TIEMPU DE MAGÜESTU

Agora que tamus nu tiempu las castañas vienme al ricuerdo cuandu de nenacus nu mes d'outubre, bien ceu tous lus días,  na más risca´l día, sacaban-nus del cubil ya cuchíamus el cestu ya las pañaderas, ya pal soutu a cucher  castañas pur debaixu las castañales. Si taban ruzadas tuvía s'apañaban bien, peru había outras que debaixu detsas  taba aquetsu feitu un mestedal entre: fulguera, artus, xiñestas, ya la propia fuecha del castañal, que nun se vía ni una castaña ya cuandu atoupabas alguna arrabuñábaste lus didus tous pa puder apañá-las.

Naquetsus anus alcuerdu-me que aiquí n’ucidente chuvía muitu más que agora durante tou’l utuenu ya gracias a que tsevábamus madreñas peru asina ya tou, turnábamos pa casa cunus pias pingandu de muchaus, ya cunus didus de las manus tous escarnizaus, atacaus de pinchus ya espinus clavaus. Ya  pa encima de chuver, sempre faía el airón  aquel que lus viechus chamaban: "l'aire las castañas"; lus surrutus aquetsus yeran lus que xiringaban  bien las canas de lus árbules ya lus  arizus que taban regañaus pa que arruxaran al suelu las castañas que chamábamus de dibuchu. Nos, lus rapacinus, en cuanto chenábamus lus cestacus aquetsus u las fardelas que nus aviaban lus pais, chapinábamus a tou miter pa casa pa sentá-nus a la vera‘l fou a secá-nus  purque aparte de tiner muchaus lus  pias chegábamus arrecius de fríu tous tsarizudus. Cuandu chuvía abondu mitiamus-nus nun calaborno  grandón  que taba tou furau ya fradau de caetse encima muitus  rayus  cunas tormentas ya las tonas  del branu,  aquetsu nun yera muitu risguardu, peru   pu lu  menus tábamus atsí acurrucaus a suteitu un ratucu, hasta que estenara un poucu.

Espués al chegar a casa puniamus-tses las castañas a sicar ya sulechar un poucu nu curredor del hórreu. Las castañas naquetsus tiempos faian-nus muitu arreglu nas casas purque pa xantar u pa cinar cumíamus el caldu de castañas que taba bonu,  anque sabía un poucu dulzón, peru pa lus tsambiones yera muitu mexor, ya espués las castañas cucidas pilongas cun tseite na escudietsa, que taban muito bonas, subre tou pa cinar; purque noutras ficias nun pudías puné-te munín. Nun había outru rumediu que papar lu que te punían delantre’l fucicu, ya catsar la bouca.

Mia mai las castañas asábalas nu fornu la cucina de carbón ya tamién turrábalas entre las brasas de la tseña na ciniza la tsariega. Nos, lus esculinus, cuandu fuxíamus pa la escuela tsevábamus lus bulsucus del pantalón atacaus de castañas bien calentinas. Las nenacas cumu nun tinian bolsus nus faragachus detsas  tinían que tsevá-las nas manus y’astoncianas nos quitábamustse-las casi siempre. Pur eso vulvían desti xeitu, todas esnalazadas, glachandu ya fayendu axagüeirus pa casa a pur más castañas. Lus esculinus naquetsus tiempos yera lu que tsevábamus pa cumer nu ricreu: una muzada de castañas asadas u cucidas cun paraza ya tou. Ya gracias. Astoncias nun había “Tigretones” ni mierdas desas d’agora. Miánicas nun faian falta pa nada. You tsevaba lus bolsus tan chenus que mía mai falába-me a veces: Jasusín, ou vas cun esus bulsaus de castañas;  mi alma paeme que  toi agüechandu a tou güelu cuandu taba herniau de lus dos tsaus que paecía que tsevaba pigadas dous fardelas  a las ingles. You cuntestábatse que taba asina muitu bien purque al tar tan calentinas adientru’l bolsu chegábame la calore hasta la muruquina. Mia mai al uyir estu salía itrás mía pa arreame cunu bascachu de xiñestas que tinía pa barré’l fornu de amasar, peru nun pudía cuché-me, you chapinaba muitu más que etsa.

Destu que toi falandu del tiempu las castañas tengu you ricuerdus imburrables que cuandu me vienen a la chola fainme casi churar de l’alcurdanza ya milanculía que m'entra pur dientru.  Cumu dixe anantias  al vulver de las castañas lus rapacinus chegaba-mus cunus pías tous muchaus chenus d’augua y’anque nus arrimáramus bien al pia del fou, cumu parábamos pouco pul fumu que nus faia churar lus güechus, nun tses dábamos tiempu a sicar, pur esu punianse-nus frius ya ribichius cumu si foran figus pasus. You pu la nueti cumu yera el piquenu de tous lus hirmanus, mía mai ya las hirmanas afalagaban-me cumu a un curdeirín, muitu  más que a lus outrus que yeran más rapazones que you.

Yera virdá, you taba algu más meimau que lus outrus, ya cuandu pu las nueites tse farfuchaba a mia mai, pu lu baixu al uyíu, que tinía fríu a lus pías, etsa  sintábase nun tayuelu piquenu que había na cucina ya puníase delantre'l fornu: abría-tse la puerta, sacaba la tseña que hubiera adientru sicandu ya mandábame sintame nu sou rigazu pa que espurriera lus pías pa dientru’l  fornu. Aquetsu pa mí yera una dilicia. En cuantu pasaba un ratadín ya taba durmiu cumu un cepu. You cu nus pías bien calentinus y’al caretsón afitau nas tetas tan bonas que tinía mía mai de xoven, yera el nenu más feliz de la tierra; aquetsu yera la mixor almuhada de tsana del mundu. Ni la mixor que haiga agora, desas  de plumas u mierdas mudernas, la pudría mixorar; ou va parar.

Muitu m’alcuerdu de aquetsus ratadinus de suenu que pasei you nu rigazu de la probe de mia mai cunus pías bien espurrius ya mitíus nu  fornu. Tsástima que nun turnaran de nuevu aquetsos tiempus pa vulver a faer lu mesmu agora. Un día cunteitse-lu a la Gúmer ya la gran xustrona detsa espatarrábase de risa  cuandu tse dixe que quiría faer cun etsa lu mesmu que faia cun mia mai. Pa esu  tinía que sintame nu sou rigazu ya miter lus pias nu fornu. Nese mumentu dixu-me que etsa nun pudía faeme tal cousa, que nun tse petaba purque etsa nun me pariera. Ya tindría razón la cundenada, riniegu lus dimonius. Tamus apañaus. Ya cun esu alon muninus.

“Jesusín”, el pelgar