¡Huy, huy, lu que dixu La Gúmer!

Buenu, pur fin ya diu la cara el pendunzón de la Gúmer, peru casi yera mexor que tuviera catsada. Ayer pu la nueite, ya bastante tarde, chamou-me esta muchere ya pa nada; na más que pa dame un bon disgustu, miánicas. You na más uyir el teléfanu asustei-me tou, cumu yera tan tarde, pasaban de las doce la nueite,  penséi que a mia madre tse pasara algu en Cuenca viendu la prucesión de Las Turbas.

Cumu nesta prucesión  van muitus  burrachones, qui son lus que insultan al Cristu ya cháman-tse burricadas, hay que tiner muitu cuidau cun etsus, purque algunus  van fartus de Resolí hasta la gorxa ya  nun rispetan a naide, ni a las mucheres mayores siquiera. Peru non, neste casu pinsara you mal, yera  la rivultosa de la Gúmer que quiría  disculpá-tse cumigu ya pur esu taba  más cuepa ya mansina que  la mía gatina piquena candu duerme a lus mious pías na cama. Cumu etsa  sabe, que tien-me amenazau el furaxas  del sou home pur la sua culpa, tien miedu que vaya you a dexá-la tirada cumu si fora una alpargata, ya me marche cun outra.

Na más preguntá-me cúmu me iba, díxu-me que tuviera sirenu, que nun tuviera tserza ninguna que cumu etsa me quier tantu que ya había suluciunau  el prublema cunu exmaridu  pa que nun me pasara nada ya you tuviera tranquilu. Astoncias díxetse  you, ya cúmu lu fixiste ho. Cuntestou-me etsa que, tuviera que pinsar bastante, peru espués de tou, que tse  resultara muitu más fácil de lu que creía.

Nun se tse ucurriu mexor cousa que dicí-tse al cafre del ex que you solamente yera el pudólogo detsa, el que tse arreglaba lus pías  ya que tamién tse faía  la manicura de las uñas de vez en candu,  peru qui anque yéramos bastante amigos, nun había nada de lu outru entre nos, purque you yera de la cera d’enfrente, u gay, cumu dicen agora.

Yal  desgraciau este d’alemán paré que se lu criyiu del tou ya tranquilizou-tse de mumentu. Creu que dixu: ya me paecía a min que ese quilicas tinía algu raru. Na más ve-lu nu ritratu, nesi que se arrimaba tantu a ti, paeciu-me un poucu  maripusón pu la roupa que tsevaba puesta; subre tou pu la camisola de tsunares marietsus ya verdes que gastaba sin mangas.  Ya cun esu paré quel animalón  quedou cunvenciu de que yera virdá lu que tse decía la aldrumeirona de la Gúmer, ya nesi mesmu  mumentu, paré que tse cambiou  la caretsona,  tranquilizou-tse, ya escumenzou a cantare ya bebere cerveza cumu lus xatus beben l’augua.

La Gúmer cumu taba toda cuntenta pul éxitu que tuviera, espetou-me lu siguiente: Jesusín, ¡ay miou nenu tou!, cumu ves ya ta  risueltu’l prublema que tantu t’aflixía. Pur ti faigu you lu que sea nicisariu, chatín ¿Cúmu pudías pinsar que iba you a deixar que te esfucinaran pu la mía culpa? Miou nenu tou,¡qué guapín ía! Mi alma paré un artista.

¡Mira!, na más que  oyí estu pur bouca de la Gúmer, despois de lu que dixera anantias de min, caguei-me na madre que la pariu ya  na sua raza toda. A quien se tse ucurre decire una cousa asina tan fea del sou noviu. Esta muchere mi alma que ta más p’acó que pa acutsó. Cunus anus que tien ya debía de tiner algu más de sentiu ya cunucimientu. Peru al ve-me cumu taba, tan encendiu, asustou-tse bastante la xabardona esta, anque etsa nun paraba de  reíse a lu tontu, asina cumu si fora tola.

A min paeciu-me muitu mal estu que me fixu la Gúmer. Nun se lu perdono, non. Ya tse dixe que tse diga cuántu anantias al mata la osa del home, que esu que tse cuntou  ía tou una mintira que you nun soi  de la cáscara amarga cumu dicen lus gaditanus, nin nada paeciu. Ya si esi cafre de home, tien algu que riclamar, qui me lu diga;  qui si tien lu qui hai qui tiner, que venga a ve-me al puelu que va salire trasquilau.

Espués de decire estu de min la zurrona de la  Gúmer, toi endemuniau. Cúmu sirá, que entrou-me tal rabia, que ya nun tse tengu tserza nenguna al muntón de grasa  roxa ese del alemán.

 Además, nun nicesitu a nadie que m’ayude pa rumpetse la crisma. Primeiramente voi curré-lu a murrillazu tsímpio pur tou’l puelu hasta que me canse, ya espués cutserei  un estadueñu del carru pa abritse la cabeza en dous cumu si fora un calabazón, ya dipasu apruveitu p’arrancatse lus cuernos a esi curnalón. Voi dexa-lu mochu cumu si fora una ouvecha churra.

Tien miga la cousa. Qué bien taba you solu cunas mías vacas, pitas ya gochus,  sin mucheres ni rayus. Toi fartu detsas. Nun mi dan más que prublemas. Mi alma que voi a faer cumu lus flairones: las mucheres, lonxe detsas, que las mantenga sou  padre que pa esu las enxendrou. Cumu pa fia-se  detsas. Subre tou de las qui nun  cunoz unu,  ni de la vida que tuvienun estas pelandronas anantias de atoupá-las.

Candu  chegue’l cuentu a lus uyius de lus rapaces de Tinirife, tantu al de Tebongu cumu a lus sous amigus,  qué dirán de min. Di mumentu, igual se lu creen. Si vuelvu a  ve-lus a Tinirife van curré-me a varganazus lus  que mi conocen purque dirán: mira que catsau lu tinía este xulandrón que yera del outru tsau y’andaba prisumiendu de que yera un bon curtexador.

Lus cuentus entáman-tse escapau,  peru pa desfae’l entuertu ía muitu más custosu. Pur esu hai que tiner muitu cuidau cunu que tse  diz de outras personas, sin sabere si ía virdá u mintira lu que tse cuenta. Peru ta claru que la Gúmer, anque lu dixera pur tsibrá-me de lus trumpazus del cafre,  ía una gran aldrumeirona ya impustora. Ya nun quieru nada cun etsa. Que tse den pur onde se cumienzan lus cestus.Ya cun esu alón.

“Jesusín”, el pelgar