¿A QUÉ GÜELEN LAS NENAS?

Güei pu la mañena,  anantias de baxar al cunsultoriu a pu las melecinas que tomu a diariu, pa la tinsión ya pal riuma, atoupei-me nu mediu’l camín cuna Rulindes que vinía la probe cargada cumu si fora’l pullín. Solu tse faltaban las parigüelas u lus xerones. Miánicas traía al tsombo un feixe de ceba  tan grande que tapaba-tse pur cumpletu hasta lus pias. Paecía una facina esguilandu pul suelu. Na más s’agüechaba un muntón de ceba enriba de unas madreñinas piquenas que chapinaban muitu lixeras. Cuandu tse dixe: ¿Ou vas tan cargada Rulindes? Miánicas veis riventar oh. Astoncias etsa cunuciu-me pu la fala ya cuntestou-me: Ah,  sos tú Jasusín. Voi cuna ceba pa lus xatus que tan bramandu na corte de la fame que tienen lus cundenaus. Agora que tas aiquí, anque nun puedu pará-me muitu cuntigu,  voi dicí-te que lus rapaces ya rapazas del Blog esi de lus dimonius, andan numbrandu-te ya riclamandu-te a cada poucu. Astoncianas, qué quieren de mí esus subraus, cuntestei-tse you. Ay munín, quieren que garabatees nu Blog esi más a minudu. Paez que  tses gusta lu que tses aldrumeiras de las  cousas daiquí del pueblu.

Deixar, deixou-me un poucu apaxarau, peru nese mesmu mumentu,  puxe-me a cavilar lu que me dixu esta nena,  ya espueis dun ratucu, pinsei: tengu que puné-tses algu a esta xente pa que nun refundien muitu de mi. You tengu pocu tiempu, nun ía cumu etsus que tan bien fulgaus ya  tan toul día de sobra; nun fain más que cumer y'andar de fulixa tou’l día ya pur tous lus tsaus, peru voi a intentá-lu purque miánicas, chegou a priucupá-me un poucu esu de que a toda esta rapazada tses guste lu que you tses aldrumeiru. Subre tou  cuandu tengu tiempu ya m’alcuerdu de las picias que faiamus de rapazacus nus pueblus.

Nesti casu voi cuntá-vus algu que a mín faime muita gracia. Dicen las mucheres que lus homes tseiramus poucu. Ya que etsas, las mucheres, güelen muitu más que nos. Ya ía virdá. Peru, asina ya tou, you tamién ricuerdu de nenu cúmu gulían cada una de las rapacinas cunas que xugaba-mus que  yeran del mesmu  tiempu nuesu. Taba la Filisina que yera ruxina ya pelirroxa cun muitas pezas. Esta nena yera un poucu ruinuca ya dilicada;  sua mai taba siempre restregandu-tse  enxuagues ya ungüentos pa lus dulores. Miánicas, esta rapacina había veces que gulía a güevus podres, ya yera pu lu que tse untaban na cabeza; tiníala tsena de pustillas ya de custrones, purque caíatse muitu’l pelu. Pur si fora poucu cun estu, tamién tse faian tsapar aceite de fégadu de bacalau que tseiraba mal  ya sabía muitu pior. Nos huyíamus detsa  cumu de la peste. Espueis, pasaus lus anus, fixu una muzona que manda madre. Home non.

Outra rapazaca que taba muitu guapa, yera  Cristina. Esta nena yera fuertona cumun rebotso. Tinía unus cadriles que dios nus tsibre; paecía una yegua percherona. A nos gustábanus muitu a tous pu lu guapa que yera. Cuandu taba sintada u escarqueixada n’ascalera l’horriu subianse-tse las sayas algu ya enseñaba un poucu pur encima las rudichas. Esu a nos puníanus alietsus del tou. Esta guaxuca además de guapina gulía muitu bien siempre;  ya voyi dicí-vus purqué. Al tiner lus muslus ya las perneconas tan fuertonas xuntábanse-tse muitu, ya ruzábase toda de tantu ristrigar un cadril contra’l outru al chapinar. Astoncianas la sua mai chenaba-la de polvos de talcu bien pirfumaus; d’aquetsus de la marcas: CALBER u MIRURGIA. A etsa dábatse muita rabia cuandu tse intrugábamus: ¿Cristina, güei güeles muitu a polvos de talcu, esu ía que tas  ruzada? A etsa tsevabanla lus dimonius uyir estu, y’astoncias escumencipiaba a refundiar: ya vos que vus emporta sinvergonzacus; tsangurdius de mierda. Pu lu menus you güelo bien, non cumu vusutros que guleis tous  a cuitu purque nun vus tsaváis nunca. Nesi mumentu, afalagábamusla un poucu, yal ratucu ya taba outra ve mansina ya cuntenta. Yera buena nena. Nel beitse, lus rapazacinus,  tous quiríamus beitsar cun etsa: pu lu guapina, pu lu bien que beitsaba ya pu la espetera tan bona que tinía.

You tamién m’alcuerdu de la Sulitina. Esta rapacina en sua casa yeran un rabañau de nenus que dios nus tsibre, ya tsavaban-se poucu tous. Las cortes del ganau taban siempre chenas de cuitu. Pur esu murrian-tses lus anemales a cada poucu; sobre tou lus gurinus del mal roxu aquel, que yera la peste africana. Cuandu tsegou al pueblu el primer vitirinariu dixu-tses que,  u tsimpiaban bien las cortes yal ganau,  u murririan-tses tous. Astoncias cuchienun pur norma ruciar las cortes cun Zotal. Ya fixenunlu de tal xeitu, que aquetsa casa gulía toda a esi disinfectante purque esu caltriza muitu. A la Sulitina ya la tseiraba-mus tandu a  una legua detsa. Lu pior yera que,  cuandu nun gulía a Zutal, cumu tinían esnatadora na sua casa, muitas veces tseiraba a tseite ácida que tumbaba; a tseite dibura, la que queda espueis de quitá-tse toda  la nata pa fae’l queixu u la manteiga. Nun sei lu que yera pior, purque esti gulor ácidu resultaba muitu ufensivu. Menus mal que de vez en cuandu tsavucábase un pocu cun xabón del Tsagartu. Peru cun gulor ya tou,  nos chapinábamus tras detsa a tou miter en cuantu la gulíamus.

Nos, lus rapazacus, cumu reblincábamus muitu ya nun parábamos quietus un mumentu,  las nenacas estas dician-nus que nus gulían  muitu lus pias a queixu Cabrales ranciu, ya yera verdá. Tiníamus puestus lus mesmus calcetus un muntón de días, sin cambia-lus, al fenal gulirían a rayus podres. Peru esu a nos, nun nus ufendia nada. Tábamus acustumbraus.

La mexor de todas yera  Teresina. Esta nena tinía la custume ya ubligación de datse al sou güelu, espueis d’afeitase, el Floid aquel pul caretsón, que gulía muitu bien. El viechu nun pudía cutser el frascu purque tinía Parkinson ya arramába-lu tou pul suelu. Cumu astoncias nun había muitus pirfumes, esta nena ristrigaba las manus na sua roupa pa tsimpiase ya pur esu espueis gulía tantu Ya cun esu alon, rapaces. Estus son lus pirfumes que tuvía ricuerdu de cúmu gulian las nenacas del miou pueblu. Peru lu mexor de tou yera el gulor natural que daban estas rapacinas, que yera un gulor sanu a xuventú. Daba gustu tseirá-tses tou. Tou; ende la cabeza a lus pías.

“Jesusín”, el pelgar