JESUSÍN PARECE QUE INTENTA SALIR DE LA MASERA.

Soy Jesusín el pelgar. Nun dibía de presentame ya que soy abondu cunuciu entre tous vusotros, parémelu a mi,  peru buenu; la buena educancia  que me enseñanun lus flaires  nun la olvidei tuvía, oh. Lu pior di tou ye qui nótuvus avergunzaus de lus mious cuentus, ya cumu el miou nombre de pila ye muy cunuciu na zona ya  entre tous vusotrus tamién,  pur esu nun puedu decilu  pur ahora. Más adelantre, ya viremos. De mumentu, solamente puede suspichar  algu de quien soy, el bloguero prior, qui al enviale esti escritu, aunque lu fixe baju seudónimo,  sei qui si anda escarbandu puede chegar a acertar algún día di virdá quien soy; peru si fuera asina, tien qui prumeteme qui nun mi discubrirá  hasta qui you si lu mande. Esperu qui si lu acepta,  lu cumpla. Pa lus lectores tenéis qui cunfurmavus, di mumentu, cun Jesusín o Chusín, qui son unus  nombris en diminutivu bien lucalis ya  bien guapinus.

Tamién debu decir qui toi ya fartu de oir críticas sobre mi, ya sobre lus mious cuentinus, pur esu, cumu me infléis  un poucu, voy dexar de garabatear aiquí nesti caraju de blog, ya qui nun soy capaz de faer buenu de vos. ¡Ya qui diantres!,  puedu faelu en outra rivista del uccidente que ya mi lu pidienun pur dos u tres  veces, furmalmente. Tamién toy fartu, purqui veu qui nun vus gusta nada lu qui vus cuentu ya esu a mi desanímame muitu. You creía que estu qui escribu, cumu salme de dientru, pinsei que a vusutrus pasaríavus lu mismo,  peru ya veu qui no. Pareme que vulvístisvus muitu finus ya dilicaus. Ye una pena. Peru antes de escapame de aiquí, di cun vos, diréivus qui tous dicis cousas muitu alegres del cunventu di cuandu tabais allí di piquenus, peru you ricuerdu las tardes de lus dumingus de Corias, qui nun nus dexaban salir a Cangas, cumu las más aburridas ya las más murriñosas de toda la mía vida.

Lu mexor de tou da quel muermu de  tardis, era el puder  tar tumbau un ratucu largu sin priesa nel camastro qui tiníamus nel durmitoriu. El restu de  la tardiquina pasábamusla paseandu desde el tendexón hasta  las penas, aquellas qui había al fondu del patiu grande,  ya vuelta outra vez, pa tras ya pa lantre; cumu la yenka. Asina, cumu autómatas tábamos media tarde pa puder sacar el friu del cuerpu. Faíamus igual  qui  lus burrus cuando dan vueltas alredor de la noria cun lus güeyus tapaus pa sacar agua; solu qui nusutrus faíamuslu en línia recta.

Una vez qui tiníamus lus pias mediu esfochaus de tantu chapinar cun aquellus chanclus di goma que puníamos encima de las zapatillas, cumíamus la mirienda qui sulía ser un chuscu de pan cun algu de fruta, ya algunas veces cun una onza u dos de chuculati de aquel qui paricía qui tuviera unu tierra na boca  al ruelu pa puder cumelu. Siguiu subíannus pal estudiu hasta la hora di cenar. You duranti tou aquel tiempu del estudio nun faía nada. Taba tou el ratu dandu cabezadas ya acurdándume de las rapacinas del pueblu qui las había muitu guapas  del miou tiempu. Lus primeirus añus muito chorei pu la nueti na cama, acurdándume de la mia casina. Una vez qui tábamus cenaus echábannus escapau pal cubil a durmir ya si la cena era lixera, luegu a mi ruxíanme muitu las tripas duranti toda la nueiti.

Tou estu  era la diversión de muitas tardes de dumingu. Luegu, pasaus lus añus, cuandu éramos un poucu mayurinus, astoncias mexoraba algu la cousa, peru poucu. You acuérdume muitu, esu sí,  de lus vasinus de vinu de Cangas qui chupaba  pu lus chigris de Corias: en Casa la Chata, ya en casa de Galdina. Esta última muyerina pareme qui la tuviera viendu; tinía lus güeyus chenus de chagañas casi siempre, purqui era muy roxa ya churábanli a minudo pu la muita luz. El vinín de esta muyer era agriu ya ásperu cumu el vinagre. Sabía a rayus, peru era muy baratu. Algunus rapaces qui eran muitu descaraus ya pelgares, cuandu iban allí roubábanli lus paquetes de Celtas qui taban apilaus al lau del caxón de lus cuartus, ya esqueirábanle tou, apruvechandu cuando la viella si chivantaba a buscar algu dentru de la budega.

Guey diréis qui toi muitu pesimista, peru ye normal. Diréivus  qui ya toi de nuevu nel pueblu; ya si mi acabou la folixa de Tinirife ya lus bailes cun la teutona Gúmer. Pa mi el pueblu gústami muito, peru ye muy aburriu, el manganti de miou pai nun ta en casa tampoucu; apenas hay xente xoven pur estus pagus. Ahora mesmo toi solu na corte sentau nel  talluelu de mucir, anutandu lu qui tengu qui decili mañana al vitirinariu cuandu venga a ve las vacas ya lus xatinus.

Pur ciertu,  voy dicivus lus nombris de las mias vaquinas oh. Chámanse asina: Cachorra, Guapina, Garbosa, Lucera, Castaña, Roxa, Mariecha, Murica, Cundesa, Pastora, Reina, Curunela, Reitana,  Capitana, Pinta, Galana, Princesa, Fosca, Risabiada, Chagañosa, Turcilina, Chambiona, Salerosa, Tarambana, Cierva ya Estrella. Luegu tinemus una xatina roxina muy flaca qui pusímusli de nombri lu mismu qui si chama la princesa de Asturias: Litizia. Esta xatina tien muitus rimilgus ya nun cume apenas, peru tien un pelu muitu guapu ya finu. Pa encima, pusímusli una esquila  muito guapa qui suena cumu una campanina piquena. Si sal pa lantre la xata desta,  vamus dexala pa aniciu.

Siéntulu muitu, peru voy dexavus purqui tengu qui barrer la corte de  las vacas lu primeiru di tou, ya luegu voy sacar el cuito del curriechu de lus  gochos qui les chega  a la barriga, pa después  muchilus con un poucu de  fulguera pa qui faigan cuitu pa echar a las patacas ya las berzas. Tamién tengu qui subir al capuneiru de las pitas  a ver si pusu el güevu alguna de las pitinas. Algunas veces póninlu fuera del nial ya tengu  qui andar palpándules el culo pa saber  si  pusienun u no.  Estus tiempos ponen pouco, cumu tuvía tan mudandu la pluma, lu únicu qui ponen  son las patinas nel suelu.

Cumu veis  a mi lus añus qui tuve cun  lus flaires de Corias sirviénunme pa bien poucu. Toi fartu de traballar, ya tutal pa nada; nun tengu tiempu ni pa curtexar un poucu. Livántume muy ceu ya acuéstume cumu las pitas, a las nueve y media de la nueite después de mucir ya cebar el ganau, purqui la tilivisión nun me gusta, pareme qui nun dicen más qui burricadas. Lu únicu qui mi entretién algu ye escuitar Radio Narcea pu las nuetis qui tien una musiquina muderna, muitu guapa, ya las ricetas qui dan de cucina. You nun sei cocinar nada, soy una calamidá. Un día fixe un poucu de  caldu di berzas ya salíume tou engruchao ya veirón., tuve que echásilu a lus gochus.

Piensu qui cumu siga asina, voy quedame sultirón  igual qui  lus  flaires del cunventu. Cumu fray Pipín, aquel qui era roxu ya piquinín cun fliquillu,  qui tinía una buena napia. Mi alma qui sí. Si nun cambiu,  va pasame  lu mismu qui  aquel home piquinacu, qui pasou toda la vida de criau pa lus flairones. You a veces piénsulu, ya digu pa mi: ¿qui sintiu tien el qui  un muntón asina de homes, xóvenes ya viellus, tous sulterones, viviendu  xuntus amuzalgaus, sin muyer alguna? Hay cousas qui unu nun si las ixplica pur muitas vueltas qui li dé a la cachola. Lu qui dixu el tureru aquel famosu: “hay xente pa tou, oh”.

Jesusín, "el Pelgar"