“Jesusín”, el pelgar, responde

Dixu’l outru día este rapaz de la costa, Milio Ramón, que si el subrinacu miou, esi  que vus dixe qui anda tou‘l día ritratandu lus bichacus candu lus atoupa  chapandu, si nun me fixera a min algún ritratu desus tamién candu toi cuna mía novia. Pois direitse que non. La Gúmer ía muitu vergoñosa ya escuende-tse muitu hasta pa deixa-tse que la  beise. Nun quieru deci-vus cumu ía pa lu outru, en cantu oi un ruiducu de nada  anóxa-se escapau de la mía vera. Tenei en cuenta que la Gúmer ía una muchere muitu guapa peru tamién ía muitu seria ya formal, ya va tiniendu anus encima; pu lu tantu la calentura tamién  tse va pasandu cumu a tous. A esta mucherona lu que más tse gusta ía que tse faigan arrumacos, que la afalaguen cumu si fora una gatina piquena mansina,  ya que la beise nu pescuezu ya ditrás de las urechas. Ía muitu picarona, úntase-se bien de pirfume del buenu pa que you tse cheire ya esqueire  nesus sitius que tien muitas cusquietsas.

Nos pa faere lu mesmu que faian lus moscus nel ritrato del outru día, resulta-nus muitu defícil ya’nredosu. Faemus-lu poucas veces purque etsa sempre pon disculpas. Si fora pa beitsar pa esu nun ta cansada non. Unas veces duel-tse la chola, cumu faen la mayoría de las mucheres, outras veces tien tserza que nus atrapen en plenu xulgoriu. Na casa tien muitu mieu qui nus oigan pul  estruendu que mitemus purque nun para, nun se ta quieta. Ya nel campu nun tse gusta fae-lu. Di que tse pinchan muitu las pachas  ya lus artus  nu traseiru.

Esu ía mintira purque you sempre buscu bonus praus bien tsimpinus baxu la sulombra de lus freisnus, rebotsus u de lus humeirus, peru estas mucheres de capital nun tan axeitadas pa lus reblincus que nos faíamus de rapaces nus parreirus  pul branu candu mitía-mus la yerba, ya’l restu‘l anu tamién. Atsí sí que picaban todas las yerbinas, hasta lus tarrietsus ya las carbazas se’spetaban  pur encima de la roupa ya tou al tar secus. A estas  rapazas gustan-tses más lus camastrus ya lus sufás.

You cumu criei-me nu campu prefieru faé-lu al aire libre ya nun tengu remor de anialá-me  anque fora encima de un bon bascachu de xiñestas u fulguera, cun tal que nun  foran burtigas val-me tou;  llegau el casu, anque fora encima de escambrones. Ta la cousa bona, cumu  pa desaproveitar las cuntadas ucasiones que tse presentan a unu.

Destu de lus retratus en situaciones cumprumetidas, tengu you un ricuerdu de una tardiquina  de domingu que acabábamus de xebrar del Cine Trébol ya puxímu-nus a mixar varius guajes de Corias contra la paré al final de la calle del Paseo. Un poucu más pa lantre del Cumerciu de Secundinu (l’hermanu de Basilio), na quetsus tiempos  nun había casas por atsí apenas. Sigún sacamos tous  la’squitana, nesi mesmu mumentu apareciu por atsí un municipalón que quiría multa-nus ya’scapau sacou una tsibretuca del bolsu ya escumenzou  a escribire, que nun toi siguru que supiera muitu. You prutestei ya’l merdeiru aquel de la gorra de platu taba empeñau en puné-nus cincu durus de multa pur mexar na vía publica. You reía-me purque de ou  pensaría aquel malandrín que íbamos a sacar nos lus cincu durus. Cumu nun foran murrillus del riu taba apañau, peru nun catsaba ya taba emperrau en acoxoná-nus ya mité-nus mieu nu cuerpu. Peru, nuna destas pasou pur aitsí un home mayor que yera muitu seriu, que pruvenía  de la cuenca minera central, peru tsevaba trabachandu muitus anus nas minas de la  cuenca del Narcea y’al ver la trefulca diutse pena de nos ya díxu-tse al merdeiru’l guardia que, cúmu nus iba a multar si nun había en toda la Vitsa unus míserus urinarius públicus pa puder mixar lus guajes,  ya que esu dibiera ser  lu primeiru que debiera faer el ayuntamientu en vez de dedica-se a puner multas. Tan bien se  lu dixu aquel home, quel tontu la gorra  platu, que tinía cara de bartolo, quedou-tse  mediu pasmau. Nun supu que cuntestá-tse ya escumenzou a meranus de riguilón peru  dexou-nus marchare. Sempre tse agradecí el detatse aquel que tuvu'l home cun nos.  Pasaus alredor  de venti anus recurdéitsi-lu un día tandu lus dous nu Braña Nueva tumandu un vasín pu la mañena ya’l home ya nun s’acurdaba, peru you quedéi agustu, purque al menus, pude cunvidá-lu. Bien mereciu lu tinía ho. Aquel paisanu cumu yera seriu ya formal tou’l mundu lu rispitaba ya tse faia casu de lu que dicía. Sempre m’acuerdu del. Tamién direi que andaba muitu bien vestiu ya eleganti, yera un home cumu Dios manda. Nun digu’l nome purque la virdá, nun m’acuerdu bien.  Peru lu’mportante ía’l asuntu.

PD. El pullinín piquenu del ritratu va amadriná-lu la Gúmer candu chegue. Ya me dixu etsa qui iba puné-tse un nome alemán que ya lu tinía escutsiu. Sabrá Dios cúmu tse chamará. Desta muchere pode espera-se cualquier cousa. Peru anticipou-me que tinía duda entre punetse: Cottony u Behaart que quieren decire: algodonosu ya peludo, rispitivamente. Tamus apañaus. Ya cun esu alon.

“Jesusín”, el pelgar