Jesusín ta’ntucau

Güei nun m’alcuentru nada bien ho, tsou paré qui tuviera tsuniegu del tou. Tsevantei-me al amanecere del cubil cunun dulore nu piscuezu que nun lu aguantu. Nun pudía parar nel camastru. Toi tou entucau cumu si tragara un palu de las fabas. Cúmu sirá que nun puedu amerar pa lus tsaus sin ribeirar tou’l cuerpu. Ya pur si fora poucu cun estu, al puné-me a mucir a la Cachorra, pisou-me’l xatu culón que ta atau al tsau de la vaca nun pía, ya saliu-me un tombo cumu un güevu de pita,  ya encima ta tou renegriu que mete mieu ve-lu. Caltrizou-me’l pisutón hasta’l güesu. Mi alma toi  trespeitau d’afeitu.

Aiquí nus puelus estus altus candu tiné-mus dulores nu piscuezu, las mucheres machores echan-tse la culpa a las malas pusturas de durmire; outras dicen que ía debiu a que cuetses fríu pul día nu monte, ya nun  siendu cun calore nun hay xeitu de sacá-tse-lu unu del cuerpu. Tamién tan las mucheres más picaronas que rínse dunu pu lu baxu ya farfotsan entre etsas: esti güei debiu tar  cunu culu al aire gran parte de la nueti, ya acatarrouse-tse el piscuezu.

Encima agora, cun estu de la TV de tar tantu tiempu lus subraus escuitandu  lus prugramas esus de la salú que dan pu las mañenas, casi ya nun fai falta nin  ir al médicu;  en cantu dices que te duel algu, calquiera que te delantre, ya quier ricetá-te sin pidítsi-lu. Estas pirsonas que tan tou’l día pigadas a la tilivisión crein-se que saben muitu destu ya dicen-tse a unu pa tou, que lu que tienes  ía estrés. Anantias nun sabíamos naide  que yera esu del estrés. Dichosus de nos. Nestus tiempos,  tou lu malu que nus pasa, tien la culpa el estrés esi. Riniegu lus demonios de todas esas munxergas. Mi alma que nun nus faian  falta nenguna.

You, anque nun soi viechu tuvía, ya  tengu muitas guteras ho, subre tou cunu reuma ya cunas rudichas;  candu cambia’l tiempu pa chuver  poninse-me  duluridas ya infladas cumu botes. Encima cumu tengu las patas muitu tsargas, casi cumu si foran dous menales,  andu pul camín tou atravesau qui  paezcu un trangalazu. Mi alma que sí. Ya agora pur si fora poucu cunu de las rudichas, vien-me estu del entucamientu’l piscuezu. “Perru flacu todas son pulgas”.

You cunu dichosu reuma esti, toi pirdiu. Candu m’ataca bien andu casi arrastru, apenas puedu tsevantá-me. Dixenun-me que yera muitu bonu datse friegas cun alcohol alcanfurau ya tamién cun untu ranciu marietsu  de gochu,  anantias d’ir a durmire. Peru you tengu’l prublema que me falta quien  me dé las friegas. You solu nun m’apañu. Ya esta timpurada que  mia madre nun ta’n casa tampoucu, nun sei que faer. En Cangas sei que hai algunas rapazas que son desas que tses chaman  fisioterapeutas, ya creu que dan las friegas muitu bien. Peru you nun me fiu muitu del que me lu dixu purque sempre anda cun bromas ya burricadas. Ya güei día cumu ia tou una trangallada na vida, piensu que  me lu pudu decire   pa reisi de min.  Igual candu tse lu diga  you a una desas rapazas, qui voi a que me dé unas friegas,  sulména-me una bona xustrada, ya esu nun lu quieru you. Nun vayan a  pinsar esas mucheres que lu que you buscu ía qui etsas me den las friegas peru, non na rudicha precisamente, sinon un poucu  más arriba. Agora si que echu bien de menus a la Gúmer, peru nun sei nada que ía detsa.

Estus anus datrás tiníamus aiquí nu puelu un home que yera’l parteiru pa las mucheres , pa las vacas, pa las gochas, pa tou, ya  tamien  el que capaba lus gurinus. Esti home tinía una gran manu pa tous lus dulores de güesus ya reuma. Peru’l probe murriu fae un tiempu,  ya quidamus abandunaus sin nadie que sepa desas cousas.

You a veces candu vien a casa, Don Xuaquín el vitirinariu, a ve las vacas priguntu-tse si nun me valdrian pa min lus mesmus midicamentus que tses damus a lus xatus ya lus gochus. Él rii-se ya diz: Jesusín nun seas anemal ya cafre home, paeces tolo. Ya you catsu la bouca peru, mi alma, voi cuntá-vus lu qui fixe el anu pasau candu tamién tuve la rudicha ya un pía tan  hinchaus  que paecían la bola de xugar  lus bolus.

You alcurdaba-me  que una xatina nuesa tuviera una pata muitu mala ya hinchada dun riturzón ya cunu que tse diu’l vitirinariu sanou escapau. Fui a un armariucu que tinemus na bodega pa estu de lus midicamentus del ganau, ya busquei lu que esti home tse ricitara. You tengu la custume d’anutar tou lu que diz el vitirinariu ya escribu-lu pur fora na caxa pa lu qui ía cada cousa,  asina  n’adelantre ya lu sei ya nun tengu que chamar a naide.

Sigún toi amerandu entre tou aquel bilén de frascus ya ví nuna caxa que punía pur fora: supusitorius pa la pata de la xatina. Abrí la caxuca aquetsa ya quedaban-tse  cumu catru u cincu pruyictiles tuvía, peru yeran  muitu grandes. Direi-vus que yeran cumu caxinas de fréxules, u más.  Peru you cumu taba tan duluriu del pisutón nu pia dixe pa min: si sanou a la xata cúmu nun me  va sanare a min. Claru que me sana. Cutsí uno, ya disinvulvi-lu peru nun vía la forma de culucar aquel cachu fuso nel sitiu que tse currespundía. Dixi you, Dios mio, peru pur onde tendréi que espetá-me esti cachu turpedu. Peru cumu tou na vida. Poucu a poucu foi culándu-lu hasta que pasou tou. Ay Dios, una ve que tuve dientru aquel demoniu, you nun paraba, paecía que me mitienan una brasa ardiendu nus baxus, daba unus curcobus cumu’n corzu. Peru ya feita la barrabasada nun me quidaba outru rumedio que aguantar ya catsar la bouca. Di unas carreirinas alredor de la currada pa desemular ya dipasu pa vere si me floxaba el dulore un poucu, peru na más ve-me curriendu daquetsa forma dandu saltus la vicina díxume: home Jesusín agora faes footing. You cumu nun sabía lu que yera esu cuntestei-tse. Non, nun faigu footing non,  ía que nun paru de lu que me escuece’l culu. Etsa tomou-lu a xirigonza mía  ya reíasi. Peru candu chegou  la nueti  you taba muitu mexor, casi  cumu novo;  ni  me dulia, ni tinía  apenas hinchazón.

Pasaus unus días  vulviu pur casa Don Xuaquín a ver una gocha que taba pa parir ya   dixe-tse-lu, peru él nun me criyiu. Díxu-me, Jesusín tas tontu del tou, cada día que pasa vuelves-te más bardín ya más brutu.

You ríame pa dientru ya dicía pa min: sí toi tuntu, toi tontu, peru el dulore pasou-me  pur cumpletu, ya quitóuseme‘l tombu. ¡Qué sabran etsus! Anque estudien muitu nun tienen el sentiu qui tinemus lus que nus criamos  xuntu a lus  animalinus. Nel fondu tamus feitus de la mesma madera: homes, gochus, xatus, pitas…. Miánicas que sí. El que piense lu cuntrariu ta apañau. ¡Home non!