LA RISA DEL PULLÍN

Güei na más tsevantá-me del camastru, mientras tsimpiaba un poucu el capuneiru de las pitas que, miánicas sin nun yera cuitu solu, ya nun asperaba más, alcurdei-me que siendu nos unus nenacus:  tantu you cumu lus mious hirmanus, xuntu a unus rapacinus vicinus que yeran del mismu  tiempu nuesu, ya que taban siempre aiquí na nuesa casa, entre tous faiamus un gran rabañau de cativus. Minuda xaramandía que tábamus feitus, subre tou lus d’este tsau del pueblu, cuandu nus acuncechábamus  cunas ficias de cuntar cuentus u xugar a lu poucu que tiníamus al nuesu alcance naquetsus tiempus.

Cuandu afuxíamus  pul camín abaixu, unas veces xebraus ya outras xuntus, hasta el cabeiru del pueblu  a  curcovu tsimpiu sin parar, miánicas si nun paeciamus la veceira de lus curdeirus. Lus xuegus d’aquetsus anus pa lus guaxes de lus pueblus yeran poucus ya cun pouca xixa. Astoncias lus rapacinus tiníamus que cavilar ya rumpé-nus la testa  hasta atoupar  outras munxergas que nus entretuvieran cun mexor xeitu, ya  nus engatusaran más. A tou estu, tamién debu decire que las rapacinas  xugaban poucas veces cun nos. Nun quirían las cundenadas purque dicían que andábamus esculgazaus detsas apalpándulas ya emburriándulas a cada poucu,  ya que tses  tsevantábamus las sayas, que tábamus bardinus ya xabardus del tou,  lu mesmu que tan lus xabariles del monte. Ya miánicas,  riventaban cuna virdá.

Agora mesmu paezme tar agüechandu cuandu chapinábamus aquetsa muntunera de xabardus piquenus pul pueblu d’arriba pa baixu ya d’acó p’acutsó p’agüechar  ou pudíamus atoupar alguna burra que tuviera caliente pa xuntá-la cunu nuesu burru. En mia casa toda la vida tuvimos un pullín aveirau a las  vacas, purque mandabamus-stse abondu. A nos faíanus muitu avíu: pa tsevar lus bidones del tseite a la esnatadora, pa tsevar lus fueches de granu a muler al mulín, pa tsevar el cuitu a las viñas, pa satsar y’arrendar las fabas, lus arbeyus, las patacas;  p’acuitar la currada, pa traer la ceba del prau pa lus xatus, pa tsevanus muntaus a tapar l’augua a lus praus, ya pa muitus trabachus más. Outra cousa bona del pullín ía que tamién tira de la satsadora cumu dios, subre tou si ta bien enseñau, purque  cumu ía un anemal piquenu ya mañosu, anda muitu bien pur entre lus riegus de lus estaxus entre las plantas, cuandu ya ta  creciu el frutu sin pisá-las apenas. Un pullín ía un anemal que enxamás sobra  nuna casa de tsabranza, ya encima come poucu el probe.

El de nuesa casa yera piquenu ya retaquín peru salerosu ya gayasperu cumu él solu. Chamabamus-tse Rifón, purque gustaba-tse muitu andar itrás  de las burras. Na más que gulía una que tuviera algu caliente punía las urechas alietsas del tou ya escumenzaba a runzar ya riísi. Sí, sí, dixe bien: a riisi. Nun sei si vus tien cuadrau de agüechar algunu cuandu ta la burra mixandu yal pullín ta al tsau detsa; nesi mesmu mumentu aveira’l fucicu a la mixada ya siguiu baixa las urechas del tou hasta pigá-las al piscuezu,  tsevanta la cabeza ya rimangal labiu d’arriba ya enseña  lus dentones ya las encías hasta más nun puder. Asina ta un buen ratau riyénduse, yal poucu vuelve a guler a la burra, ya vuelta a riíse. Nuna destas, en cuantu para de riíse, si la burra ta un pouquinín engulismada ya quietina, cuandu quier dase cuenta ya tien el pullín encima. Más duna vez ya más de duas, el nuesu tien fuxiu solu al trote del prau, arrincandu l’astaca ou taba atau, ya cunu rechu arrastru ya tou escapaba pa ou guliera que había una burra caliente.

Nu pueblu nuesu naquetsus anus, había un home  que trapichaba cunus burrus, cumu faía  Juselillu el gitanu en Cangas,  ya  tinía un rabañau detsus de dios nus tsibre, tous encierraus  nuna poula grande itrás de la ilesia. Cumu atsí había muitas burras, el nueso Rifón a cada poucu fuxía del nuesu prau al trote ya tiníamus que ir a buscalu atsí. A veces vulvía pa casa tou sangrau, tsenu de mataduras pul tsombu yal piscuezu, de lus murdiscones ya couces que tse arreaban  lus outrus pullinus pa nun deixa-lu que tses muntara las burras. 

Nos, lus rapacinus, tábamus fartus  de agüechar  nas casas nuesas tou lu rilaciunau cunus anemales: cumu el toro muntaba las vacas, yal burrón a las gochas, tamién el castrón  a las cabras, el carneiru a las ouvechas, el gatsón a las potsas, etc., peru a nos lu que más nus prestaba yera amerar pal  pullín cuandu si riia tandu muntau encima la burra. La burra la probe taba quieta ya nun paraba de abrir la bouca ya muvé-la p’arriba ya pa baixu cumu si tuviera mascandu chicle, asperandu  a quel pisau del pullín se baixara de encima detsa. Cumu dixe, lu más sempáticu pa nos yera  agüechá-tse el fucicón al pullín cuandu lu tiniá rimangau del tou p’arriba, ya cunus dentones ya lus caniles tous al aire.

Un branu pul mes de xunu que yera cuandu chegaban lus madrileñus al pueblu p’ayudar nas casas a pañar la yerba de lus praus, vienu un rapacín  que yera mediu fatu ya un poucu pasmau. Cuandu s’aveiraba a nos nestas xugadas del Rifón, a cada poucu intrugábanus a tous, peru a mí subre tou, ¿pur qué se riía tantu el pullín cuandu gulía a la burra?, ya nos cuntestábamus-tse que: ríise pa que a la burra tse  paezca sempáticu ya guapu ya asina tse deixe muntá-la. El rapazucu puníase pensativu sin falar parula alguna y’ameraba pa nos. Astoncias apruveitábamus pa decí-tse lu que tiníamus amañau: ¡A Manulín! outru tantu de lu que fae el Rifón cuna burra debías de intentá-lu tú cun Palmirina, la ficha de “La Pimentera”, que naquetsus añus yera tuvía una guaxuca piquena, peru ya taba repotsuda ya escumenzaban a asumatse unas tetinas muitu guapas. A la madre desta nena, chamabamus-tse la pimentera purque tinía buen aspeutu, yera una mucherona, peru chapinaba a saltiquinus lu mesmu que fae el paxarín esi tan guapu que tien la gorxa roxa. Di mumentu el magüetu del rapàz, catsou la bouca ya nun falou nada;  peru al poucu de uyir estu que tse diximus, rumioulu un poucu ya miánicas criyiulu tou al pia de la tsetra ya foi tou esnalazau pa casa a cuntatse-lu a la vera a sua mai. Peru esta mucher que naciera nu pueblu ya,  a pesar de tsevar muitus anus pa la ciudad, nun yera tan fata cumu el fichu  ya decíatse a vouces pa que nos l’uyéramus: Manulín, nun creas nada de lu que te farfotsan estus galafates  aldeanus que son tous unus inorantes ya unus catetus. Esu que te cuentan ía tou mintira; ya lu de la Palmirina son burricadas detsus, purque nun saben divirtise cun  outras cousas mexores. Faen lu mesmu que lus anemales, ya  esu tou que t’entaman  fainlu p’amañar xirigonza cuntigu burriquín. Miánicas nun espabilas nada; nun sos más que un  fatueiru. Ven p’acó agora mesmu, ya nun tses faigas casu a ese rabañau d’inorantes y’alfabetus que nun salienun nunca de l’aldea. Tan tous igual quel pullín de “Jasusín”. Ya nun vuelvas a xuntá-te cun etsus; nun ves que nun tienen vergoña ni  faen xeitu ni igualdá alguna cuntigu.  Tú  ten en cuenta que vas a ser  arquitetu pu lu menus, ya tous estus tulondrus nun tienen outru rumediu  que andar toda la vida revulcaus nu cuitu ya itrás del rabu las vacas.

Fettivamente, al pía mesmu;  nos que ya tábamus espatarraus de risa, farfutsabamus-tse a vouces ende el camín tous xuntus: “¡Esu, esu, arquitetu sin escudra ni cartabón, pruyecta las mismas casas quel miou Rifón!”.

Ya cun esu alon rapaces. Home non, tsounón.

“Jesusín”, el pelgar