LA GATINA TERESINA

Cuandu yera you tuvía un nenacu muitu piquenu, ricuerdu  que nu nuesu caseríu  había ratus a esgaya, ya algunus yeran  cumu madreñas de grandis; subre tou había-lus nas cortes, na budega ya nel currietsu de lus gochus. Chapinaban a carreiras tous xuntus a rabañus pur encima del muntón de las patacas ya de lus ramus del maiz que nun taban nu curredor del hórreu, cumu si foran xiringleirus. A mía mai daban-tse muitu repilu estus bichus  purque  tinía-tses noxu ya muita tserza, pur esu  andaba toul día a madreñazus ya murrillazus tras detsus.

                        

Armabamus-tses un mureiru grandón que tinía-mus nu disván ya puniamus-tes un cachín de toucín marietsu  na chingüeta peru nun daba-mus a bastu a tsimpia’l mureiru ya acarreixar murrinas pal regueiru. A cada poucu uyía-mus,  pummmm;  íba-mus curriendu agüechar ya xustu: atsí tinía-mus unu, cum’un gurín de grande debaxu’l mazu aplastau.

Ricuerdu que pur las nueites, nus cuartus crecientes, que ía cuandu andan berriondus estus anemales, nun nus deixaban  durmire de cumu sutrumían el suelu del disván que yera de tablas, pu lus trotes que daban de un tsau pa outru  gruñendu muitu estus diablecus, ya asina taban toda la nueite hasta riscá el día. Espués, cuandu cumenzou a venire el vinenu en polvus, puniamustse-lu untau nel toucín, peru fartaban-se bien del, ya algunus murrían, peru outrus andaban d’acó pa cutsó turpones ya atuntaus buscandu el regueiru pa bebere augua pa espués reventar cumu castañas, ya astoncias yera cuandu lus esgurrafábamus cunas madreñas u dábamus-tses cun un estadueñu hasta que cincaban el fucicu nu suelu.

Pa lus ratus lu mexor de tou yeran lus rabañus de gatus que tinia-mus na casa pa que lus muraran. Alcuerdu-me que cuandu salías de la corte  cunas canadas del tseite na manu nun te deixaban andare  cun aquetsa gatafueira gatuna ditrás. Muitas veces faiante falcatraus, pois mitíanse-tse a uno entre las madreñas ya yera cumu si te fixeran la trangadicha, sin querer caías de fucicus tou envelurtau ya feitu un zalamatu al suelu ya arramabas tou’l tseite pul curral. Nesi mumentu cuchías un xamascu ya a xamascazu tsimpiu currías a lus gatus hasta’l cabu’l pueblu. Ya etsus afuxian delantre a tou miter cunu rabu tiesu parriba cumu si fora una guichada pa arrear las vacas.

Cuandu parían las gatas, que yera a minudu, you cuchía unu de lus  gatinus  piquininus,  el que más me gustara,  ya chevába-lu pa casa a escundidas de mia mai. Muitas veces tiníalu mitiu nu bolsu’l pantalón yal merdeiru del gatín, cunu calentín que taba atsí,  escumenzaba a miagar ya astoncias mía mai cuchía el bascachu de xiñestas que tinía al pía pa barrer la cucina ya solmenába-me unos bonos bascachazus pul tsombu ya faia-me volver el gatín pa baxu pal curral al sou sitiu. Mía mai tuvu cumigu muitu trabachu, subre tou pur la roupa que tsavou del miou camastru; a minudu, lus sabanietsus mious taban chenus de pezas negras de las cagadas de las pulgas que cuchía de tantu subá-me tou’l día cunus gatinus. Probe muchere, muitas pasou cumigu.

Una ve tiníamus una gata cardosa que yera  muitu guapina ya alietsada cumu etsa sola. Chamábamus-tse Teresina, mía mai yera muitu facindiega cun tous lus anemales, cousa que heredei you tamién,  ya cumu esta gatina  yera algu rabilera ya esfautada escumenzou a subire pa casa ya mía madre dába-tse pena echá-la pa baixu, cunu zalameira que yera, andaba tou’l día detrás detsa cunu rabu tiesu baxu el sou mandil, ya poucu a poucu acumudou-se na casa cun nos.

Pu las nueites dormía enrruscada cumu si fora una madexa de tsana, arrimada a la chapa de la cucina económica espués de apagá-la nos. Ya nus inviernus que faía un fríu que caltrizaba tou, cuandu you mitía lus pías nu fornu pa calentá-lus, etsa apruveitaba ya  mitíase tamién pa dientru‘l fornu. Si taba muitu caliente escapau fuxía reburdiandu  You cumu yera más  riturciu que una vilorta,  un día intentei curtá-tse lus bigotes a la gata, peru nese mumentu chegou mía mai ya diume una bona murrada. Dixu-me: nun faigas esu demontres, nun seas pullín, ¿nun sabes que sin lus bigotes la gata  nun puede murar lus ratus? Ya creu que ía virdá.

Nuna destas la gata Teresina quedou preñada ya cuandu tse tucou  parir nun sabíamos onde lu fixera. Mía mai cumu la agüechaba muitu flaca de tantu dar de mamar a lus gatinus, punía-tse na cucina tseite nuna latina de las sardinas ya caldu de berzas pa que cumiera. Asina, poucu a poucu foi rebuxendu ya engurdandu. Un día mía mai foi a esqueirar algu nuna alacena que tinía-mus nu cabeiru’l estroucasa, que taba chena de  roupa viecha, peru tsimpia pa punere cuandu baixamus a la corte cunu ganau, ya alcuntrou-se cunu nial de lus gatinus piquenus encima de tous lus jerseys. Atsí mesmu fixera’l nial ya pariera la gata, apruveitandu que la puerta de la alacena taba mediu escarrinchada ya entotsada pu la humedá ya nun pechaba del tou.  Mía mai cumu mucher ya cumu  hembra  que tamién tse tocou parir un muntón de veces, diutse pena de la gata ya nun tse fixu nada, anque tse echara a pirder parte de la roupa cunas aguadichas del paridoiru. Lus gatinus quedá-nun tous cuntentus enredandu unus cun lus outrus nu nial de la tsana,  ya cun esu alon, tous en paz. Mía mai yera  buena muchere; miánicas que sí. Si lu chega a sabere el tulenas de miou pai, parta-me un rayu si non tses cruza el tsombu dun garrutazu, a las duas: a la  Teresina pur parir onde nun dibía, ya mía mai, pur alcagüeta ya cunsentidora.

“Jesusín”, el pelgar