YOU DESTA NUN SALGU VIVU. YA CUN ESU ALÓN

En primer tsugar direi-vus quel tsombu este que se ve nel ritratu ía el del cafre del ex de la Gúmer. Cumu pa nun tiné-le noxu ya fuxir curriendu na más ve-lu venire.

Muitus de lus parruquianus del blog sei que vus reís tou lu que queréis ya más de min, peru la cousa tien pouca broma muninus. Esta mesma mañena taba you na currada gadañandu ceba pa cucher un brazau pa lus xatus piquenus, candu vi que parou un autulodre grande, cun matrícula de culor marietsu, xustu a la altura del purtón de lus vicinus nuesus, ya paeciu-me uyir que priguntaban pu la casa de los “Arrincanabus”, que asina ía cumu se cunoz la nuesa casa nu puelu ya en tou’l riu. Esto ía un mote que vien d’antiguo pur un tatarabuelu miou que arrincaba lus nabus nus lindeirus de lus estaxus de tous lus vicinus purque dicía que etsus mitían-tse cunu aladru na sua tierra al tsabrar. Ya cun estas cousas de lus puelus pur culpa d’aquel home, que yera un aguanón que nun se vía fartu de tierras ya más tierras, agora tous lus homes que nacé-mus na familia ya chegá-mus al mundu cunu macharmu puestu: somus lus arrincanabus pa toda la vida. Nesu, las mucheres de la casa tuvienun más suerte; a etsas nun se lu chaman. Peru poucu más da. A etsas suelen decitses las floxas; estu dicintse-lu pu lu esfardeladas ya barbeitonas que yeran unas mucheres, madre ya ficha, que hubu tamién nesta casa, fai muitus anus, casi na antigüedá.

Menus mal que na casa de lus vicinus, la de Xuacón, taba solu un nenacu piquenu qui ía afichau de la muchere viecha, ya este guaje cumu vive en Guarrumán en Jaén, onde faen esus hoxaldres de cabello d’Ángel tan ricus, nun cunoz apenas a nadie aiquí, ni sabe nada de las cousas del puelu, ya cuntestou-tses que nun lus cunucía, nin s’alcurdaba de velus. Tuve muita suerte. Fettivamente.

Estus extranxeirus que vinian dientru del trastón aquel de coche yeran tous xente xoven: homes ya mucheres. You nun lus ví bien, peru paeciu-me que’ntre tous etsus nun taba el curnal del xabaril. Siguru questus milandrinus vinían pur delantre, d’acó pa acutsó mandaus pur él pa investigar bien tou, ya asina luego la fiera ya pode vinire a vareixá-me bien, a tiru feitu.

You tamién pudía dicitse-lu a lus vicinos pa que nun me discubrieran candu pregunten pur min, peru da-me riparu ya vergoña nun vayan a pinsar pa sous adientrus que you soi un merdeiru ya un cagau. Prifieru catsá-lu ya curre’l riesgu de que m’atoupe esti porcu bravu d’estibador.

Candu salgu pal prau a faer algu, si chueve pongu-me un sacu pu la cabeza a modu de capietsu u capucha, pa nun muchá-me ya cumu ía grandón cúbre-me toda la testa que casi nun se me ve ni la caretsona. D'agora na delantre voi puné-lu sempre que salga pa la currada, y’asina puedu camuflá-me si tengu la desgracia de que este anemal diera cuna mía casa. You si lu veu al pía miou, xebru del cumu si viera’l tsobu. Mi alma que sí.

Lu que sí fixe, foi dicitse a la del chigri que tuviera cerveza bastanti na fresquera pur si chegaran estus homes cunu cafre pa que beban hasta fartatse bien, a ver si se ponen cumu xoxas y’asina puedu you fuxir detsus sin piligru algunu.

Tamién penséi en decí-tse a la moza del chigrucu este del puelu que si preguntaban pur min que dixera que taba n’Argentina pa un anu o dous pu lu menus. Peru esta rapaza ía tuvía xoven ya muitu alietsa, igual puedo you rascar algu ahí, chegau’l mumentu, ya fastidia-me que etsa sepa destas trangalladas mías u que piense de min que soi un cubarde ya un cagau.

A lus subrinacus mious, esus nin numbrá-lus, a esus nun tses digu ni parula. Esu sería lu que etsus querrían pa rei-se bien de min viendu-me currer camín abaxu tou esnalazau delantre del xabaril curnudu.

Cumu tais viendu nun puedu ni trabachar a gusto ni tranquilu, nun me dexan parar. Fae un ratucu tuve falandu’n pouquinín cuna vicina ya díxu-me, ah Jesusìn, nótu-tse la cara muitu pálida ¿tas malu?; non, cuntestei-tse you. Ía debiu a que fixenun-me mal las papas ya unus papadinus de tseite qui almurcei pu la mañena. Mexor dichu nun yera tseite, yeran lus culiestrus de la Garbosa que pariu fai poucu ya tuvía nun se secou. Da muitus más de lus que pode mama’l xatu. Hai xente que diz que lus culiestrus nun debe-mus cunsumí-lus las pirsonas, peru esu ía una gran mintira. En mía casa sempre lus cumí-mus la xente, toda la vida, hasta postres fae mía madre cun etsus. Si a lus xatinus vientses muitu bien el tumá-lus, subre tou pa la barriga, pa nos lu mesmu. Tutal, qué diferencia hai entre las tripas detsus ya las nuesas.

Tamien se me pasou pu la testa, si sigue detrás de min este gualdrapón esventrau, de chamar a un rapaz que tuvu cumigu na mili, en Regulares 5, en Melilla, que ese ía bragau del tou, ya entre lus dous aspera-lu pu la nueite candu te bien fartu de cerveza ya partitse el tsombo a estacazus al curnal ese “matalaosa”, u arriá-tse unus buenus trumpazus ya murradas. Peru estu nun me gusta muitu purque paeme que ía poucu valiente, anque you solu nun puedu enfrenta-me a semexante bestia parda, purque come-me vivu. Algu tengu que faer. Ya lu pensarei mexor, más espaciu. Purque este tulondrón nun me va complicar a min la vida, pur muitu furaxas que sea ho.

PD. Ah, ulvidábase-me deci-tse al blugueiru prior que gustou-me muitu el pensamiento filusóficu 2, que puxu fae poucu nu blog. ¡Qué gran virdá ía! You rialmente, nun sei si pertenezcu al grupo primeiru, u al sigundu. Da lu mesmu. Peru lu que sí sei, ía que, en unu de lus dous casus, toi incluiu. Prubablemente, sea nel sigundu.

Tamién debu agradecetse a esti rapaz la defensa que fixu aiquí de lus mious cuntapinus. Muitas gracias, ho.

“Jesusín”, el pelgar