PUR SAN XUAN ENXAMAN LAS ABECHAS

¡Hola rapazones! You faigu cumu’l Tarradellas aquel catalán, que si nun vus alcurdais del, digu-vus you quien yera. Yera aquel humecón que espués de tar muitus anus fora de sou tsugar pu la fuercia, d’acó p’acutsó, cuandu vulviu del exiliu a Cataluña, dixu aquetsu de: ja sóc aquí! You lu mesmu lu mesmu. Ya toi aiquí, oh. Tamién voi decí-vus que la munxerga esta de güei, cuincidiu cunas chamadas que me fixisteis, subre tou la del rapaz de L.lumes, peru ya diva you a fae-lu igual.

Esta tempurada datrás nun pude garabatiar nada aiquí nu blog purque andu tou derranau ya coxu pul’artrosis esa de lus demonios, que nun me deixa vivire en paz. Nun soi capaz ni de subire a l’horriu. Atacou-me de tal manera qui tengu las dedas de lus pias ribichidas ya tsenas de rinoyus abultaus  cumu si foran las cúcaras que tienen lus xamascus ya las canas de lus rebotsus nu inviernu.

Pur si fora poucu estu,  saliu-me tamién  un  cachu tombo  nu mediu’l txombu  que dios nus txibre, ya dixu-me’l curandeiru que yera de tantu afurcadar lus feixes de yerba ya de pacha entre’l parreiru ya  la corte las vacas. Anantias tiníamus un cebadoiru, un trapón,  que baxaba-tses la cumida a las vacas al mismu peselbe desde’l parreiru, peru agora ende que arreglamus la corte, quedánun-nus lus peselbes esveiraus pal outru txau. Habrá que faer unus novos, ou tienen que tar.

El tsunes pasau, saliu-me tamién un enxame del curtín de las abechas ya vi-me negru pa recuché-las you solu; nun quirían subire pal queisietsu ni pa dios. Engaramichanunse-me na caramietsa  la nisal de tal xeitu,  que nun yera capaz a faer buenu detsas. Menus mal que al chegar la nueite fuenun chapinandu pouquinín a pouquinín hasta que pude recutsé-las a todas dientru’l queisietsu que tengu pa cuandu se pousan nus gamachus de lus árbules. Pa que xebraran mexor pul  truébanu enriba estaceitses bien de yerba buena pur dientru. Asina ya tou, al esqueirar netsas, arreanun-me un muntón de picutazus de miedu. Tengu una de las urechas, hinchada ya roxa cumu si fora la de un cunexu xigante.  La virdá ía que dan muita lata las putas abechas, peru luegu cuandu vamus  a esmelgar lus truébanus pul branu, da muitu gustu richamber  las ceras bien tsenas de miel.

Falandu de tsambeus alcuerdu-me que nos lus rapacinus, outrus cuantus ya you, que tábamus feitus bonus galifates, de piquenus andábamos que alampaba-mus esqueiciaus pu la fruta que yera  dulce. Pu lus meses de xulio ya agostu vinían lus figus marietsus que pasaban lus caniles de tan dulces que taban. Nu miou pueblu había una figal que cargaba tous lus anus una barbaridá; puníase a la dobla. Cúmu siría que chegaban-tse las canas al suelu de lu dubladas que taban. Todas las nueites xuntábamus-nus varius  milandrinus del pueblu ya agatuñábamus pul tueru la figal parriba cumu si fóramus esquilus. El amu la figal taba fartu de que tse cumiéramus tous lus figus ya andaba itrás de nos que nun nus pirdía pasu. Un día atrapou-nus subius a la caramietsa de la figal ya escumenzou a murrillazu tsimpiou a nos. Nun  matou alguno de milagru. A uno de lus rapaces que yera’l más azariento ya retorciu tucou-tse un cantazu daquetsus nu tsombu ya dixu pa sí: “este cabrón de viechu va saber lu que ía bonu” Va salitse caru'l empeñu que tien cun guardar tantu lus figus. Nos catsamus la bouca ya escuitamus lu que nus dixu aquel rapacín: agora, na más queste merdeiru del demoniu fuxe pa casa ya nus deixe en paz, vamus a ir a la sua currada ou tien plantadas las berzas ya vamus a esfueirá-nus enriba detsas pur todas las fuechas, pa que mañana tse salga’l  caldu sabrosu ya pirfumau. Ya asina fiximus. Na más chegar a la currada deste home el diablecu gateou hastal picu’l muntón del cuitu que había al tsau de las berzas ya  baxou lus pantalones. Puxu-se en cucliechas apuntandu cunu traseiru pa las berzas ya díxu-nus: amirai cumu sal el sulfatu oh. Ya na más farfutsar estu, sultou una surriada cumu si fora una esquitana, miánicas chegou el caldu aquel marietsu  hastal mediu l’estaxu. Lus que tábamus amerandu revolcábamus-nus de risa ya diciamus-tse: outra ve, outra ve. Ya nefetu, el gurín aquel vulvía a echar pul fracu traseiru cumu sinun tuviera fin. Miánicas taba bien chenu ya inflau, paecía una vaca mixandu.

Al outru día la mucher de la casa andaba pul pueblo farfotsandu cunas vicinas que la nueite pasada na sua currada chuviera barru, purque pula mañena la berzas taban todas salpicadas de marrón, ya lu curiosu del casu yera que tseiraban a demonios. Hubu una mucher que tse dixu: María: nun tse des más vueltas, u sos fata. Lu primeiru que debes faer ía entruga-tses a “Jesusín” ya lus outrus mangantes  que andan cun él a ver lu que pasou. Lu mesmu  etsus saben quienes fonun lus desgraciaus ya gochus que te escagazanun  las berzas todas. La mucher dixu: quiá, esu  que falas nun puede ser  virdá purque al miuou Manulu güei prestoutse muitu‘l caldu ya dixu-me que sabía muitu bonu peru que cheiraba  demasiau a ranciu. Anque desus diablecus fiu-me bien poucu, ¿peru, si asina fora la cousa, nun sei cumu dimonius pudienun puné-se pa esfueirar  tan altu.

Cun dudas ya tou, la mucher al mumentu vienu a intrugá-nus a nos lus primeirus, pero nos diximus-tse que nun sabíamus nada, que  nos nun pudíamus faer  tal cousa purque tábamus tous estriñius aquetsus días, purque  cumu tonaba muitu, tábamus fartus de tsapar  tseite cuachada. Ya yera virdá. Ya vusotros sabeis-lu tamién lu mesmu que you,  que’l tseite cuacha solu cuando bien la tona. Mia mai cuandu‘l tiempu ta gafosu pa tonar, pon una escudietsa grande chena de tseite nu ventanu’l estroucasa, ya escapau ta cuachada. Espues pa mirendar, el tseite cuachau  mizclau cun miel de las abechas, ta bien bonu. Minudu tsambeu más ricu.  ¡Home non!

“Jesusín”, el pelgar