PANULÓN PIRFUMAU

You cuandu toi tsuniegu cun murnia metu-me atsí nu parreiru acurrucau nun rincunín pa esafugá-me de las mias rémuras  ya piensu en lu que pudía cuntá-vus de las mías hestorias de la épuca de nenu. A min cuandu yera más rapaz nun me daban estus axagüeirus de murnia que me dan agora, tou lu cuntrariu, si m’entraba la murriña, en cuantu agüechaba una rapaza algu repotsuda, punía-me embriespau ya alietsu del tou.¡Qué tsástima! Esu solu lu faen lus anus ya la xuventú. Peru nun debu queixa-me de mumentu, pois entuvía tengu ganas de faer picias a cada poucu, cumu cuandu yera guaje, ya cuandu tse  agüechu las pantorras u las ubres  alguna potsa  xoven, dame muitu gusto amerar pa etsas,  ya póngu-me cuntentu ya pizpiretu cumu'l primeiru.

Anantias que se me ulvide, direi-vus que pa nun fartá-vus n’excesu,  cun esta munxerga de güei, piechu el ciclu cincau y’axeitau nel tema eróticu-escatulóxicu; al menus, pur agora.

Alcurdándu-me destu de las travesuras de lus guajes,  debu cuntá-vus que you de rapacín yera muitu  returciu,  lu mesmu u más que una vilorta de xiñesta de las que se faen  p’atar lus manochus de la pacha. Asina, a cada poucu sulmenában-me, unus u  outrus, una murrada o un tirón de urechas a cada mumentu, esu tou pur bono. Si digu la virdá las urechas siempre las tinía encarnadas cumu tumates de los tirones que me daban na mía casa tous;  hasta mía mai, que yera la más cumprensiva ya tulerante cumigu, tamién me las estirazaba a minudu cumu si foran las fuechas de lus nabus pa arrincá-lus.

Había días que ya cumenzaba a berrar pu la mañena ya nun paraba en tou‘l día. Mia mai taba esqueicida de agüechá-me churar tantu ya pinsaba que you taba embruxau, miánicas que si, cumu vus dije noutru mumentu. Tiníamus una vicina muy viecha que yera muitu bona muchere ya  chevaba-se muitu bien cumigu. Cuandu me sintía berrar  d’aquel xeitu endemoniau, chámaba-me ya you iba pa cun etsa escapau. Alcuerdu-me muitu duna cousa que tengu grabada a fou na testa, ya agora mesmu voi cuntavus-la.

Esta mucherina tuviera muitus anus trabachandu de criada na Habana ya vinía acustumbrada a tsabucá-se lus baxus despois de meixar, peru  cumu nas casas de lus pueblus  nun tinía-mus ni ritrete ni augua curriente, etsa acostumbraba a tsevar nu bolsu del  mandil un trapón de tsienzu murenu que tse subraría de faer algún rumiendu pa lus sabanietsus de lus cubiles de casa. ¿Sabéis pa que tsevaba esta muchere cun etsa el trapón? Seguru que non lu supunéis. Quiría-lu pa chimpia-se la quilica despois de meixar. Aquetsa viecha nun quiría manchar las bumbachas, cumu etsa tses chamaba a las bragas, ya pa esu tsevaba el trapón. You nun digu que nun lu tsavara alguna ve, pu lu menus muchá-lu un pouquinín nu rigueiru,  peru sería solu cuandu se alcurdaba ya, cumu cumprenderéis aquel melandru de  trapón, espués de muitus días estazándulu pur atsí,  gulía cumu a gatu muertu  podre.

Peru vusotrus direis-me: ya  ti Jesusín, ¿quien coño te mandaba cheirar el trapón de la viecha? Pois naide, peru you sulía tener de la mañena a la nueite  unas velas de mocus marietsus ya virdosus culgandu de las napias, cumu cirius pascuales, ya esta bona mucher nun tse gustaba ve-me asina tou chenu mocus, ya sacaba etsa el trapón aquel pa tsimpiáme-lus. Nese mumentu  yera cuandu  rustríame bien el faragachu aquel  pu lus fucicus ya you punía-me tsarizudu ya chevantábase-me hasta la  tapa de lus sesus del gulor tan ranciu ya caltrizante que tinía la pindangona  aquetsa naquel diantres de trapu, “tsimpia quilicas”.

                                                                                                                                                                                                                         

Tuvía ía el día de güei que cuandu guelu ácidu clurhídricu vien-me a la maxinación el gulor del meixu de la viecha. Miánicas gulía ya caltrizaba muitu más  quel meixu de la rapiega. Peru la probe muchere bastante faía que me tsimpiaba lus mucarrius. Sobre tou purque  a minudu,  chegaban-me hasta la bouca. Siguru que muitus detsus  papei, purque  taba tou’l día surbiendu pa enriba ya pa baixu las dichosas velas. Nesus surbetones de sube ya baixa,  algunu se esguilaría  pal furacón de la bouca. Peru esu nun fai mal nenguno. Tuvía fai poucu tiempu,  viu-se na tilivisión a Berlusconi cumu  sacaba de la napia  una bona cascarria bien gorda ya la papaba escapau pa que nun lu vieran lus que taban cun él. A este paisanu italianu que tse chaman “el Cavaliere”  nun tse pasará nunca  cumu al que cuntaba  Gila que saliu de la Plaza Castilla en Madrí guiandu‘l  autulodre cun un mocu pigau a lus dedus, que se sacou de la napia mientras asperaba nu semáforo, ya foi dandu-tse vueltas toul ratu pa tsibrá-se del, desde Madrí hasta Burgus, ya chegou a Burgus tuvía cunu dichosu mocu entre lus dedus, sin puder desprendé-lu.

“Jesusín”, el pelgar