lunes, 18 de abril de 2011
CULGADIXUS DE FELPA VULADORES
Voi datse algún rumediu caseiru al rapaz de la marina, Milio Ramón, pa que candu ritornen lus sous parientes cubanos sepa dicitses lu que han de faere nus casus d’apuru mutivaus pu lus turzones ripintinus de vandouga sin que tses paezca que tsevan itrás detsus un enxame d’abechas. Nestus imprevistus qui nus entran a tous, de vez en candu, ía muitu emportante tiner algún rumedio a manu. Si te atoupas nu campu nun ía prublema nenguno, pu lu menus pa min. Pa lus de capital cumu tan algu más apaxaraus, muitas veces vuelven-tse tsoucus ya nun saben qué faere, pero ía muitu fácil. Subre tou agora cara al branu. Lu que cunvien sabere ía un pouquinín de las plantinas ya yerbucus que hai pu la vera’l camín. Si tamus cerquina de una güerta ta feitu: las fuechas de berzas, de rimulachas, de lechugas ya las acelgas son lu mexor pu lu grandes que son. Solamente hai que arrancatses el touzu. Tamién lus maices. Las que pinchan muitu son las de lus calabazones, esas nun valen.
Si nun hai una güertina cerca ya tas nu mediu’l campu las mexores fuechas pa ristrigar el oxal son las carbazas, las siete costuras, el sumbreiru de sapu (ombligo de Venus), l’alfalfa, lus nabus, ya la ceba en xeneral. Cunvien tiner cuidau cunas fuechas de la fabas ya de lus fréxules que anque paecen mansinas tienen muita pilusa ya luegu escuecen muitu. Outras que nun deben cutsé-se nunca son las de zirigüeña, las burtigas, lus tarrietsus, lus cinizus, las acederas yal toronxil.
De toda la flora salvaxe que hai pu la veira’l camín, pa mín las mexores de todas son el gordotsobo, cumu el que ta nu ritratu darriba, anque nun se vein las fuechas, ya lus anises u hinoxu. El primeiru destus tien la fuecha aterciopelada, grandona, ya ía muitu fina ya suave. Ya lus anises que ían cumu filus, si cueches un bon puñau tsímpian-te muitu bien, ya’ncima deixan-te’l oxal pirfumau del tou. Las fuechas de castañu, rebotsu, ablanu ya humeiru, tamién son bonas. Las d’abedul son piquenas. Las qui nun cunvien cutsé-las ía las de lus nuceus purque son muitu ralas y’aparte desu, cumu tienen muitu yodu déxante la zona tiñida de culor marietsu uscuru.
Una ve apercibiu de todas estas pricauciones pa puder datse unas bonas friegas a la zona afetada cunas fuechas, pa que espués nun tse pique a unu el furacu, lu mexor de tou ía l’augua. Si nun hai cerquina un rigueiru, hai que busca-lu. Purque cunvien tsaba-lu cun augua fresca que ía lu mexor ya lu más natural. Fai poucu cuntei-vus you aiquí nu blog lu que me’nseñou mía madre a faer candu yera piquenu cuna lata de las sardinas, purque nun había nas casas ritrete, ni augua curriente. Nun creu que tenga que repeti-lu.
Tandu nu campu, ya tsegau’l mumentu del riturzón, na mas qui se tsimpia unu cunus yerbacus hay que salir pitandu en busca dun rigueirucu ya escarráncase bien espatarrau, puniendu lus pías unu a cada tsau del augua ya comenzar a tsabuquear bien todu’l desaugue cuna manu, cumu faen lus moros. Asina pasau el mumentu, ya nun pica nada; queda unu tsímpio ya fresquín que da gustu pa tou’l día. Estu mesmu dísetse-lu you a un pariente miou madrileñu fae un muntón de anus candu vinía pul branu pa la yerba ya, miánicas que fixu-me casu, peru al branu siguiente candu vulviu, traía’l probe rapaz cunel un bote de polvos de talcu, ya sempre que andába-mus pul monte dicía-me: Jesusín, alcuerda-te que tsevu you nu bolsu el rumediu pur si tinemus que baxa’l pantalón eh. You ría-me ya catsaba la bouca. A veces you pinsaba: este rapaz mi alma que ía mediu fatu; ya lu pior ía que ya nun espabila, peru que tse iba a faer: catsar la bouca ya riíme.
Tandu nu campu nun ía prublema ningún cumu digu. Lu pior pasou-me a min tandu nuna pinsión candu yera ya muzucu espués duna nueite de muita farra ya muitu sople de tintu, que entránun-me de nueite unas ganas de esfueirar hurribles yal ritrete taba pechau. Sabéis lu que fixe; pois quitei lus calzuncillus tsargus de la marca El Osu que tsevaba puestus, anudei-tses las pirneras pul fondu ya fíxe-lu dientru cumu si fora un espurtillu de pacha. Espués atei-lus pu la cintura ya aventei-lus pu la ventana pa unas güertas que había pa la parte d’abaixu. Cumu yera nueite pechada nun si via nada ya nun supe onde foran a parar. Sí me’strañou bastanti qui nun uyí’l estrueldu de pigar nu suelu la fardela, peru cumu yera inviernu penséi que la güerta tendría muita muruxa ya faía de culchón, pur esu nun se uyía. You tumbei-me nu camastru yal mumentu taba durmiu. Peru lu pior de tou foi al amanecere al día siguiente que amirei pu la vintana pa ver ou fora a parar el postre de la nueti, ya na más abrir la vintana, ya vi lus marianus culgandu de lus cables de la luz cun tou’l marrón al aire. Casi nun lu criía, candu asomei de nuevu las napias pul ventanucu ya vi a unas mucheres riéndu-se y’amirandu pal espanta páxarus aquel. Pa que nun pinséis que estu ía inventu miou, direi-vus que pasou-me al poucu de tar cunus flairones de Corias, ya pa más pistas tamién vus digu que foi tandu nuna pinsión que taba astoncias na calle Mayor en Cangas. El ventanuco pur ou lancei‘l ricau daba pa las güertas que había na Veiga pigadas a la cuesta que sube pal Curral.
You salí timpranu d’atsí pa que nun se rieran de min ya nun supe más d’aquetsu. Supungu que lus de la luz sirian lus encargaus de desculgar el munigoti de lus cables. Igual Caco sabe cumu foi‘l riscate. Anque na quetsus tiempus tuvía nun trabachaba Xuaquín na Eléctrica, purque yera un nenucu apenas. Peru tindrei que priguntatse-lu candu lu vea, pur sacasu uyíu a lus más viechus cuntar algu de lus culgadixus de felpa vuladores.
Suscribirse a:
Enviar comentarios (Atom)
5 comentarios:
Muchacho, dentro de las pocas cosas que tengo claras en cuanto a tu persona, sí hay una sobre la cual no me puedes engañar, es que, de verdad, sí eres de campo. Pero de campo, campo. Vamos, casi montaraz.
De todas formas me ha gustado tu exposición y el conocimiento que tienes de la flora local, así como, sus posibles utilizaciones. En ese aspecto eres todo un maestro. Un poquitín escatológico pero tienes gracia.
Si me permites te haré una observación. ¿De dónde sacas tanto tiempo para elaborar tantas crónicas rurales? ¿Quién te hace tu trabajo mientras te dedicas al periodismo “marrón”?
¡Ay munín! si tu supieras lu pouquinín que didicu you a tar tumbau ya durmire. Asina toi que me caigu de suenu en calquier tsau ya todas las horas. Nun fai falta que naide m'emburrie no.
El trabachu fáigu-lu you solu, sin apenas ayuda de naide. Pa esu tengu you xeitu abondu, ya tuvía me sobra ho.
Ya esu de piriudismu “marrón” ía pu lu que cuentu aiquí, que vusotrus tse chamáis escatulóxicu? Pois ía tan normal ya natural cumu la vida mesma. Marrón u marietsu, ía lu mesmu, anque a vusotrus vus parezca urdinariu ya extranu.
Ya pregunto you. ¿Esu de tar to’l día buscando flairones, nun vus veis fartus ho? Si nun lus atoupais vais tiner que naspiar a chamar a Lubatón, que ese home sí lus alcuentra escapau.
Querido Chusin, te voy a contestar por alusiones,si lo pienso un poco igual no merece ni la pena, como muy bien sabes, no me gustan los anónimos. No consiste en buscar "Frailones",como tú mal dices,en tal caso frailes y los busca el que quiere, té tengo que decir que tampoco es ese es el objetivo. El objetivo es muy claro: Intentar contribuir buenamente al blog,aportando datos de personajes más o menos famosos y que tienen unos "ciertos" lazos de unión con nuestro Colegio, pero esto igual no lo entiendes.-
Home, Miguel Ángel, tú pu lu menus tienes la deferencia de contestá-me. Peru nun te cabrees cumigu home, yera una broma. Es que you de flairones quedei hasta la curunietsa de semejante tropa. Peru nun te olvides que tú ya you fuimos, ya seguimos siéndulu, amigus.
Ya sei que a ti gústante muitu esas cousas del arte ya paré-me muitu bien. Esu ía señal de sos un home refinau ya cultu non un tarugo cumu soi you. Peru cada un ía cumu Dios lu fixu. ¡Qué tse vamus a faer!
No Chusin, ni soy "refinau" y por desgracia menos "cultu",como tú tampoco "yes un tarugu".Ye una pena que de una vez por todes no te quitaras la mascara, pa poder decite fuimos y somos amigos,pero...sin saber quien yes...
Publicar un comentario