargu pulu menus. Lus gadechus tségan-tse al renazu. Ya creu que trabacha nel puertu de Norddeich de Baja Sajonia nel mar del norte, descargandu cuntenedores. Paré que tien tatuaxes hasta na nuca ya muntones de fierrus culgaus de las urechas ya de las narices. Cumu pa faé-tse frente a este miluetu.

 Tamién me dixé-nun questi anemal na más chegar al hutel sacou  un ritratu de la cartera nel que tamus la Gúmer ya you beitsandu, que nun sabé-mus  quien diantres se la diu,  ya paré que you téngu-tse lus papietsus bien arrimaus a lus detsa. Al paecer esta bestia, na más chegar a la recepción, ya  nun  paraba cunu  ritratu tsevantau ricurríendu l’hutel pa rriba ya pa baxu tou esnalazau ya diciendu picaus cumu si tuviera embruxau. Taba tan tsoucu esti cafre de home que recurría el edificiu dabaxu arriba sin parar  saltandu las escaleras  a zancadas de dous en dous lus escalones  cunu ritratu na manu amirandu pa tous lus tsaus pa la xente que veía a ver si me recunucía a min entre etsos, ya nun paraba de farfutsar parulas raras ya tsevantar lus brazus. Díxu-me’l rapacín de Tebongo que este home estus días tinía lus güechus culuraus, tous ensangrentaus, cumu si lu hubieran arrabuñau cuna barda d’artus, yal fucicu tou  chenu de spumaraxu blancu, cunas babachas culgandu di una cuarta de tsargas, lu mesmu quel burrón de nuesa casa candu monta las gochas que tse traen pa cubrí-las. Creu que mitía mieu, solu cun amirar pa él.

Ya lu pior de tou ía que dixu que pa Alemania nun vulvía sin dexar esti asuntu arreglau. Si nun m’atrapaba nas Canarias que vinía  pa la península a por mín. Dixu que  nun naciera tuvía unu  que tuviera’l arroxu de  punetse a él la curnamenta. Asina, cumu veis, nun me chega la roupa al cuerpo, nun duermu de la tserza que tengu. Toi pinsandu en dexá-me barba ya puner unas gafas de sol cumu las de Martiriu, desas amaripusadas pa  desemular. Ya lu que más me procupa de tou ía que tengu mieu que la Gúmer, baxu amenazas desti animal, tse diga las señas de la  mía casa. Si lu Gúmer s’acubarda ya canta, toi aviau; ya puedu naspiar cantu anantias, ya nun parar de chapinar hasta Brasil pu lu menus, cumu cerca. Amira que tengu mala suerte you cunas mucheres, nun me sal una al dereitu. Ésta que paecía tan bien chanflou-me. Paré que me amirara a minudu el renubeiru. Mal rayu me parta ho. Ya cun esu alón.


"Jesusín", el pelgar