ALTERCAU CUNAS FRIEGAS

El outru día espués de asperar un buen ratucu aiquí na sulana, cumu nun agüechaba a la demoniu esta de las friegas, púxe-me a mirendar un poucu ya cuchí un cachín del toucín que tengu esverdiau de fae poucu,  yal capietsu de la fugaza’l pan ricién cuchiu al panaderu, que  tuvía taba calentín ya tou, cun un cachu de vinín  ya cuandu taba casi fartu del tou, asumou pul mediu’l camín un autulodre cun duas mucheres adientru. Al chegar xuntu al nuesu purtón parou, ya taba atsí mesmu Rulindes que sacara las vacas nesi mumentu de la corte a bebere augua al rigueiru, ya preguntánun-tse ou taba la casa de Jesusín. Etsa dixu-tes: amirai, delantre mesmu la tenéis; fai un mumentu taba él nu curredor del hórreu esfutsandu unas panochas de maiz pa lus gochus. Astoncias aquetsa xente aveirá-nun el trastu que traían a la paré nuesa de la currada ya baxanun-tse cun duas talegas al tsombu chenas de ungüentus ya de caixas de enxuagues ya  midicamentus.  Abrie-nun el purtón ya voucea-nun ende’l curral: ¡Jesusín! Somus las de la friegas, que nus mandan del h’uspital, ¿ou tas, oh? Nesi mumentu cuntestei-tses you: toi aiquí na sulana que casi nun puedu muvé-me. Esu yera muita mintira, peru pinsei que asina pudía datses pena ya criían que taba más malu de lu yera virdá.

 Nastoncias asumei you el fucicu un poucu pul curredor ya vulví a dicí-tses: subii pacó  oh. Yeran dos magüetas roxas  muitu espigadas, miánicas  yeran tsargas  cumu lus palus de la fabas pu lu menus. Una detsas, que tinía la pinta de más zalamatón ya más esgarbadona priguntou al mumentu,  ou taba la paciente. Al dici-tse que yera you’l enfermu, etsa extrañou-se ya dixu que a etsa dixeran-tse que las friegas había que dátse-las a una muchere, no a un home. A tou estu, espantouse un poucu, yal echá-se pa tras pisou nu  mediu duna muñica cumu’n feisuelo de grande que taba nu curral, que  casi tse tapa el zapatu tou al esgurrafá-la, peru la bartola detsa, nun tse diu ni cuenta.

Astoncias dixe you pa mious adientrus, pus munina, tas tsista, nun sabes bien  lu que t’aspera; mi alma cuandu  sepas ou tienes que da-me las friegas, vas a fuxir  al trote toda esnalazada cumu las vacas cuandu moscan nu branu. Etsa nun cuntestou nada, ya quedou pinsativa, peru la outra dixu-tse: que tse vamus a faer, ía lu mesmu que sea muchere que home. Si tu nun quieres fae-lu, dareitse-las  you; nun te preocupes oh.

Ya asina foi. Mandou-me pasar pal cuartu ya díxu-me: cumu las friegas sirán pa la reúma, tindrei que datse-las, alredor de las custietsas, nun tse paez oh. You que taba mediu afugau pu la risa, cuntestei-tse: peru rapaza, tampocu  te dixe-nun ou tinias que  dame las friegas,  munina. Etsa dixu: non, nu me dixenun nada. Buenu pois voi diciti-lu. You el mal miou son las paperas ya direite que tengu lus tetículus muitu hinchaus ya las friegas son pa baxá-tses la inrritación. Nesi mumentu etsa tumou-lu a xirigonza ya escumenzou a puné-se culurada ya decir picaus que you quedei apaxarau del tou al agüechá-la daquel xeitu. Asustou-me tantu, que ya nun supe que dicí-tse. Na más reveirá-me un poucu dime cuenta que aquetsus dous tulondrus de mucheres,  ya taban mitiendo tous lus frascus  pa la talega aquetsa que truxe-nun ya dixenun-me: nesas ficias ponte munín,  que las friegas ahí nese sitiu va dáte-las tua mai, si la tienes, ya si nun la tienes, méte-lus nu rigueiru a remuechu pa toda  la nueti hasta que se te pongan bien rivichius  cumu patacas viechas. Ya verás cúmu asina se te desinflan escapau, so guchón. Ya sin asperar ni un mumentu más, aquel par de xamascones fuxé-nun de la mía casa cumu’l gatu que sal a bascachazus de la tsariega. Una detsas tuvía tsevaba la muñica pigada al zapatu. Anda que se joda.

 Al muntar nu trastu que truxé-nun, taba atsí mesmu al pia Rulindes, ya nutou que aquetsas duas fuxían echandu fumu camín abaixu, ya preguntou-tses qué tses  pasara. Etsas nun tse cuntestanun nada aquel par de mulas, ya fuxé-nun escupetadas runfandu  cumu renubeirus. You mientras  taba farfutsandu pa mí: mal rayu las parta, a estas dous pascaxonas. El casu ía que tarán fartas abondu  de faer destas cousas ya muitu piores, cumu las friegas que me daba a mi una tal Lilí en Tinirife, que etsa tses chamaba friegas cun  fenal feliz ya tou. Esu sí que yeran friegas; peru  estas dous tambascas, vaya rimilgus que traían. Peru ya vulverán, ya. Agora mesmu acabu de faer una reclamación a la Uficina Territorial de la Seguridad Social del Principau, que pa esu you soi amigu íntimu de Cascus de cuandu apaecían a cazar pur Munietsus, él ya Fraga, que íbamus muitas veces xuntus nu miou Land Rover, ya estas dous  xamasconas van a volver cunas urechas bien gachas, miánicas que sí; van a da-me las friegas nesi sitiu ya hasta tsimpiá-me la corte de lus gochus ya arramá-me’l cuitu na currada si si lu mandu. Esu cumu me chamu Jesusín. Sei-lu you bien que sí.

 En cuantu chame a Paco Cascus tengu-lu sulventau al mumentu, purque ese home tien las cúcaras  cumu you las tengu agora, peru él tien-las asina de siempre, sin que tenga mal ningunu netsas.

De mumentu, tendréi que apañá-me solu, outru amiente nun tengu. Voi axeitá-me un poucu pa punere a cucer una pota chena de papolas de sabugu, que tengu una fardela chena detsas, purque las cuechu la nueite de San Xuan,  ya cunu augua esa frutarei-me las cúcaras un poucu pu las nueites a ver si me floxa’l hinchazón. A las vacas nuesas cuandu tienen mamitis echámostse-la nas ubres ya curan escapau. Lu miou cumu ía paeciu, asperu que tamién resulte’l rumediu. Nun tengu más que calamidades. Toi pirdiu. Ya cun esu alon, rapaces.

“Jesusín”, el pelgar