PASAU SAN MARTÍN, DEIXA‘L GOCHU DE GRUÑIR

Fai apenas un ratucu de nada, vienu la Rulindes aiquí a la nuesa casa a traé-nus un cachu tarta de queixu que failas muitu bien esta rapazaca,  ya siempre que amasuca algu p’ahí  trainus la prueba pa que nun nus entre la gulisma. You taba abaixu nu cucinu viechu atizandu bien el fou cun xiñestas pa curar las murcietchas ya las tsinguanizas que tan ricién feitas, ya paeciu-me agüechar  a esta cundenada debaxu de l’horriu quieta cumu si fora un espantapáxarus; nesi mumentu pinsei que quería puné-se a partir tseña, peru non, paeciume que traía algu tapau cunu mandil. Escapau dixu-me etsa: Jasusín, esta nueite cuna escudietsa del tseite que tsapas espueis de cenare, anantias de ir pal cubil, vas cumer un tsambeu bien ricu. Aiquí vus traigu un pouquinín de tarta de quiexu que ta recien feita nu fornu la cucina ya ta muitu bona.

 Mientras partsábamus un poucu de lu murgazón que t’al  tiempu ya de que nun hay cuartus pa cumprar muitus chambeus de Navidá dixu-me etsa que,  na más acabar de xantar, mientras tse s'espantaba  un poucu la murnia,   tuviera agüechandu  el blog de lus rapaces de Corias ya  que andaban muitus intrugandu  pul Pelgar, que quieren sabere ou anda que nun das señales de vida. Nesi mumentu falei you pa mín: andu you buenu comu pa espaparutá-me amerandu pal Blog,   esu;  nun faltaba más. Ya nun ía que nun me guste, non, ía que nun tengu ni un ratau tsibre. Digu-vus la pura virdá rapaces, andu esqueiciau del tou  purque agora fai-se escapau de nueite ya nun me da’l tiempu pa nada. Tous estus días d’atrás anduvimus enredaus ya mediu tsoucus cuna matanza ya cunu mundongu,  ya nun tengu tiempu ni de tsavá-me.  Menus mal que na más tsevantá-me pu la mañena, chenu la palancana na fregadera de la cucina, ya echu-me unas buenas muzadas de augua fría pul caretsón, piscuezu ya urechas, pa espertare. Peru asina ya tou andu tou esnizau tsarizudu, cunus gadechus muitu tsargus ya enredaus embaxu la gorra, que paezcu un antroiru. Estu a mín nun me gusta purque la Rulindes dime que sin nun me tsavu más a minudu, aparte de guler mal, paezcu más viechu de lu que soi. Ya tien toda la razón.

Este anu lus subrinacus mious nun vienen pa Nochebuena, dixu’l piquenu que lus outrus galifates fuenun cunas nuviacas que echá-nun fai poucu, pa Cancún a faer la frasca, que ía lu unicu que saben faer. Atsá etsus. Nos aiquí vamus a fartá-nus bien de pitu de curral  cun pataquinas redondas feitu nu  fornu, cun buenus pucheiraus de vinín de Cangas. Tuvía el outru día acarrexei nu tractor you una barricucha del pa casa. Ía del nuevu deste anu. Ta que fierve tuvía, peru sabe muitu bien. Espueis del gatsón cunas patacas cumemus fichuelas que fiximus un muntón detsas cuna sangre que subrou de las murcietsas,  ya pa postre arroz cun tseite que mia mai fai-la muitu bien. Ya pa rimate el  turrón de Xixona ya de Alicante cun sidra del Gaiteru que sabe cumu dios. Una ve bien fartus tous pal camastru a durmire, pal día de Navidá  tar alietsus que bien ceu you debu tsevantá-me p’ayudar na casa la Rulindes a matar. Tengu que faer un buen fou y’atizar p’alante pa calentar l’augua del caldeiru hasta que fierva pa que al miter lus gochus nu maseiru pa pelatses las serdas, monden cumu si foran güevus cucius.

La xente que garabatea aiquí nu blog nun entiende destas cousas, cumu andan de subraus pu las ciudades toul día de siñuritus nun dan golpe. Pero nos, lus d’aldea, nun  pudemus faer esas xirigonzas. Tiné-mus que trabachar tous lus días; sea  tsunes u vienres.

Asina rapaces, que tingais tous unas Filices Pascuas, y’al Nenu que naz mañena,  tsástima que nun chegara cun bonas ganas de griesca p’asfarrapar a la muntunera de fulgazanes  que hai ya de currutus nesti país;  ya de pasu, a ver si nus axeitara un poucu estu de lu esgubernau ya trespeitau  cumu ta tou. Ya cun esu alon muninus.

“Jesusín”, el pelgar