TSIBRUS CURIOSINUS

Liyendu aiquí neste blog un día destus, ya fai tiempo, nun sei si foi un tal Samuel, creu que sí. Dixu que él cuandu tinía dudas de la ortografía que las solventaba escapau  cunsultandu  un tsibrín piquenu qui tinía que se chamaba diccionariu ortográficu pulga de la casa MIKRON. Miánicas que muviúse-me el curazón nel arca al uílu. Casi mi diu un reblincu el mutor. Ia  virdá,  díu-me muita alegría leyer estu pus dixe: cumu ese tsibrín que di esti rapaz, tengu you unu  tamién igual. You nun sei desde cuandu lu tendrá  el mozu esti;  di Navelgas paezme que ye, peru you cumpreilu nus anus cincuenta  a Pol el de la  Tsibrería Narcea, cuandu you taba estudiandu, o mixor dichu, que faía qu’estudiaba cunus flairones del convento de Corias. Esti tsibrín tuvi-lu sempre nuna gran estima ya  guárdulu nun caxón que tengu pichau cun chave  pa qui lus rapazacus de casa, lus subrinus,  nun me lu esqueiren. Cheva cumigu este cacharrín, casi sesenta anus; dentru de pouco lus faerá. Estu del diccionariu rabucu ye pareciu a aquetsa tsibretina que sacou un día ese rapaz de Pousada de Rengos que yera fichu dun  xastre creu, ya  si nun toi esviau, paré-me que ye el que  entamou tou este enredo   del blog.

Debo dici-vus que téngu-le a  esti tsibrucu muitu afeto purque, la virdá hai que dicila,   sacóu-me de muitas dudas en  muntunes d’ocasiones. Gracias a él nun fixe bien feito el ridícalu al tiner que tsenar  un papel en Curreos un día nu branu pasau, pa puner un xiro telégraficu d’una multa a Lugu. El papel que tenía que chenar pidía-me que anutara el númaru de la cantidá de lus cuartus  en tsetras ya you nun sabía escribilu. Si nun fora pur el tsibrín ésti hubieran curriu  cumigu la zueira bien  hasta fartase, tous aquetsos milandrinus manchapapeles.

Cuandu el fulgazán  aquel del ventanietso  agüechou l’impresu tan bien rellenau quedóu-se espaparotau ya amirandu pa mí, mediu pasmau;  casi nu lu creía que you solu fora capaz de anutar todu aquetso ya cun’aquel xeito. El restu de lu que partsamus lus dous, el funcionariu ya foi muitu más amable cumigu que lu que fora anantias. Pero, miánicas que  debía de tener lus culmietsos retorcius purque pa puné-me nun aprietu díxume dilantre de toda la xente: tú que paré que sabes tantu, dime el ordinal de ochucientus. You saquei el tsangurdiu del tsibrín miou ya cuntestei-le: octingentésimo. El humecón aquel que taba tou esbaldragau cuna faragacha la camisola fora del pantalón, ya cun  trazas de  fulgazán, quedou d’una pieza, espaparotau del tou. Pechou la bouca cumu si acabaran de afoga-lu, ya nun gurgutou parula. Dixe you pa mi: nun hai cousa mexor na vida qu’el tar bien priparau pa  sabere chapinar pul mundu oh.

Outra vez tandu en Madrí nel aeropuertu tinía you que yir a tsevar un recau a unu de lus hangares yal escribir lus datus pal pase d’entrada  cuchiume la duda que si hangar debía de puné-se  cun hache u sin hache, peru nun taba siguro, ya cumu soi muitu cumicientu, escapau amiréi-lu nu miou tsibrín ya,  n’efetu, yera cun hache. El muertufame  aquel, flacu cumu un garabuchu  cun cara de rinubleiru, que taba atsí na puerta pa tsevantar  ya baxar  la piértiga aquetsa de fierru, quedou asumbrau purque lus outros todos escribiérun-lu mal, sin hache.

Astoncias, el bilimbao aquel priguntóu-me si you taba estudiau. You díxele que pouco, qui tuviera unus anus cunus flairones de Corias en Cangas del Narcea. Peru ¡chachu! Na más dicile estu, fíxuse amigu miou al mumentu, pus cuntou-me que’l pruvenía d’un pueblín del Ríu Couto qui agora nun vive naide, que se chama Cagatseito peru que tsevaba muitus anus en Madrí de sereno pu la nuite ya pul día atsí na uficinuca aquetsa.. A lus pocus días tuve qui volver ya, na más ve-me mandou-me pasar pa dientru sin faer el papiluco ni nada. Tengu muitus  más ricuerdus simpáticus  pa cuntar del tsibrín este  pulga, peru agora  nun  m’alcuerdu d’etsos.

Este chismín cumu sou nombre di, ye ortográficu solamente, pur esu las parulas que nun tienen ortografía nun vienen. Pur exemplu: si buscamos mesa, nun vién purque esta parula nun tién nada que poda escribí-se cun  xeitu distintu. La xente qui nun lu cunoz fáe-les muita gracia cuandu lu güechan pur primeira ve ya ríen-se; sobre tou  pu lu  minudu ya ruinu que parez. Pero cuandu les digu que una cousina asina tan piquena da muita siguridá ya esfauta a uno muito. Astoncias ya lu ven cun outros güechus.

Esta casa de MIKRON fae-lus tamién de  muitas tsinguas más, cumu el francés, el alemán, portugués, inglés…etc. A lus nenos de agora estas cousichinas nun les faen gracia ninguna. Si foran las consolas esas del diantre sí, pa estrapachar marcianus ya munigotes. Mientras xuegan a esas tuntadas taban bien aprendiendu bable ucidental, cumu faigu you. ¡Cuántu más les valdría!

“Jesusín”, el pelgar