TIEMPU D’UTUENU

Cumu el “Prior” falou del utuenu fai un poucu; you voi faé-lu agora mesmu; lu qui nun tengu ía ritratu pa punere. Anque sei que me lu enxaretará él cumu outras veces;  ya ver si ía tan guapu cumu el que puxu pa él.

Estus días andu d’acó pacutsó sin sabere apenas lu que faigu. Toi esqueiciau del tou, ya nun ía más que pur la nuticia que recibí fai poucu, de la Gúmer.  Ya esu, que casi  ya nun me alcurdaba detsa. Peru valía más que nun me chamara.

Esta mucherona faía muitu tiempu que nun falaba nada cun etsa pur teléfanu. Dende la xirigonza que priparou el cafre del sou home, aquetsa nueite d’utuenu, que vinu al caseríu a buscá-me, cuandu quería matá-me pu lus celus que cuchiera cumigu aquel curnón; etsa,  ya nun quisu sabere más del asuntu, ya dexou de chamá-me.

 Peru agora debiu pensá-lu mexor yal outru día chamou-me. Siguru que tse picou la curiusidá ya d’alguna outra cousa tamién, ya quirría sabere ou andaba you, ya si taba  pur casa u fuxera detsa. La gandulona detsa lu primeiru que fixu pa espedrar un poucu’l camín foi puné-me un sms desus que lus garabatean lus guajes cumu si foran  xeroglíficus ya nun t’enteras  de lu que dicen. Peru you sí supe lu que quiría, si oh. Sei-lu abondu. Etsa lu que quier ía volver a estazá-se cumigu, peru pae-me a mi que va tiné-lu envilurtau.

Esta rapazona cumu tien cuartus a esgaya, agora paré que cumprou un teléfanu móvil desus de última tecnoloxía, que tses tsaman 4G, creu que pueden fae-se cun etsus hasta video cunferencias ya tou, peru cumigu valiu-tse pa poucu tar na caramietsa de la mudernidá,  a la última; purque el miou nun val pa esu:  solu val pa falar ya pa puner ya recibir menxases garabateaus, peru lus ritratus nun lus cueche.

Ya cun esu de nun recibire you el ritratu nel tiléfanu, dixitse-lu a etsa ya mandoume-lu pur curreu certificau. Mal rayu me parta que valía más que nunca lu fixera. You cuandu amirei pa aquetsa cara, reniegu lus demonios, que  nun la cunucía. Direi-vus que ta feita un antroiru. Fixu-se na cara desas tulundradas que tses faen agora a las mucheres que nun tienen lu que hay que tiner, ya miánicas desgracianun-la toda. Tien lus fucicus  hinchaus ya tous esculgazaus del botox ese de mierda que paré un perru mastín; solu tse falta que tuviera las babachas culgandu cumu’l perru. Lus papietsus tien-lus culuraus ya salius que paecen dous  tombus. Dígu-vus que ta feita un espanta páxarus. Si se pon nu mediu del miou  estaxu del maíz, anoxan tous detsa;  nun acude ni el murzacu.

Tamien tse estirazanun la pillexa de la gorsa  ya alredor de lus güeyus. Cuandu amiru pa etsa pae-me que tien una careta pur delantre, lu mesmu  que la Nuria Espert, Xuliu Iglesias, la Preysler, Berlusconi, …etc.,  toda es troupa de xente, que nun sabes si son de cera u son de virdá. Esta rapaza ta lu mesmu que etsus. Atsá etsa, la sarna cun gustu nun pica. Ya si tse pica, que lu arrasque.

Etsa crerá que quedou  muitu guapa, peru miánicas paré un mamarrachu ¡Cunu xatona que taba anantias ya lu guapa que yera! You pu las nueites cavi-lu muitu sobre estu que fixu esta muchere ya pae-me que debiu puné-se  tsouca, u ía tola dafeitu. Nun toi siguru, peru pae-me que tamién tse esgurrafanun la napia pa faétse-la más piquena ya más chata. A las mucheres, ta claru que  nun hai quien las entienda ¡Que demontres!    

Tamién me dixu esta frasca teutona que apruveitandu que ya escumenzara cu nu despellexamientu que tamién iba a quitá-se algu de ubre purque taba farta de acarreixar toul día esus dous  calabazones que tien de tetas. Imaxinai-vus cumu sirán  de grandes que pu la nueite apenas la dexan durmire, purque si se pon boca arriba, miánicas  afuegan-la cunu pesísimu que tienen. Pur esu duerme siempre  de tsau, anque te el curnún  del home cun etsa nu camastru.

You di mumentu, tuvía nun tse cuntestei  pa decí-tse lu que me paeciu del cambiu que se fixu. La virdá nun puedu decítse-la del tou pa nun murtificá-la;  abondu esgraciada quedou, peru que ta guapa tampoucu tse lu voi a decire. Non, mi alma que non. Direitse que taba bien de sobra cuandu se lu fixu.

Esta pindonga de muchere nun sabría que faer cunus cuartus ya diutse pur mité-lus nesa tulada. Valíatse más dámelus a mi, que  faen-me bona falta. Agora pal enviernu tengu que cumprá-me un traxe de pana, unas madreñas, una boina, que la tengu toda desculurida , ya unas botas desas de Goretex pal monte, que me dixenun que salen muitu bien ya que  nun se muechan nada lus pias cun etsas, anque chueva a caldeiraus u las metas nu rigueiru. Lu pior de tou ía que tengu poucus cuartus  aforraus ya las demonios de las botas esas, son muitu caras ya van a deixá-me sin un perrín. Peru nun tengu outru rumedio.

El outru día cuntei-tse este xareu tou que tingu cuna Gúmer, a Rulindes, sí, a la rapacina vicina ya amiga mia, ya díxu-me que pur qué nun  chamaba a la Cadena SER al prugrama esi de las nueites: FALAR PUR FALAR, que lu prisenta una muzuca  chamada  Macarena Berlín, que tien una voz muitu agradable ya ía muitu sempática.

Según paré, lus subraus esus de lus chatines, que lus tien enganchaus esta rapacina al prugrama toda la nueite, después de uyir las calamidades que farfotsa la xente,  dicin-tses lu que deben faer ya dantses esfautu y’ánimu, nel casu de que tengan dudas u ten acuruxaus ya amuzargaus, cumu ía el casu miou.

 Cualquier nueite destas chamo, micagu en ros. Toi feitu un bartolu ya nun sei pur ou fuxir. Estu hai que puné-tse rumediu cumu sea, nun puedu seguir asina. Ya cun esu alon, rapaces.

“Jesusín”, el pelgar