EL PIERCING DE LA GÚMER

Tengu qui davus una bona nuticia ho. L’outru día taba you arramandu’l cuitu nel extaxu que tiné-mus al lau del parreiru, si, xuntu a la currada, ya escuminzou a estrulda-me’l teléfano móvil; sigún lu cuetsu pa cuntestatse al que taba chamandu oigu decire: Jesusín, Jesusín, Pelgarín…. Quedei apaxarau de mumentu peru, al poucu caí de la burra ya di-me cuenta que, pu la voz tan melosa ya zalamera yera la Gúmer. Na más cuché-lu paeciu-me que debiu de escumenzar a faere pucheirus ya churare. You uía gañír que miánicas paecía una gatina piquena miagandu; al poucu, díxu-me que chamaba purque nun aguantaba más, que nun se afae sola ya quier que vuelva cuantu antes pa Tinirife pa tar cun etsa, pu lu menus unus poucus días.
You dixetse que esu yera lu que you quisiera, peru que agora nun pudía. Si miou pai fora un poucu más trabachador ya más furmal, sí pudría escapa-me unus días, peru cumu ía un pelgar ya un fulgazán nun se pode cuntar cunel pa nada; na más que p’andar tou’l día de melandrín suplandu pucheiras de vinu de Cangas pu lus chigris. Ya si fora poucu cunu desti bartolo, pa’ncima mia madre marchou unus días pa cuna hirmana que tien en Cuenca. Dixu que de este anu nun pasaba sin que etsa agüechara la prucesión de las Turbas en Semana Santa, ya pa colmu de males, esti anu cai muy arriba, a finales d’abril. Ya cunesu toi solu pa trabachar na casa. Lus subrinacus nun me faen nada. Si fora ir pal butellón a cada pocu esu sí; peru arrimar l’hombru na casa, nun tses gusta.
La probe Gúmer al uir estu que tse ditse quedou escunsulada ya muitu cuepa, peru you nun puedu faé-le outra cousa; ya lu pior ía, que etsa nun lu’ntiende del tou, ya piensa que you xebru-me detsa, pa iscurri-me, ya nun ía virdá..
Díxe-tse qui nun pudía dir pois estus días hay abondu que faer na casa. Tinemus aparti del ganau, que acuitar las tierras, tsabralas ya semar las patacas en cuantu seque algu’l tirrenu, ya nun tengu quien m’eche una triste manu. Toi pirdiu cunesti mangante qui tengu de pai. Nun val pa nada más que pa soplar buenus chanqueirus ya pune-se cumu una xoxa.
Nun sei lu que pudienun enseñatse lus flairones en Corias, peru la virdá ía que lu poucu que ts’enseñanun pa nada tse valiu. Menudo pelgar ta feitu. ¿Cúmu nun iba a salir you outru mangantín cumu él? tiniendu esi exemplu na casa; abondu dereitu ya axeitau salí.
La Gúmer tamién me dixu que desde que you marchara de cun etsa nun pudiera vulver a beitsar el son d’arriba ni la xota, ya qui ta muitu tristona ya mustia purque nun tien quien la xiringue ni la riblinque cumu tse lu faigu you. Cumu nuvedá díxu-me que faia poucu que se puxiera un fierru desus que etsa tsámatse “piercing”, peru que ía cum’un pindiente, peru non pa las urechas non, púxuse-lu nun sitiu qui nun se pode decire aiquí nu blog, ni tampoucu se lu pode ver naide si etsa nun quier. Sabrá Dios ou se lu puxu esta muchere. Pa dicir etsa que nun se lu pode ver naide si etsa nun quier, miánicas qui debe tar bien iscundiu ya bien risguardau. Siguru qui lus más picarones de vusotrus ya lu adivinanun, eh; aquí sí. Ya digu you: “¡vaya sitiu pa enganchar fierrus! Cúmu pa luegu andar esqueirandu pur atsí. Quiá, you esu nin tucá-lu, siguru que tará tou ferruñosu ho.
Esta muchere tumou-las cunus fierrus esus ya cunus tatuaxes desde’l día qui viu el qui you tengu nu brazu dereitu de candu tuve en Regulares 5 en Melilla faciendu la mili, qui pon “A mí la Legión”. Na más véme-lu gustoutse muitu. Candu tuve cun etsa la última vez ya taba tou’l día encima mín pa que me fixera outru garabatu nel outru brazu cun el sou nome; peru no cun Gúmer, cumu le chamu you, no, cun el de virdá detsa qui ía muitu más tsargu, ya vus lu dixe un día. You poucu a poucu foi curriéndu-la di mumentu ya diciéndu-tse qui sí, qui pa outru día. Peru agora nun catsa la cundenada cuna dichosa munxerga.
Peru etsa nun catsaba la bouca y’agora vuelve a lu mesmu outra ve. Tamién quiría que m’alambraran un aru d’esus nas urechas, peru dixe-tse que you alambres esus solu tse lus punía-mus a lus gurinus nus fucicus pa qui nun tumbaran las portas de lus curriechus; qui cumigu pa esu que nun cuntara. Peru estas mucheres cumu son muitu caprichosas ya tercas cumu mulas, agora salta-me cunesta murga del tatuaxe del caraju di nuevu. Voy tener que faeme unu anque sea cun rutulador. You mi alma atsouquezcu candu oigu estas tuladas. Tenei en cuenta que esta mucher ya nun ía ninguna guaxa. Ía una bona xata ya bona xamona, esu sí, peru tamién ta’ntrada n’arrobas ya’n anus ho; miánicas qui pudía ser mía madre, bien agustu. Peru esta muchere va de muderna pu la vida ya hai que acetá-la asina, u dexá-la. Peru nel fondu ía bona rapaza ya sempática. A min gusta-me muitu tar cunetsa.
You lu de puné-se lus fierrus nas urechas u nas narices dame la risa candu lus veu, yal’gunus son del tiempu miou ya mayores. Digu pa mín: mira estus cativus qui pintas gastan, paecen lu mesmu qui lus salvajinus de la selva amazónica. Probes, qui pena mi dan. Ya le dixe you a Gúmer, peru mucher nun ves qui si you asomu pul pueblu cunu fucicu u las urechas alambradas méten-me cunus gochos na corte o nel curriechu. Etsa ríisi purque nuntiende apenas nada de tou lu que tse aldrumeiru. Lu qui mi tien más musqueau, cumu dixe anantias, ía lu del sitiu donde se fixu esta condenada el furacu pa que le engaramicharan el fierru esi en forma de anillu. Lu más curiosu ía que, etsa díxu-me qui s’iba a ve-la mi lu’nseñaba a min solu, peru qui tinia qui ser en privau. Al deci-me estu ya supongu ou pudu pune-lu la muitu pelgarona detsa; peru dúdulo bastante purqui cumu ta muitu gorda, pa atravesatse tou’l turrucho ya las lorzas fairía falta un’argolla muitu grandi. Tan grandi cumu’l narigón qui tse pongu you al toro nu fucicu; sí al xatu que tengu de semental pa duminá-lu candu lu sacu pa tumar las vacas que tan nu potru asperandu. Peru si fora asina de grande el cacharru esi, paezme a mi que esta muchere nun pudría nin sentá-se, ya nutariantse-lu tous purque andaría un pocu escarrancada. Nun sei, sabrá Dios lu que fixu. Etsa sabrá.
Buenu, estu tamién poden ser imaxinaciones mías, ya lu mexor púxulu nel umbligu ya you toi pensandu en que foi bastante más abaxu ya toi esguilándu-me sin xeitu ningunu. ¡Oxalá sea asina! Peru desta mucher pode espera-se cualquier cousa. Tamién toi un poucu cilosu pois digu you: el que le fixu esu, pur curiosu que fora ya tuvu que esqueirar bien atsí pa enganchtse’l engaramichu esi nun sitiu tan dilicau, nun vus paez ho. Candu lu descubra ya vus lu contarei. Siguru que ya tais intrigaus en sabé-lu eh. Pois rapaces, di mumentu asperar, ya tai-vus tranquilus qui na más que lu sepa you, cuéntuvus-lu escapau.

“Jesusín”, el pelgar