AGÜECHANDU-TSES LAS CORVAS (II)

Anueite, na más que cheguei de la corte de mutsir las vacas, pusi-me aitsí al tsau del fou na cucina, ya escapau apaiciu  la Rulindes, que vienu  pa dicí-nus quel sábadu vinideiru dirá don Anicetu, el nuevu cura, una misa na ilesia de San Floxu pur tous lus defuntus de la sua casa, ya de pasu dixu-me lu que punía’l blog riferente a lu  que you garabatiei estus días de itrás. Miánicas you taba un poucu refistulau, peru al uyilu gustou-me muitu. Ya solu pur esu voi cuntá-vus algu más, tamién axeitau pa lu mesmu d’agüechá-tses las corvas a las muzacas.

Cumu vus dixe’l outru día, las mucheres del miou puelu divan a tsavar la roupa sucia a la fonte, la que  chamamus del Pimpanín u del Tsaguazu,  yal rigueiru d’abaixu tamién divan cuandu traía muita augua anque baxara embriespada, peru esti rigueiru muitas de las veces baixaba l’augua chena de murrinas que la xente arruxaba, cumu: gurinus piquenus que murrian del mal roxo, ratus, gatinus u perrus que lus tiraban al augua na más nacere pa que se afugaran purque nun lus quirían criar, ya las gurrias de las vacas cuandu parían. Pur esu a etsas nun tses gustaba muitu ir patsí. Peru divan cuandu nun tinían outru rumediu.

Nu branu las mucheres prifiran fuxir cuna roupa toda pal riu. Faian-nus naspiar a lus guajes delantre pa tsevá-tses  las bancas de tsavar y’asina etsas solu tsevaban lus baldaus de la roupa na cabeza. Lu de fuxir nu branu pal ríu, faianlu subre tou, pa puder tsimpiar la mugre de lus sabanietsus ya de lus  cubertores que yeran de tsana muy pisaus, lu mesmu que las outras roupas de lus camastrus que resultaban muitu grandes pa tsavucalas nu rigueiru.

Tsou tamién ricuerdu que nas  casas apenas había tindideirus pa la roupa cumu esus culgadixus que tienen güei; na mia casa tindiamus-la na sebe ya nas barganizas de la currada, encima de las bardas de lus artus pa que nu la tsevara’l aire,  ya tamién enrriba  de lus varales del pieche del prau. Nuna ucasión escumenza-nun a faltá-tses a las mucheres alguna roupa interior que tinían tindida; subre tou las bragas ya lus sustenes. Ya esu que naquel tiempu las bragas de las mucheres nun yeran cumu pa tiner gulisma pur etsas,  non. Peru lus homes que tses chaman “cheira bragas”, gustan-tses todas, anque  aquetsas yeran de grandes cumu abarneirus u lus goxus de la patacas, y’ancima de felpa blanca u de tsienzu murenu. Peru, asina ya tou, el casu ia que faltaban-tses a minudu algunus destus faragachus de las barganizas de lus praus, ou taban tindidas sicandu.

El casu ía que si foran guapinas cumu las de agora, axustadinas a las ñalgas, ya piquenas, de encaxes, de culores muitu guapus, tuvía miricía la pena roubalas. Anque agora tamién las hai que paecen  la cincha de la burra u el tsoro de xuñir  las vacas al xugu, purque basta agüechar cumu se tses meten  a las rapazucas el rechu esi pu la rabadietsa hasta tras, lu mesmu que a las caballerías la cincha baxu’l rabu. Esas you, ni velas. Miánicas, más que bragas, paecen las curreas de albardal pullín. -La peirona de la Gúmer tsevábalas a diariu: negras, roxas, muradas ya marietsas-.

Tal que las mucheres aquetsas, andaban todas esnalazadas ya mediu trespeitadas purque nun sabían quienes yeran lus tsadrones que se las cuchían. Peru nu miou puelu había pur tsou una mucherona que tuviera muitus anus n’Habana  ya Vinizuela, y’aparte de tar siempre alietsa pa tou lu que fixera falta, tamién tinía pouca vergoña ya sabía muitas cousas de la vida;  subre tou, de lu que faen lus homes cunas mucheres nus camastrus.

Ricuerdu-me  you, siendu‘n rapazacu, de tar un muntón destas  mucheres vicinas, sintadas nus piales  baxu’l horreu nuesu, subre tou nel  hivernu sulechánduse un pouquinín ya partsandu de tou un poucu, ya uyia you el xulgoriu yal estrueldu que mitían estas pelandronas cu nus pias nu suelu mientras escuitaban a la cubana. Muitas veces  ríansi hasta que tsevantaban  las patas de risa de lu que tses taba cuntandu la outra bribona, riferente a lu que tses faian lus homes negrones cubanus a las mucheres, cuandu taban xuntus acubilaus nu camastru, atsí en Cuba  ya Vinizuela. ¡Cuántas detsas se mixarian  pu las patas abaixu más duna ve ya más de duas! Las que escuitaban nun faian más que abrir la bouca, riisi, santiguase, ya decir a cada poucu: Jasús, Jasús, de lu que la outra fandosca tses farfutsaba. ¿Qué tses cuntaria aquetsa mucher, a estas outras paparulas pa riíse tantu? ¡Sabe dios!

Estas mucheres taban tan atulundradas que a una de las que tses faltou la roupa,  ucurriuse-tse  priguntá-tse a esta outra fanduscuna cubana, que ¿quién pudría tsevá-tses las bragas a etsas? La gandulona esta, que taba currida de todas las Américas, al mumentu cuntestou-tse que esu yera cousa de un fetichista. Las outras quedanun apaluminadas ya cuntestanun-tse que, qué yera esu de fitichistas. La cubana dixu-tses que yeran lus homes que roubaban las prendas intimas de las mucheres que tses gustaban a etsus pa puder guletse-las tsou a cada poucu. Anque pa esu, estus homes prifiríanlas que tuvienan usadas ya un poucu sudadas,  más que tsimpias. Ya dicia-tses: tinei en cuenta que lus homes faen cumu lus anemales. Lu mesmu quel burrón  gusta-tse tseirar a la gocha pur itrás, anantias de tumá-la, a lus homes pasa-tses lu mesmu. Na más que cheiran lus baxus de las mucheres pónense alietsus del tou, cumu pa agatuñar pu las paredes parriba. Las outras mucheres nun pechaban la bouca de lu pasmadas que taban, ya nun daban xeitu a lu que uyian.

La cubanona viendu a estas mucheres tan apaxaradas, dixu-tses que tinian que murar la roupa pu la nueti hasta sabere quien yera el fetichista. Ya las outras asina  lu fixé-nun. Lus primeirus días nun agüechanun a nadie acercá-se a la roupa, peru pasau‘l tiempu atrapá-nun al fitichista que nun yera outru que una detsas mismas que tses roubaba las bragas a las outras. Ya esu que naquel tiempu muitas de las mucheres nun chevaban braga nenguna, nin cousa pul estilu. Si acasu, cuando divan al dutor, purque el restu del anu, pa que las quirían;  pa nada, pa esturbar. Esu sabíamuslu bien lus rapacinus cuandu etsas taban na caramietsa de lus freisnus pilandu la fuecha pa lus xatus, ya nos puníamus-nus debaixu.

“Jesusín”, el pelgar