UNA POZA MUITU FONDA, O UN REGUEIRÍN

Afuxiu la tardiquina que tuvimos güei tan asulinada ya la nueite chegou sin asperá-la cun un poucu de nublina arrastru. You que enxamás fixera casu de lus cuntapinus que vus entamu  aiquí nu blog de cuandu you yera piquenu, agora paé-me que tengu que recordá-lus  purque a muitus de vos,  gustan-vus muitu. ¡U non!

Espueis de que escumenzara estas hestorietas fai un tiempu cun muita xixa, siguiu quedei-me un poucu apaxarau;  agora paez-me  que tengu outra vez algu de murnia u noxu a escribire. Algunus tsectores del blog dirán: esti rapaz ía tolu dafeitu, u ta cumu una madreña rampla. Ya nun andarán muitu escaminaus, peru you, anque algunus de vos sei que vus refierve‘l odre cuandu me metu cunus flairones; nel fondu, tamién  sei que lus que sois del cuncexu cangués tais asperandu las hestorias del Pelgar cumu augua de mayu. Sois unus picarones ya picaronas, que tamién las hai. A etsas sei que tses gustan muitu tou lu que cuentu de lus nenacus ya nenacas de cuandu yeran unus cativus, peru cumu you a veces soi algu berriondo, a etsas datses vergüenza ya catsan la bouca cumu afugadas. Peru nel fondu espatarran-se de risa.

Una vez feita esta piquena entroducción, voi continuar cuntándu-vus dalguna cousina aveirada a la picardía de lus guajes cunas cousas de las mucheres.

Nu miou pueblu yéramus un muntón de rapacinus, ya pu las tardiquinas xuntabamus-nus tous  pa xugar nu cabidru la ilesia, subre tou cuandu chuvía muitu. Outras veces íba-mus xuntu a  un home viechu que vivía solu nuna budega debaxu’l hórreu. Esti home tuviera muitus anus en Venezuela ya faíase-tse la bouca augua falandu de lu que fixera cunas mulatonas aquetsas venezolanas. Lus viechus cumu él nun tse faian casu algunu. Dician que taba tsoucu. Peru nos, cumu tse sabíamos la deblidá, escumenzába-mus a datse vueltas ya tiratse de la chingua cun priguntas hasta que lu tsevába-mus al güertu de las mulatonas.

 Na más que tse falaba-mus algu duna tal Pancrasia punía-se alietsu al mumentu ya refistulau, cunas urechas tiesas cumu la rapiega cuandou anda pu la nueite cheirandu  lus capuneirus pa ver si hai pitas dientru, ya nun paraba de falar detsa ya de lu cachurrona que taba feita.

Esti home farfutsába-nus que cuandu tse mitía la manu pur nun sei onde, a la Pancarsia, ésta diciatse ¡Ay Chourienzu miou!, nun esquieres pur ahí, pur onde tantu te gusta, que pongu-me floxa cumu una pita chueca. Yal home vulvía a cuntá-lu, una ya outra ve hasta que nos nus  revulcaba-mus de risa. Ya esu que nos,  nun cumprendia-mus del tou cumu yera la cousa. Tamién nus dicía que las negras tinían la quilica  destinta de la blancas. La primeiras tienen-la de abaxu arriba ya las outras, tou lu cuntrariu; en hurizuntal. Nos cuntestábamus-tse que esu yera muita mintira yal viechu emperrau en que no, que lu tinían cumu él dicia, al bies.

Un día díxu-nus este home que él sabía-lu tou  destas cousas de las  mucheres. Cúmu siría que él yera capaz de sabere, cuandu veía una meixada na vera del camín, u nu curral, si yera de una muchere casada u sulteira. Nos faíamus-nus lus tontus, ya cuna bouca abierta cumu fatus,  diciamus-tse que esu yera empusible. El viechu puníase tou esfautau ya farfutsaba pur entre lus dous caniles que tse quedaban: sí lu sei, sí. Ya voi dicibu-lu a vos pa que lu cumprubéis en cuantu tengáis la upurtunidá de pillar a una muchere escarrancada meixandu na vera‘l camín u na corte de las vacas.

Las mucheres mientras tan sulteiras ya enteras sin afuracar, cuandu meixan nu campu, fain una gran poza muitu fonda cumu si lu aventara una esquitana. Pur el tsau cuntrariu, cuandou lu faen las casadas que ya tan bien furadas, al meixar fain cumu un rigueirín  tou esparciu ya poucu fondu a xeitu duna regadeira. Esu, ía asina, muninus. En cuantu atoupéis a una rapaza escarqueixada meixandu, acercai-vus na más que se tsevante del sitiu, ir curriendu  amirar la poza, ya sabréis si ía virdá u mintira lu que you vus cuentu.

Cuandu nus fartába-mus de rei-nus deciamux-tse al viechu. ¡Chourienzu! tas cumu una maniega rota. Nun nus cuentas más que truladas. Nestas el zaragata del viechu sacaba la petaca pa faer un pitu de picadura ya escumenzaba a reisi cumu un tontu. Al fenal, tous cuntentus: él, ya nos tamién. Que yera lu más empurtante. Ya cun esu alon.

“Jesusín”, el pelgar