“JASUSÍN”, TOU’L DÍA D’ACÓ P’ACUTSÓ

Nestus mumentus pillais-me traspeitau del tou purque taba quitandu lus faragachus de lus dumingus que acabu de chegar de la Vicha, purque  vulvienun a chamá-me pur dous veces nada menus, esas demonios de las dintistas, que na más alcurdá-me detsas, pongu-me tou tsarizudu y’amurniau de la tserza que m’entra. Loutru día mandanun-me ricau por un vicín que foi a tou miter a Cangas a buscar al vitirinariu pa la xatina roxa que hinchou-tse que dios nus tsibre, duna fartura que cuchiu d’alfalfa muchada, ya dixenun-tse esas mucheres que son vicinas del vitirinariu, que  m’avisara pa que baxara you sin falta pa tumá-me las mididas. Pula mañena bien ceu,  apenas risca’l día, tsevanteime pa deixa’l ganau cebau y’arreglau. Una ve que despachei na corte, subí pal cuartu ya tsavuquei-me un poucu na palancana  ya de pasu curteime lus touzus de las barbas que faía una muntunera días que nun m’afeitaba  ya tinía unas serdas nu caretsón cumu las del xabaril. Espueis, tumei una escudietsa de tseite caliente cunun curtezu de pan migau, ya escapau cuchí el  tractor ya p’abaixu a tou miter. De pasu, una vez que taba na Vitsa, fixe algunus ricaus ya echei tamién unus sacus de piensu pa las pitas  ya pa lus xatus;  na druguería de Miliu cuchí unas pastietsas de xabón Tsagartu pa tsavar la roupa ya unas caxas de vinenu pa lus ratus. Onde Antón tumei unus chanqueirinus cunas patacas,  ya cuchí un garrafunín de vinu pa casa.

Na más chegar ou las rapazas estas de la dentame, taba aquetso atestau de xente. You asperei nel cabeiru la sulana un ratucu bonu, ya pur fin saliu una detsas  cuna menifalda pula metá  lus cadriles ya dixu: -¿Jesusín  el Pelgar? –Nesi mumentu you cuntestei-tse: sí, aiquí, aiquí toi. –Pasa, pasa pa dientru. Na más entrar sentanun-me nesa cousa tsarga que tienen etsas ya escomenzanun a riíse, peru nun gurgutaban parula. You catsaba la bouca ya escuitaba. Riíme tampoucu pudía, purque astoncias veisi-me que nun tengu dentame apenas, ya que toi furón del tou. Nuna destas acercouse la murenona  cun una petsa na manu duna cousa blanda cumu si fora farina muchada pa la tsavaza de lus gochus,  ya díxu-me que la mitiera na bouca ya que cincara bien lus caniles. You fixe lu que etsa me dixu pero al mumentu entránun-me unus gómitus del demioniu ya escupiceitse-la  fora. Etsas al nutar que me daban aquetsas arcadas tan grandísimas mandanun-me salir pal curredor, ya dixenun-me que tumara un poucu l’aire ya unus papadinus d’augua a ver si me pasaba. Al cabu dun ratucu que ya taba you más serenu, intentanun-lu outra ve. Asina ya tou,  miánicas pinsei riventar cun aquetsa cousa blanda que me chenaba la bouca d’afeitu, cumu si fora  una petsa de manteiga dura. Deixanun-me asina cun el pegotsu dientru  la bouca un ratau, ya cuandu taba a puntu de gumitá-lu sacanunme-lu. Nun sei que siñales  deixarían lus mious caniles naquetsa pasta, purque agora quedánun-me na bouca solu dous aguichones tsargus y’afilaus cumu escambrones. Ya pur si fora poucu, téngulus  unu a cada tsau: unu  d’arriba y’al outru d’abaixu. Paecen lus dientes dun engazo viechu. Tamién me dixe-nun estas mucheres que you tinía bona encarnadura purque curanun-me escapau tulus fracus que me quedanun nas  encías espueis de sacá-me lus caniles que taban floxus. You cuntestei-tses que asina yera, purque na más que me mancu u me faigu mataduras cuna ferramienta trabachandu, escapau sanan-me.

Agora dixenun-me que dientru dun mes, apruximau, que ya tendrían la dentame feita ya que vulvirían a chamá-me pa prubame-la. Hasta que me la tengan bien axustada nun puedu tsapar na más que tseite  migada cun pan que nun tenga muitu curtezu, ya papas de maíz. Anque de papas ya toi fartu abondu: cenu-las todas las nueites. You nun sei si serei a faeme cunus caniles novos. Sei que hai xente que nun lus aguanta. You si nun m’apañu  faerei cumu’l tíu Avaristu que tsevaba la dentame  envuelta nun panulón nu bolsu la chaqueta ya solu lus punía cuandu cumía la capietsa de las fugazas del pan  al escumencipialas que tse gustaban muitu. Ya na casa, na más acabar de xantar quitába-lus ya mitia-lus outra ve  pal  panulón aquel de cuadrus azules ya blancus, cumu lus que gastaban lus ferreirus,  que taba tou cheno de cotra, de mucarrius ya de  faraguchas de pan.

Estus días d’atrás que baxei a la consulta destas rapazas, cumu nun me tumbanun nel cacharru ese tsargu que tienen que paez la bacita lus gochus nun pude agüetsa-tses  bien l’aspetera pul cristal del teitu cumu loutru día. Lu que sí tses ví estus días fuenun las panturritsas  que las cundenadas tienen-las bien murenas  ya bien rullizas;  tienen unas perneconas  cumu   falcas de rebotso. Minudas xatas que tan feitas las duas. Cumu son xóvenes tuvía, toi pur apustar que a etsas nun tses duelen lus caniles cumu a min,  ni nada pur agora. Cuandu cheguen a lus anus mious, astoncianas será outru cantar.

La víspura de San Isidru, tandu you asperandu onde estas mucheres, paeciume agüechar entre la muita xente que atsí había, a un rapazón chamau Manulu que de nenu tamién tuvu  cunus flairones nu cunventu  Corias. Nun toi muitu siguru, peru  paeciu-me que yera de alredor de Cangas purque falaba muitas cousas de La Criolla, de La Macarena ya de La Victoria de cuandu se faían las ferias del ganau na Veiga. Peru este rapaz nutei-tse que nun riparou en  min pa nada, nin fixu casu miou;   y’astoncianas nun diva you a dici-tse delantre de tous: ¿nun me cunuces oh?,  soy Jasusín el Pelgar. Tamién  pudía cuntestá-me que él  cun pelgares cumu you,  nun quiría tratu nenguno. Quedar, quedeime cuna gulisma de chamá-lu. Pa outru día que lu vuelva agüechar, chamu-lu cumu ta mandau. Miánicas que sí.

“Jesusín”, el Pelgar