LA TÍA DE RULINDES

Güei que tengu tsibre un ratadín, ya apruveitandu que agora mesmu toi aiquí nu cucinu,  sintau nu tayuelu de mucir las vacas,  mientras queiman las xiñestas ya lus ganzus que tengu prendius  pa afumar bien las varadas de  mundungada que tinemus culgadas, voi cuntá-vus alguna cousina, sin empurtancia, cumu de custume, de las que faia-mus de piquenus lus guaxes nu miou pueblu. Ya lu sabéis, peru you yera un poucu enredador ya algu sinvergunzacu tamién;  eso que vaya pur delantre, hai que dicí-lu lu primeiru de tou. Tamién voi dicí-vus un sicretu que  nun se lu cuntei a naide tuvia: you, ya desde  ninacu, gustába-me muitu agüecha-tses las tetas a las rapazas. Yera’l deliriu miou astoncias, ya agora tamién.

Cumu ya dixí-mus noutras ucasiones, naquetsus anus de espués de la guerra, lus esculinus iba-mus xebraus  a la escuela: lus nenus tsevaban-nus pa un tsau ya las guaxas pa outru. Nel nuesu pueblu las escuelas taban lonxe una del outra. La de las nenas yera más piquena que la nuesa  purque había muitas menus nenacas que nenus.

 

You tinía de vicinus unus rapacinus que yeran una gatafueira de hirmanus del demoniu, peru yeran buenus nenus, ya muitu tranquilus, casi  un poucu pasmaus. Muitas mañenas al ire pa la escuela xuntabamus-nus cuna nena vicina que se chamaba Rumedius, que yera tía de la Rulindes, que espués esta muchere casou-se cun un rapaz muirazu ya fuxiu pa outru pueblu lonxe del nuesu. Este rapazón muirazu que vinu a curtexar al nuesu pueblu, falaban del que tinía la mexor facienda del vatse, peru a la Rumedius dábatse mala vida. Lus vicinus farfutsaban entr’etsus que vareixába-la a minudu. Menus mal queste xabaril murreu xoven ya etsa pudu tsevantar la testa ya axeitar de nuevu la vida. Agora sei que  ta repotsuda ya farfantona cumu etsa sola. Purque quedou bien farta de homes ya nun querrá más, peru si quisiera, sei-lu you que  tien-lus itrás detsa a rabañaus.

La rapaza esta  tía de la Rulindes, Rumedius,  de xoven yera una gran muzona cun muita xixa, guapa ya fuerte cumu un rebotso, ya  más salerosa que una munietsa. Naquetsus tiempus na sua casa tinian un rabañau de vacas que Dios nus tsibre, ya cumu yeran pouca xente  pa trabachare apruveitaban el saleru yal rixu de la guaxa, ya cun esu nun la deixaban parare en tou’l día a la probe nena; etsa yera la que faía tou lu del ganau pulu  facindiega que yera; miánicas, faía muitu más, etsa sola,  que lus outrus tous xuntus.

El sou pai taba tou derranau de la mina ya nun faía más que bebere buenus xarraus de murapiu ya cuchere buenas farturas de butietsu cun patacas blancas enteras. Ya la muchere yera muitu más viecha quel, ya muitu minudina ya delicada; siempre taba queixandu-se de la reuma que tinía nun cadril. Esta mucherina  nun valía más que pa fae’l caldu ya pa tsabucar un poucu la roupa. Menus mal quel  rigueiru tinia-lu al pia de casa, si non cumirían-lus lus pioxus.

Cumu digu, esta Rumedius  na más tsevantá-se del cubil tinía que barre’l cuitu de las cortes,  mucir un rabañau de vacas ya tseva’l tseite a la esnatadora tous lus días, anantias de fuxir pa la escuela. Ya cumu esta nena nun taba tsibre pa nada,  en tsavá-se tamién gastaba poucu tiempu, ya cuandu lu faía yera asina cumu lus gatus: un pouquinín la caretsona, las urechas yal piscuezo. Peiná-se un poucu lus gadechus ya pa la’scuela a tou miter. Asina tse quedaba un curdón negru nu fondu la gorxa, que paecía un cullar de azabache. Esti curdón duraba-tse toul inviernu hasta que tsegaba’l branu que astoncias tsabábase mexor, mitiendu-se nun balde de cinc calentandu’l augua al sol un ratau na era anantias de mité-se dientru.

Alcuerdu-me you de ve-la muitas veces dublada na cucina detsa echandu-se unas muzadas de augua a la cara de una palancana que tinían toda tsena de botsos ya cascarolazus. Una ve bien tsavucada, sicaba-se cunu mandil. Peru lu mixor de tou yera questa rapaza tinía unas tetas grandísimas ya ridondas cumu manzanas del Paraisu. Nos, lus rapacinus, andábamos tous alietsus pur vetse-las. En mia casa tiníamus algunus praus pigaus a lus detsa ya muitas veces coincidía-mus atsí lus dous cunu ganau. Chamabamus-tses lus praus de la Fonte. You en cuantu la agüechaba que taba nu prau la Fonte, cuchía’l ruedu al tsombu ya fuxía patsí al mumentu pa tar cun etsa.

You dicia-tse muitas veces: Rumedius, güei nun te tsavaste bien. Ya etsa cuntestaba, si oh, cumu tous lus días, ¿purqué dices esu?. Astoncias fixisti-lu poucu purque vense-te las tsorzas negras nu fondu’l piscuezu. Nese mumentu etsa punía-se  toda tsarizuda  ya escumenzaba a desabutuná-se la blusa  pa amerar si yera virdá lu de las tsorzas; you amagaba-la diciendu-tse: más abaixu, más abaixu, ya etsa cumu tse daba muita rabia de que le dixera que yera un poucu guchona, faia-me casu  ya siguía abriendu’l faragachu aquel de  blusa que tenía, ya astoncias escumenzaban  a vese-tse las tetonas que, anque taban un poucu foscas, minudu  guapas las tinía. A min punianse-me lus güechus cumu lus de lus carneirus. Cuando etsa cumprubaba que fetivamente del piscuezu pa baixu taba negra cumu’l culo del pote, daba-tse muita vergoña, puníase culurada ya escumenzaba a afacá-se la roupa ya tapába-se escapau. Astoncias farfutsaba pu lu baixu axagüeirus ya dicía-me que you yera un tsangurdiu ya un faltosu. You catsaba la bouca, ya ritsaba lus caniles pur nun puder vetsé-las pur más tiempu las “guanábanas”, cumu dicen las cubanas.

Peru en cuantu pasaban unus días que vulvia-mus a xuntá-nus pu lus praus, you vulvía a dicitse-lu, ya etsa insiguida dicía: mira  a ver cúmu lu tienes tú munín, peru escapau escumenzaba outra ve a desabutuna-se la roupa pa vese, ya mientras esqueiraba de un tsau pa outru en busca de la roña, iba enseñandu  un pouquinín aquetsas ubres tan guapas que tinía.  Siguru que tuvía güei, anque esta muchere ía de la quinta mía,  tendrá-las bien tseitas ya bien xeitosas.  La Rulindes sei que tamién las tien muitu guapinas ya bien axeitadas; lu mesmu , lu mesmu que  la sua tía.

“Jesusín”, el pelgar