CUENTINUS DE L’ALCURDANZA: MUNÍN, CUECHE-ME LA PITA

Lu primeiru que quieru decire  ia que, neste blog hai-lus que tan más atentus a  pilla-me a mí nalgún rinunciu, que a los cuentinus que tses entamu. Sois el diantre rapaces, mi alma que sí. El enredu del outru día fói culpa de miou pai cumu ya dixe,  peru entre miou pai ya you, anque nun tiné-mus muita rilación, pero pa partsar destu de Corias ya de los flairones, cuandu él ta espabilau sí tamus da cuerdo ho. Tamién debo dici-vus qu’el mechor de tous vusotros yal más agradeciu ía esi rapaz que’l padre yera taxista que tuvo na quetsos tiempus el bar Royalti en Cangas, sí ho, chámase Víctor de nome ya de apelliu Gión. Da gustu cunel, prestai tou ya diz que disfruta cuandu tsee estas refiertas mías, purque tan feitas na nuesa tsingua. Mi alma que ye un home muitu agradeciu ya sempre ta riénduse oh. Muitas gracias  rapaz, n’el nome del mangante de  miou pai ya n’el miou propiu.

Entamau este escumienzu, pa dexar claru l’asuntu, pasu a cuntá-vus algunas cousas de cuandu you yera un guaxe piquenacu. Daréis-vus cuenta que you cunas mucheres chévu-me muitu bien ya sempre las defiendu, anque d’algunas veces reniegue detsas, sobre tou,  cuandu toi que me tsevan lus demonios.

You di piquenu, taba toul día agarrau  a las sayas de mía madre ya de las mías harmanas, andaba tras detsas cumu’n perrín faldiegu. Etsas dicián que you diba  salir un bon faldeiru, ya mi alma qui nun s’equivocanun muitu. Lu pior ye que agora las guaxas xóvenes nun amiran pa mi, ya las castronas que son cumu you fain-me tamién poucu caso las condenadas. De todas las maneras las mucheres viechas del miou tsugar sempre dixenun que you fora un bon nenu ya muitu ubedienti ya bien mandau pa cualquier cousa que necesitaban de mí. Una vez había una mucher que  andaba trás d’una pita que se l’escapara del capuneiru ya subiera-se al campanariu de la ilesia ya la mucher aquetsa nun yera capaz de echa-la a embaxu. Nesi mumentu pasei you, que andaba de sobrau pur atsí ya díxume: a munín purque nun t’engarabitas enrib’al teito de la ilesia ya espánta-me aquetsa puta pita  que ta atsí apousada ya nun quier baxare de la caramietsa’l campanariu. Ya díxele you, si ho, agora mesmu.

 Agatuñei cumu pude pu la parede p’arriba ya cumu diba agachadín la pita nun se diu cuenta de mí ya cuchila pu las patas apruvechandu que taba espaparutada. Asustóu-se tantu que esnalazába-se toda ya glachaba cumu si la tuvieran afugandu, peru you miti-la baxu’l brazu ya pa embaxu cun etsa. La mucher al entregá-se-la na manu nun sabía qui fae-me. Díxu-me: munín ven pacó que te voy dar una cousa, you fui dietrás d’etsa  hasta’l parreiru que  tinía atsí las pitas cun el gatsón ya  diu-me, media ducena de hovos roxus cuasi mouros ya fresquinus ricién puestus, muito bonos. Al chegar a casa, mía madre nun se lu creía ya tinía tserza de que you  lus hubiera quitau dalgún nial axeno. Peru acercouse hasta la mía casa la vicina ya dísutse a mía madre: ¡vaya salerosu ya alietsu que ía el tou rapaz piquenu Jesusín! Acaba de  cuché-me una pita que se m’escapara pal picu del campanariu ya baxoú-me-la escapau nun puñau. Ta áxil cumu un esquilu, ya ía un gran nenu. Tinía you que xuntá-lu cando sea mozu casaderu cuna mía nieta Gotzone, la que ta en Erandio en Vizcaya,  qui mi alma faían bona parexa pois, la mía nieta tamién ia espigada ya fuerte cumu él, aparte de  muy dispuesta, ya salerosa. Ah, ya olvidávase-me decire, que la mia nieta tamién ia muy tetona, cousa que a lus homes lus vuelve tsoucos. Mía madre ya you catsamus la bouca.

Aquetsa  mucher tenía muita razón cun lu que farfutsaba, lu pior foi que la salerosa de la nieta, cuandu chegou a moza tinía la cabeza algu tsouca ya nun quixu sabere nada  cumigu. Bona pena tengu you de nun habé-me xuntau cun aquetsa rapazona;  menuda xata taba feita a lus vente anus. Tuvía ía el día de güei  que,  cun casi sesenta,  mantién-se  bien repotsuda ya bien frescachona pero todo hai que deci-lu. A mi etsa gustába-me muitu, peru el nome que tenía  prefería nun oílu. N’el País Vasco será un nome normal peru aiquí, home pur Dios, si paré que tse tas chamando guchona. Sua buela dicía lu mesmu que you peru, lus padres cumu fuenun patsí de xóvenes acomodánun-se a las costumes d’atsí ya préstatses todu aquetso. Cumu dixenun etsos,  tamus integraus. Peru ese nome nun debienun punése-lo nunca. Lus buelus quirían punetse Perfeuta, peru la madre nun quixu. Ya cun eso alón,  terminou cahamándu-se desa manera tan extraña ya casi virgunzosa: Gutzone. Menus mal que la rapaza ia límpia cumu’l jaspe, sino taba aviada cunas bromas;  sobre tou cuando vien aiquí al puelu qui somus el demoniu pa estu de mutexar a la xente. Sin dir más tousuxe, a un tíu desta mesma rapaza que se chamaba Manulu, de xoven  gulía-le mal l’aliendu ya sempre tenía la bouca chena d’un espumatseiro. Pus bona la fixu, nadie tse chamaba Manulu a secas, tous lu cunucíamus cumu: Manulu boucapodre.

Tengu que dexa-vus. Pirdunaime purque, pareme que ta sonandu un teléfano ya nun sei si ye nu cuartu miou ou na solana, ya agora mesmu alcuérdu-me que tuvía nun chamei a la Gúmer, ya si nun lu faigu güei enmórrase-me ya luegu nun me vuelve a chamar. Da igual purque apenas sabe decire duas ou tres parulas. Las qui you l’enseñei ya poucu más. Pur teléfano di-me: “tú toro, tú toro; you tenrala”, ya nun hai quien la saque desta matraca. Peru lu que más echa de menus esta mucher, ia el nun puder beitsare cumigo el son d’arriba que tse gusta muitu. ¡Qué tse vamos a faer, hai que aguantase! Ya you cuntentu, d’aguantá-la,  pu lu menus tengu alguien que me chama, anque sea sólu de vez en cuandu.

"Jesusín", el pelgar