YA CHEGOU’L ANDANCIU LA GRIPE

Ah, rapaces,  nun sei si me echaríais de menus tous estus días d’atrás, peru you a vos si que vus echei en falta. Miánicas que sí. En primer tsugar direi-vus que tuve malu nu camastru cuna calentura del demoniu. Tsevu encamau más de quince días, ende la víspora del Pilar, ya tuvía toi feitu una calamidá. Nun sei si vulverei a tar outra ve alietsu cumu anantias, ya  cumu Dios manda, de agora n’adelantre.

La cousa entamou-se asina. Fai cumu quince días taba you nu prau que tinemus baxu casa, el que chamamus, La Pachalina, calcandu las touperas ya ruzandu un poucu lus artus ya arrincandu ya esveirandu  lus  cudoxus, piornus  ya xiñestas; cuandu nuna destas  escumenzou a chuvere  a lu tontu asina cuna nublina arrastru, ya faer muitu fríu.

 You tinía puestu pur encima’l tsombu solu un faragachu de camisola  ya miánicas que, al tar tantu tiempu muchau, sintía muitu friu nas custietsas. Cumu taba sudau de cavar cunu picón ya de fradar cunu ruzón lus xamascus, a lu primeiru nun nutá-ba’l friu apenas.  Peru al quedá-me parau pa echar un pitu ya descansare algu, quedéi-me arreciu del tou. Pu la nueite na casa al prinder la tsariega pa cucer  la tsabaza de lus gochus, ya nutei bonus escalufríus pul tsombu, yal ir pal camastru casi nun me tinía de pía pu la temblequeira que m’entrara. Cumu taba solu na casa nun alcuntraba  a naide que me echara una manu. Tuve pur chamar a Rulindes, peru etsa tamién anda cun muitu axetreu estus días purque tan capandu lus gurinus piquenus de recría.

Pa estus casus de fiebre paré que ía bonu datse a uno friegas de alcohol alcanfurau pu la espalda ya pul peitu, peru you solu nun m’apañu. Si tuviera cumigo una demoniu duna muchere yera outru cantar, peru asina solu, hai que amulá-se ya catsar la bouca. Sigún me tumbei nu camastru cayí cumu muertu, ya’l riscá el día taba tou tsarizudu ya muertu fríu. Pa intentar tsevantá-me tuve que agarrá-me al cabeceiru'l camastru purque nun me tinía de pía.

Cúmu taría de malu you, que tinía p’almorzar papas de maíz cun tseite, que gustan-me muitu, ya casi nun las catei. Asina neste plan tuve casi cincu días, hasta que pasou por mia casa Rulindes, la vicina, ya preguntou-me que tal taba. Dixi-tse que taba muitu mal ya que nicesitaba que me agüechara’l médicu. Si sí, la rapacina tumou-lu en cuenta  al mumentu. Pu la tardiquina ya tinía aiquí al pía de casa una ambulancia cun dous mozus pa tsevá-me pal matasanus. Tumbei-me  naquetsa camuca ya atánun-me cuna currea ya a toda pastilla fuxi-mus pal Huspital. Atsí tuve asperandu casi una hora, ya cuandu chegou la médica  priguntou-me qué me pasaba, you dixi-tse que tinía  muita tembladoira ya que  ruxían-me muitu las tripas. Astoncias etsa baxou-me lus pantalones ya espués d’amira-me pa lus baxus dixu –me: Jesusín alcuerdas-te si de piquenu tuviste parotiditis, you quedei apaxarau ya díxitse, qui you nun sabía lu que yera esu.  Astoncias etsa díxu-me que nun tinía gripe, non; lu que tienes ía parotiditis, u cumu vusotrus tse chamais  son  paperas. Nun te das cuenta cumu se te pusie-nun  lus  testículos de gordus, anemal, nun me dirás que tú  lus tienes asina de rechonchus de nacimientu. No me no, ou va parar; téngulus piquenus  cumu  cúcaras de rebotsu, ya ía virdá que agora,  lus dous xuntus, miánicas paecen un butietsu. Ya de  tan  hinchaus que lus tengu, mi alma tamién paecen lus de un carneiru merinu.

Nesi mesmu mumentu espertei un poucu ya  diu-me muita vergüenza, purque la condenada de la médica  ricumendou-me que tinían que dame friegas netsus cun augua de cucer  papolas de sabugu, todas las nueites anantias de yir a durmire. You cuntestei-tse que taba solu na casa ya que nun  tinía quien me las diera. Astoncias  garabatiou algu atsí na riceta ya puxu que fora una enfermera a dame-las a casa.

Nesi mumentu a mi diume la risa ya nun paraba de riir cumu si fora tolo del tou. A etsa nun tse gustou muitu ya dixu-me que, de qué me ríia, que paecía fatueiru del tou. You puxi-me culurau, culurau,  cumu’n tumate pinsandu ou tinían que dame las friegas. Al fenal acetei ya agora toi asperandu aiquí na sulana de casa que tsegue la enfermera pa dame-las. Nun sei lu que pasará, ya viremos si soi capaz de aguantá-me sin espatarrá-me de la risa. Purque anque esas mucheres lu faigan cun guantes ya ten fartas de ver de tou, esa ía una parte muitu dilicada ya cumu ta tan abultada, cuandu me las agüeche  siguru que tse da  un turzón de la risa. Ya vus cuntarei que tal me foi cunas friegas dichousas.

“Jesusín”, el pelgar