CUOÑU, MUITAS GRACIAS PUR ENVITÁ-ME, OH

Rapaces: ¡Qué pasa oh! Digu-vus que casi atsouquezcu you solu estus tiempus, ya nun ía  pur nada nespecial, non; sino purque chevá-mus toda la simana, esta que pasou de tantus días de fulixa, que nun pudia-mus nin revulvé-nus aiquí  na budega de casa: taba-mus rudeaus pur tous lus tsaus de caldeirus, maseirus, el bancu de matar, bacitas, carne, untazas, tripas, murciechas, tsinguanizas, andochas, butietsus, choscus, uñus, tsacones, lomos, xamones, cabezadas, zarraus, toucinus, custietsas,   mundongo, turruchus, pimentón,  bramante, salmueira, cebotsas, axus, perexil, sangre pa faer las  murcietsas ya las fichuelas, vixirigas, más tripas, fégadus, pulmones, curazones, reñones, tsinguas, feletes, otsas chenas de manteiga.., lacabouse. Home, nun ía pa menus la cousa. Minudu tinglau. Matá-mus catru gochus cumu magüetus de grandes, dun muntón darrobas cada unu,  ya pur si fora poucu,  una matona a medias cuna familia de Rulindes, que comprara-mus na feria de San Andrés;  cúmu pa nun habere axagüeirus ya esnalazaus na nuesa casa. A mín lu que más me anoxa de tou estu, ía el glachiu de morte de lus gochus yal gulor esi que manda la sangre al revulvé-la, ya la carne cuandu ía muita. Pon-me tsarizudu dafeitu, peru que tse vamus a faer, nun hai outru rumediu que aguantá-lu ya catsar la bouca; esu, ía asina. Subre tou, si quere-mus tiner na casa,  de cumere durante‘l anu.

Peru a pesar de tou este belén de la matanza, tamién hubu dalgún día, que pu las nueites, mientras asperába-mus a que cuchiera’l sal el picadillu de lus churizus,  nun ratadín agüechaba’l blog un pouquinín ya  riía-me cuando tseía que me chamaba-is pa que fora a cumere invitau cun vos a esi tsugar que priparan el Pote asturianu cun muitu xeitu,  Casa   Migio de Urbiés, que ta cirquina de Turón. ¡Qué más quisiera you! Peru, toi apañau rapacinus; pu lu menus nun mes u más,  nun puedu muvé-me daiquí de casa. Pa outra ve sirá. Agora, aparte de axeitar el ganau, todas las nueites tengu que prinder el fou nu cucinu de tsariega, cun xiñestas verdes pa curar al fumu las varadas que tinemus culgadas de murcietsas, butietsus, lomus ya tsinguanizas. Esu ía lu más empurtante de tou, nun vayan a echá-se  a perdere. Una ve que te tou bien  curau del fumu, tengu que subí-lu a l’horriu.

Destu de la envitación, ía una pena que  nun se m’arregle el ire. Ya gustaba-me muitu‘l sitiu esi qui escuchiste-is, purque fai un muntón de anus, yera you piquenacu tuvía,  seiqui fui-mus un rabañau de xente d’aiquí de Cangas cun Don Herminiu , el cura L’Acebu,   de excursión nun autucar de lus de Secundinu‘l Puertu (hirmanu del P.Basiliu), a ver el vatse enteru de Turón. Ricuerdu que tuviera-mus agüechandu ya chapinandu pur ou ta agora el  munumentu al mineru, ya tamién tuvi-mus dientru dun antigu pozu de mina que se pudía visitar peru a las mucheres daba-tses  muita tserza. Outru amiente, aquetsa excursión gustou-nus muitu a tous, yal  vatse  enteru de Turón tamién, purque ía guapu ya bonu abondu. Peru naquetsus tiempos nun ricuerdu que ya tuviera Casa Migiu cumu ta agora. A nos a cumere seique nus  tsevá-nun a Mieres a una sidrería muitu bona que yera cumu una budegona grande ya muitu atsargada. Creu que ya nun ta abierta, u cambia-nun lus dueñus el nigociu. Tamién pudu ser un sitiu particular que foran amistades de don Herminio. Esu nun lu ricuerdu bien.

Destu outru de la matanza alcuerdu-me you que siendu piquenu nu miou pueblu taban nuna casa cuna máquina de picar la carne  faendu las tsinguanizas ya un guaxe piquenacu mitiu un dedacu nun fracu de la picadora, ya outru que taba’l tsau ya nun  lu agüechara muviu la manivela ya curtou-tse la punta’l dedu. De mumentu’l guaxe nun gurgutou parula ya etsus siguie-nun picandu, hasta que tse vie-nun el dedu tou ensangrentau ya que burbutaba tanta sangre que nun había modu de curtá-tse la hemorraxia. Astoncias el nenacu escumenzou  a churamiquear ya dienun-se cuenta de que se lu curtara la cuchilla de la picadora. Nese mumentu, agarrá-nun al rapazacu nun brazau, ya escapau fue-nun cunel pa Cangas al médicu. Una ve que lu curá-nun vulvie-nun pa casa cunu nenu mediu adurmilau pu la nastesia ya nun se acurdá-nun  más del cachu del dedu ou pudía tar. Cuandu tinían las tsinguanizas ya feitas ya atadas del tou, una rapacina dixu: yal cachu’l dedu  ou tará. Buena la amañou la guaxa al decire estu. La muchere de la casa dicía picaus al pinsar que tinían que tirar todas las tsinguanizas purque nun iban a cumere’l dedu del rapacín. Outrus dixé-nun que esu nun tinía empurtancia, que al que tse tucara ya lu nutaría purque la chicha de lus homes paré que ía muitu dulzona.

Espués de muitu farfotsar entre tous, la cousa quedou en que las tsinguanizas solamente pur esu, nun  iban a tirá-se. Lu que había que faer yera tar al tantu pa cuando las tsaparan  andar alietsus pa nutá-lu ya que’l dedu tinía la uña cumpleta. El casu ía que, las tsinguanizas acabánun-se todas, ya más que hubiera, ya naide nutou nada. Cumu sigún dicen lus médicus que  pur adientru las pirsonas somus muitu paecius a lus gochus, se ve que nel sabore de la carne tamién. Ya cun esu alón, muninus. Esto ía tanta virdá, cumu  la tsuz que nus atsuma a diariu ya que nus manada´l Tsourienzu cada día.

“Jesusín”, el pelgar