Ô DE MEXUS

¡Rapacinus/as! Güei nun toi asina cumu muitu alietsu que digá-mus pa escribire;  paé-me que andu estus días un poucu turpún ya mediu atulundrau. Sirá’l  aire las castañas que ya escumienza a sacudire lus arizus. Anque, da lu mesmu que lus sacuda que non. Cumu nun mexoren algu, esti anu nun va faer falta ni vareixá-las ni meté-las pa la curripa u xoxa;  ven-se tuvía nus arbulinus muitu pequenacas ya ruinas pu lu poucu que chuviu: lu mesmu da que las castañas sean de Paré que las Rapucas. Muitas detsas  tan: u  fuxicas del tou, u  furunas cunu cocu adientru.

Asperu que tengá-is en cuenta esu de que toi un poucu apaxarau estus días, a la hora de tseer esta munxerga que pretendu cuntá-vus. Esu, si soi capaz de entamar algu que se pueda tseer.

El outru día cuandu tses priguntei a lus flairones esus que se salié-nun de la orden, ¿qué yera de la sua vida?, paré que nun vus gustou muitu oh. Anque nel fondu sei que tais pinsandu tous lu mesmu que you: “siete anus mitiéndu-tses algu na testa a lus rapacinus, pa  luegu etsus de ripente,  mandá-lu tou  al caraju. Esu nun tien outru nome que fiascu”. Peru buenu, si nun vus paré currectu, que tses lu prigunte,  deixaremus-lu pa outru mumentu, u pa prau. Anque debu decire que al Prior, que paré un rapaz seriu ya furmal,  nun tse debiu de paecer del tou mal, pus casi sacou la cara pur min.

Agora esu va-mus deixá-lu. Anantias, mientras tsapaba una escudietsa de tseite migada cun pan alcurdei-me de las picias  que faía-mus lus nenus nu puelu cuandu yéramus guajes piquenacus. Pu las tardes, sigún  el mayestru nus deixaba fuxir de la escuela espaparutábamus-nus pul camín ya dipasu  enredába-mus  un poucu unus cun outrus hasta que las nuesas mais salían a pur nos cuna guichada na manu u cun un bon bascachu de burtigas pa rustrínu-las bien pur las ñalgas ya pur las panturritsas pur nun ir pa casa curriendu a faer lu que taba asperandu pur nos. Subre tou yera el ir a buscar las vacas a lus praus que taban lonxe de casa. Miánicas había veces que se nus punían lus cadriles nun fervidoiru de lu que nus picaban lus  burtigazus. Ya encima, cumu nun parába-mus de arrascá-nus, salían-nus unas ronchas ya unas vixirigas cumu globus. Peru al mumentu tába-mus outra ve lu mesmu. Nun escarmentába-mus non; quiá, ni pa dios.

Una tardiquina sigún salíamos de la escuela, que pur ciertu yera pur San Antón, que cae pul 17 del mes de xineiru, ya nevaba tantu que  caían unus faloupus cumu trapus blancus. Nuna destas,  uyí-mus unus queixidus que salían duna casa onde había una moza xoven ya guapa que atoupába-se atsí de pasu, pus etsa vivía pa Madrí, peru a nos  gustaba-nus muitu ve-la cuandu vinía, pu lu pintarruxada que andaba. Naquel mumentu,  nos nun sabía-mus el mutivu pu lu que aquetsa  muchere gañía tantu ya d’aquel xeitu.

 Pinsába-mus que, cumu yera muitu dilicada,  algu le fixera mal de la cumida, u que se mancara na corte al cebar las vacas u lus gurinus; cualquier cousa menus la rialidá del asuntu. Hasta que unu de nos dixu: paé-me a mí, que a la rapaza esa, lu que tse pasa ía que ta pariendu,  ya cumu ía  primeiriza cuesta-tse  muitu el esquitar la cría, ya nun parirá  hasta que se tse esgace toda la natura. Pur esu berra tantu.

 Pa nos, lus guajes, esu  de parir nun yera ninguna nuvedá purque tábamus fartus de agüechar a las vacas, a las gochas , ya las cabras ya ouvechas, parir na corte  ya nus praus cuandu tses vinían las ganas, peru lu de la moza yera pa nos tou un misteriu, purque nu nus la imaxinába-mus faciendu lu mesmu que las vacas u las uvechas.

Sin que nus agüechara la xente mayor mitímus-nus na corte debaxu’l cuartu, ou taba la parturienta gañidora que tantu se queixaba, xuntu a la cumadrona ya varias mucheres más del puelu. Na más entrar tumbamus-nus tous amuntunaus nu peselbe de las vacas, casi unus encima de lus outrus, ya catsaus cumu muertus tába-mus atsí escuitandu lus queixidus de la probe rapaza que tantu tse taba custandu  el dichosu paridoiru. Mi alma, cúmu siría el dulor que taría   pasandu  que   pigaba unas berridas que nus deixaba a tous cuepus, casi sin alientu.

Peru nuna destas, sigún tábamus tous tan entusiasmaus escuitandu  lus berrius ya lu que tse dicían las mucheres que la taban ayudandu a parir, entrou na corte una hirmana de la que taba pariendu ya escumenzou a chamar a sou pai  ya decí-tse que lus guajes tábamus chisvandu pur las rindijas que tinían lus tablones del suelu del cuartu. Esu nun yera virdá del tou purque, cunas sayonas de las mucheronas que andaban pur arriba  nun se agüechaba nada. Al da-nus cuenta que la guaja  chamou de verdá a sou pai, salimos tous esnalazaus dandu curcobos de la corte cumu si hubiera fou dientru;  peru sigún chegá-mus al camín taba outra mucher vicina asperándunus cun una canada de las de mucir la tseite, peru  chena de mexus, ya aventounus-la a la cara ya pur encima nuesa. Empapuo-nus toda la roupa ya la cara  a casi tous. Peru, miánicas valiu-nus más, purque si nus chega a atrapar el farotsu del paisanu, que yera más brutu que un aladru, rómpenos la crisma u esfuetsa-nus el pillexu atsí mesmu.

Nos al ve-nus tous muchaus pul mexu, que gulía a rayus podres, sigún taba  faloupandu  de aquetsa manera,  currí-mus a tou miter pa la fonte El Pimpanín a pu lu menus,  tsabuca-nus un poucu la caretsona ya quitá-nus algu el cheirún  a mexu que tiníamus incima. You cuando cheguei a casa, mia mai dixu-me: a munín, ¿ou te mitiste que cheiras muitu a mixau? ¡Nun te mixarías encima la roupa! You cuntestei-tse que non, que tuviera muciendu a la Cachorra ya que me mixara un poucu pula faragacha que tinía puesta.

Etsa criu-lu de mumentu, ya que las vacas al mucí-las datses gustu , ya veces ponen-se a mixar na más que tses tiras de lus tetus, pero al outru día dixénun-tse las vicinas que you ya lus outrus libreles cumu you, tábamus tous feitus unus buenus changurdius ya sinvergüenzas que nus pillaran na corte chisvandu cumu paría la rapaza madrileña primeiriza. Mía mai nun lu creía de mumentu. Peru cuandu supu que yera tou virdá lu que tse cuntaban de min, chamou-me ya esfucinou-me a murradas ya muquetunes. Ya pur si estu fora poucu cuchiu de la güerta un touzu gordu duna berza, cunu bruta que yera,  ya solmenuo-me unus buenus barganazus pul tsombu ya pu las custietsas. Non, tuvía ía el día de güei, que nun lus ulvidei: ni lus barganazus ni el cheirún del mexu ranciu.

“Jesusín”, el pelgar